Numeli
12 Sambano Miliyamu soni Aloni ŵatandite kuŵecheta mwakusisyana ni Mose ligongo lyakuti jwalakwe ŵalombele ŵakongwe ŵamtundu wa Chikusi. 2 Jemanjaji ŵaŵechetaga kuti, “Ana Yehofa akusaŵecheta kupitila mwa Mosepe basi? Ana ngakusaŵechetasoni kupitila mwetuwe?” Pandaŵi jaŵaŵechetaga yeleyi, Yehofa ŵaliji ali mkupikanila. 3 Sambano Mose ŵaliji mundu jwakufasa mnope* kupunda mundu jwalijose pachilambo chapasi.
4 Mwakusisimuchisya, Yehofa ŵamsalile Mose, Aloni soni Miliyamu kuti, “Jemanja wosope ŵatatu mjawule ku chitenti chakusimanilana, ngumsosa kweleko.” Myoyo jemanjajo ŵapite kweleko. 5 Kweleko Yehofa ŵayiche mu liwunde lyakwima mpela chipilala, ni kwima pamlango wakwinjilila mu chitenti chakusimanilana. Kaneko ŵamŵilasile Aloni soni Miliyamu. Pelepo jemanjajo ŵaŵandichile. 6 Kaneko jwalakwe ŵatite, “Jemanja, mpikane yangusaka kuŵecheta. Naga apali jwakulochesya jwa Yehofa pasikati penu, une ngusalimanyikasya kwa jwalakwejo ali mesomkulola nambosoni ngusaŵechetana najo kupitila mu sagamisi. 7 Nambo nganiyiŵa myoyo ni jwakutumichila jwangu Mose. Jwalakwe nampele ulamusi pa nyumba jangu josope.* 8 Jwalakwejo ngusaŵechetanaga najo mwagopoka, pameso ni pameso,* pakamulichisya masengo maloŵe gangasawusya kupikana. Nambosoni jwalakwejo akusawuwona uwoneche wa Yehofa. Sambano ligongo chichi jemanja nganimjogopa kuŵecheta mwakusisyana ni Mose jwakutumichila jwanguju?”
9 Myoyo Yehofa ŵatumbilile mnope jemanjajo, mwamti jwalakwe ŵatyosile pasikati pawo. 10 Pelepo liwunde lila lyatyosile penani pa chitenti pala. Ndaŵi jijojo Miliyamu gamkamwile matana geswela kuti mbeee! Kaneko Aloni paŵagalawiche ni kumlola Miliyamu, ŵam’weni kuti gamkamwile matana. 11 Ndaŵi jijojo Aloni ŵamŵendile Mose kuti, “Chonde ambuje ŵangu, ngwaŵenda, akakunda kuti tupochele chilango* chelechi ligongo lya ulemwa watutesilewu. Yatutesileyi kuli kuloŵela kwekulungwa. 12 Chonde akakunda kuti chemwaliŵa aŵepe myiyi mpela mundu jwam’we, jwele apagwile chilu chakwe chili chejonasiche mbali jimo.” 13 Kaneko Mose ŵatandite kumlilila Yehofa kuti, “Wawo Mlungu jwangu, chonde ngwaŵenda, amposye jwalakwejo.”
14 Pelepo Yehofa ŵamjanjile Mose kuti, “Yikaŵe kuti babagwe amsunile mata jwalakwe kungope, ana ngamkanatama masiku 7 ali mkuliwona kuŵa ŵangali mate? Mumŵiche kwajika jwalakwejo kwa masiku 7 kusa kwa matenti. Pachigamale masiku gelego mpaka awujile.” 15 Myoyo Miliyamu ŵatemi kwajika kwa masiku 7 kusa kwa matenti. Pamasiku gosope genego, ŵanduwo nganatyoka paŵataŵile matentipo mpaka paŵawujile Miliyamu. 16 Panyuma pakwe, ŵanduwo ŵatyosile ku Haseloti ni kwinjila m’chipululu cha Palana muŵataŵaga matenti gawo.