Masalimo
Nyimbo ja Daudi.
144 Achimbichikwe Yehofa jwali Lwala lwangu
Jwakusanjiganya kuti ngomboleje kuputa ngondo ni makono gangu,
Soni ni yala yangu.
2 Jwalakwe akusalosya une chinonyelo chakulupichika soni ali malo gangu gakutilila.
Ali malo gangu gambone gakuuŵa soni jwakungulupusya.
Jwalakwe ali chakuchijila changu soni ali malo gangu ganjuŵile,
Jwele jwakusajigomeka mitundu ja ŵandu une ni kujilamulilaga.
3 Wawo Yehofa, ana mundu ali ŵani kuti wawojo amganichisyeje?
Ana mwanache jwa mundu ali ŵani kuti wawojo asamaleje ya jwalakwejo?
4 Umi wa mundu uli wejipi mpela mpweya wapumwile mundu.
Masiku ga umi wakwe gali mpela m’bulili wawuli wangatamilisya.
5 Wawo Yehofa, akutulusye* kwinani kuti wawojo atuluche pasi.
Agakwaye matumbi ni kutendekasya kuti gatuche lyosi.
6 Atendekasye njasi kuti simesye kuti adani* ŵawo abalalikangane.
Aponye mipamba jawo kuti jemanjajo asokonechele nganisyo.
7 Atambasukule makono gawo kutyochela kwinani.
Angulupusye une ku mesi ga mkokomo,
Mmyala mwa achalendo.*
8 Jemanjaji akusaŵecheta yamabosa ni pakamwa pawo
Soni akusakwesya mkono wawo wamlyo ni kulumbila pa yindu yaunami.*
9 Wawo Mlungu, une chinjajimbila wawojo nyimbo jasambano.
Une chinjajimbila nyimbo syakwachimbichisya wawojo ni chida chakwimbila changonji 10.
10 Elo, chinjimjimbila jwele jwakusangamuchisya une kuti nagagomecheje mamwenye,*
Jwele jwakusamkulupusya jwakutumichila jwakwe Daudi ku upanga* wakuwulaga.
11 Angulupusye une mmyala mwa achalendo,
Ŵele ŵakusaŵecheta yamabosa ni pakamwa pawo,
Soni ŵele akusakwesya mkono wawo wamlyo ni kulumbila pa yindu yaunami.
12 Pelepo ŵanache ŵetu ŵachalume chachiŵa mpela yakumela yamwanamwana yayikusakula mwachitema.
Soni ŵanache ŵetu ŵachakongwe chachiŵa mpela yipilala yakusalalichisya m’makona ga nyumba ja mwenye.
13 Ngokwe syetu sichigumbala mnope ni yagungula yamtundu wine uliwose.
Yilango yetu yichiŵelekana mnope kusa kwa machinga ni kuŵa yejinji mnope.*
14 Ng’ombe syetu sichiŵeleka ŵanache ŵajinji, soni ngasisiwulala kapena kupolosya.
M’maluŵala ga m’misinda jetu ngasimupikanika kulila ligongo lya yipwetesi.
15 Ŵakusangalala ali ŵandu ŵayikwatendechela yindu yeleyi.
Ŵakusangalala ali ŵandu ŵele Mlungu jwawo ali Yehofa.