Ngani Syambone Syaŵalembile Maliko

9 Ŵasalilesoni jemanjajo kuti, “Nditu ngumsalichisya jemanja kuti ŵane ŵajimi apano ngasapasya chiwa mpaka ali awuweni chandanda Uchimwene wa Mlungu uli uyiche ni machili.” 2 Gali gamasile masiku 6, Yesu ŵamjigele Petulo, Yakobo ni Yohane, ni kwawula palitumbi lyelewu kuti akaŵe kwajika. Kweleko jwalakwe jwachenjile kawoneche kakwe pameso pawo. 3 Yakuwala yakwe yatandite kunyesimila mnope, mwamti yatakete mnope kupunda mwampaka atakatichisye yakuwala jwakuchapa jwalijose pachilambo chapasi. 4 Nambosoni Eliya ni Mose ŵawonechele kwa jemanjajo ali mkuŵechetana ni Yesu. 5 Sambano Petulo ŵamsalile Yesu kuti, “Labi,* mpaka yiŵe chenene kuti tutameje panopano. Myoyo atukunde kuti tutaŵe yisakasa yitatu, chimo cha wawojo, chine cha Mose soni chine cha Eliya.” 6 Pelepo Petulo chamsoŵile chakuti aŵechetesoni ligongo jemanjajo wakamwile mnope woga. 7 Ndaŵi jijojo pawoneche liwunde, ni lyawunichile jemanjajo, soni papikaniche maloŵe kutyochela mwiwundemo kuti, “Aju ali Mwanangu, jwapamtima. Mumpikanileje.” 8 Kaneko paŵalolite aku nakuku, nganamwonasoni mundu jwine nambo Yesu jika.

9 Paŵatulukaga mwitumbimo, jwalakwe ŵasalichisye jemanjajo mwamachili kuti akasamsalila mundu jwalijose yindu yaŵayiweniyo mpaka Mwanache jwa mundu ali ajimwiche ku chiwa. 10 Jemanjajo ŵayisunjile yindu yeleyi m’mitima mwawo, nambo ŵaliji mkuŵechetana ya kwimuka kwakwe kula kuti yikugopolela chichi. 11 Kaneko ŵakulijiganya ŵakwe ŵala ŵatandite kumwusya jwalakwejo kuti, “Ligongo chichi alembi akusati Eliya akusosekwa kwika chandanda?” 12 Jwalakwe ŵajanjile jemanjajo kuti, “Yisyene, Eliya chachiyika soni chachiyiwuchisya yindu yosope. Nambo ligongo chichi m’Malemba ŵalembile kuti Mwanache jwa mundu akusosekwa kusimana ni yakusawusya yejinji soni kuti ŵandu chachimkana? 13 Nambope une ngumsalila kuti Eliya jwayiche, nambo jemanjajo ŵamtesile chilichose chiŵasakaga, mpelaga muyalembedwele yakwamba jwalakwejo.”

14 Sambano Yesu ni ŵakulijiganya ŵatatu ŵala paŵaŵandichilaga kwaŵaliji ŵakulijiganya ŵane ŵala, ŵajiweni gulu jekulungwa jili jasyungulile ŵakulijiganyawo, soni papali alembi ŵaŵaliji mkukangana ni ŵakulijiganyawo. 15 Nambo ŵanduwo paŵagambile kumwona Yesu, ŵasimonjile* mnope, mwamti ŵamwutuchile kuti akawonegane najo. 16 Myoyo jwalakwe ŵawusisye ŵanduwo kuti, “Ana mkukangana chichi ni ŵakulijiganyawo?” 17 Mundu jwine pa gulujo ŵamjanjile jwalakwejo kuti, “Mwalimu, une nayiche najo mwanangu jwamlume ligongo akwete msimu wakusakala wawukusamlepelekasya kuŵecheta. 18 Payimgundiche, msimuwo ukusamgwichisya pasi, kaneko akusakopoka chiwulo kukamwa soni akusalumanya meno, pambesi pakwe akusalembuka. Naŵendile ŵakulijiganya ŵawo kuti awukoposye msimuwo, nambo alepele.” 19 Yesu ŵasalile jemanjajo kuti, “Jemanja ŵa m’bado* wangali chikulupi, ana chimbepe ni jemanja mpaka chakachi? Ana chinampililepe mpaka chakachi? Myiche najo akuno mnyamatajo.” 20 Pelepo ŵayiche najo mnyamatajo kwa Yesu. Nambo msimuwo pawagambile kumwona jwalakwejo, wamtendekasisye mnyamatajo kutetemela mnope soni wamgwichisye pasi. Kaneko jwatandite kugalagata, kwineku ali mkukopoka chiwulo kukamwa. 21 Sambano Yesu ŵawusisye babagwe mnyamatajo kuti, “Ana yeleyi yiŵele yili mkutendekwa kutandila chakachi?” Babagwewo ŵajanjile kuti, “Kutandila ali mwanache. 22 Ndaŵi syejinji msimuwu ukusamgwichisya mwanacheju pamoto pane m’mesi kuti umjonanje. Nambo naga wawojo mpaka akombole kutenda chilichose, chonde atutendele chanasa soni atukamuchisye.” 23 Yesu ŵajanjile kuti, “Ligongo chichi mkuŵecheta kuti, ‘Naga mpaka akombole’? Yindu yosope yili yakomboleka kwa mundu jwakwete chikulupi.” 24 Ndaŵi jijojo babagwe mnyamatajo ŵagumisile kuti, “Chikulupi ngwete! Nambo angamuchisye kuchilimbisya!”

25 Sambano Yesu paŵayiweni kuti gulu ja ŵandujo jikwagungumuchila jemanjajo, ŵawujamwiche msimu wakusakalawo kuti, “Mmwe msimu wakumlepelekasya mundu kuŵecheta soni kupikana, ngumlamula kuti, mkopoche mwa mnyamataju soni mkasimjinjilasoni mwa jwalakweju!” 26 Pelepo msimuwo wagumisile soni wamtendekasisye mnyamatajo kutetemela mnope ni kumputikasyaga pasi, kaneko wakopweche. Mnyamatajo jwaŵele mpela juwile, mwamti ŵandu ŵajinji ŵaŵechetaga kuti, “Mnyamatajutu juwile!” 27 Nambo Yesu ŵamkamwile mkono mnyamatajo ni kumjimusya, mwamti jwajimi. 28 Sambano paŵajinjile m’nyumba, ŵakulijiganya ŵakwe ŵamwusisye kwajika kuti, “Ligongo chichi m’weji twalepele kuwukoposya msimu wakusakala ula?” 29 Jwalakwe ŵajanjile kuti, “Msimu wamti mpela wewula ukusakopoka ni lipopelope basi.”

30 Kaneko jemanjajo ŵawutandite ulendo ni ŵapitile ku Galileya, nambo Yesu nganasakaga kuti ŵandu amanyilile kwapite 31 ligongo ŵaliji mkwajiganya ŵakulijiganya ŵakwe. Jwalakwe ŵaliji mkwasalila jemanjajo kuti, “Mwanache jwa mundu chachimpeleka mmyala mwa ŵandu, soni chachimwulaga. Nambo pachachimwulaga, chachijimuka pa lisiku lyatatu.” 32 Ŵakulijiganya ŵakwewo nganayipikanichisya yeleyi, nambo ŵajogopagasoni kumwusya jwalakwejo.

33 Sambano jemanjajo ŵayiche ku Kapelenawo. Paŵajinjile m’nyumba, Yesu ŵawusisye ŵakulijiganya ŵakwe kuti, “Ana mkanganileje chichi mumsewu mula?” 34 Nambo jemanjajo nganajanga chilichose, ligongo mumsewumo ŵaliji mkukangana yakuti jwamkulungwa ali ŵani pasikati pawo. 35 Myoyo jwalakwe ŵatemi pasi ni ŵaŵilasile ŵakulijiganya ŵakwe 12 ŵala ni kwasalila kuti, “Jwalijose jwakusaka kuŵa jwandanda, akusosekwa kuŵa jwakumalisya pa wosope soni aŵe jwakwatumichila wosope.” 36 Pelepo ŵakaŵilasile kamwanache ni kukajimika pasikati pawo. Kaneko ŵakakoleche makono, ni kwasalila ŵakulijiganya ŵakwewo kuti, 37 “Jwalijose jwakupochela kamo mwa tuŵanache mpela tweletu ligongo lya lina lyangu, akumbochelasoni une. Soni jwalijose jwakumbochela une, ngakumbochela unepe nambo akumpochelasoni Jwele juŵandumile une.”

38 Yohane ŵamsalile jwalakwejo kuti, “Mwalimu, m’we tum’weni mundu jwine ali mkukoposya yiŵanda m’lina lyawo, nambo twalinjile kumlekasya, ligongo jwalakwejo ngakutukuya m’weji.” 39 Nambo Yesu ŵatite, “Mkalinga kumlekasya mundu jwelejo, ligongo pangali mundu jwampaka atende masengo gamachili m’lina lyangu, ndaŵi jijojo ni kugalawuka kutanda kumbechetela yachabe. 40 Pakuŵa jwalijose jwangakulimbana ni m’weji ali kumbali jetu. 41 Jwalijose jwakumpa jemanja chikapu cha mesi ligongo mli ŵakumkuya Klistu, nditu ngumsalichisya, jwelejo mboto* jakwe ngasijijasika kose. 42 Nambo jwalijose jwakukatendekasya kwasa chikulupi kamwanache kamo pa tuŵanache twakulupililatu, yikaliji chenene kwa jwalakwejo kumtaŵilila m’lukosi mwakwe liganga lyekulungwa lyakusyajila, lyalikusawutidwa ni bulu ni kumponya m’nyasa.

43 “Naga mkono wenu ukumlemwekasya, mwukate. Kuli kwambone kuti mkapate umi mli ŵangali chiŵalo chimpepe kulekangana ni kuti mjawule ni makono gaŵili ku Gehena,* kwele moto wakwe wangasima. 44 *—— 45 Soni naga lusajo lwenu lukumlemwekasya, mlukate. Kuli kwambone kuti mkapate umi mli ŵalemale kulekangana ni kuti akamponye ku Gehena* mli mkwete sajo siŵili. 46 *—— 47 Nambosoni naga liso lyenu likumlemwekasya, mlikolotole. Kuli kwambone kuti mkajinjile mu Uchimwene wa Mlungu mli mkwete liso limo kulekangana ni kuti akamponye ku Gehena* mli mkwete meso gaŵili, 48 kwele mbisu syangawa soni moto wakwe wangasima.

49 “Pakuŵa ŵandu mpela ŵeleŵa akusosekwa kwataga moto mpela mwakusatajila njete mu chakulya. 50 Njete jili jambone, nambo naga njetejo jikumala machili, ana machili gakwego mpaka gawujilesoni chamtuli? Umi wenu uŵeje mpela wetajidwe njete, soni mtameje mwamtendele ni ŵane.”