Buku Jaŵili ja Samuyele
22 Palisiku lyele Yehofa ŵamkulupwisye Daudi mmyala mwa adani ŵakwe wosope soni mmyala mwa Sauli, jwalakwe ŵamjimbile Yehofa nyimbo aji. 2 Ŵajimbile kuti:
“Yehofa ali lwala lwangu soni malo gangu gakutilila. Jwalakwe ni jwakusangulupusya une.
3 Mlungu jwangu ali lwala lwangu. Une ngusatilila kwa jwalakwe.
Jwalakwe ali chakulichinjilichisya changu soni ali msengo* wangu wakungulupusya.* Jwalakwe ni jwakusanjenjela une.
Jwalakwe ali malo gangu gakutilila soni jwakungulupusya. Wawo ni ŵakusawombola une ku yindu yachiwawa.
4 Une ngusaŵilanjila pa Yehofa, jwali jwakuŵajilwa kupochela uchimbichimbi.
Mwamti une chinjikulupuka mmyala mwa adani ŵangu.
5 Matumbela gakutendekasya chiwa gasyungulile une,
Soni ŵandu ŵajinji ŵakusakala ŵanjogoyisye une mpela mesi gachikumba.
6 Ngonji sya Malembe* syasyungulile une.
Une nasimene ni yitega yakumtendekasya mundu kuwa.
7 Panasimanaga ni yisawusyo namŵendile Yehofa kuti angamuchisye.
Une napitilisye kumŵenda Mlungu jwangu,
Soni jwalakwe ŵapikene maloŵe gangu ali m’nyumba jakwe.
Mwamti kulila kwangu kwakuŵenda chikamuchisyo kwapikaniche m’mawiwi gakwe.
8 Chilambo chapasi chagambaga kutenganyika.
Soni yilimbilimbi yakwinani yatenganyikaga,
Yatenganyiche aku nakuku ligongo jwalakwe ŵaliji ali atumbile mnope.
9 Lyosi lyakopweche mumbula mwakwe,
Soni moto wakonanga wakopweche mkamwa mwakwe.
Makala gamoto gakolele mnope kutyochela kwa jwalakwe.
10 Jwalakwe ŵatendekasisye kwinani kuti kutuluche pandaŵi jiŵayikaga pasi,
Soni chipi chakogoya mnope chaliji kusajo kwakwe.
11 Jwalakwe ŵakwesile penani pa mkelubi soni ŵayiche ali mkuguluka.
Jwalakwe ŵawonechelaga paŵaliji pamapapiko ga lilayika.*
12 Jwalakwe jwatendekasisye yakuti chipi chimsyungulile,
Chipi chakola mawunde gegumbale ni mesi kuti chiŵe mpela malo gakuuŵa.
13 Kuŵala kwakutyochela kwa jwalakwe kwaliji mpela makala gakolela mnope.
14 Kaneko jwalakwe jwatandite kulindima kutyochela kwinani.
Maloŵe ga Mlungu Jwakwinani Mnope gapikaniche.
15 Jwalakwe jwaponyisye mipamba jakwe, mwamti adani ŵakwe ŵabalalikangene.
Ŵayikasisye njasi, jajatendekasisye jemanjajo kusokonechela nganisyo.
16 Pasi panyasa pawonechele,
Nambosoni fendeshoni ja chilambo chapasi jawonechele ligongo lya kwamuka kwa Yehofa,
Yawonechele ni mpweya wakopoka mumbula mwakwe.
17 Jwalakwe jwatulwiche kutyochela kumalo gakwela,
Soni jwalakwe jwangamwile ni kunjuwula une m’mesi gakusokoka mnope.
18 Jwalakwe jwangulupwisye une mmyala mwa mdani jwangu jwamachili.
Mmyala mwa ŵandu ŵakumbenga une, ŵaŵaliji ŵamachili kumbunda une.
19 Jemanjajo ŵanjimuchile palisiku lyanasimene ni yakusawusya,
Nambo Yehofa ŵangamuchisye.
20 Jwalakwe ŵangulupwisye ni kunjawusya ku malo gambone.
Ŵangulupwisye ligongo ŵaliji mkusangalala ni une.
21 Yehofa akusamba upile ligongo lyakukulupichika kwangu.
Jwalakwe akusambuchisya une yambone ligongo magasa gangu gali gangalemwa.
22 Pakuŵa une nagasunjile matala ga Yehofa,
Soni nganindenda yakusakala mwakumleka Mlungu jwangu.
23 Ngusakumbuchila malamusi gakwe gosope,
Soni une nganimba ndesile kukuya malamusi gakwego.
24 Une chimbitilisye kuŵa mundu jwangalemwa pameso pa jwalakwe,
Soni une chimbitilisye kuŵambala yakulemwa.
25 Nguŵenda kuti Yehofa ambuchisye une yambone ligongo lyakukulupichika kwangu.
Jwalakwe atende yeleyi ligongo lya ungali ulemwa wangu pameso pakwe.
26 Mundu jwakulupichika wawo akusatenda najo yindu mwakulupichika,
Mundu jwamachili jwangali chakulemwa wawo akusatenda najo yindu mwakulungama.
27 Kwa mundu jwamswela wawojo akusalilosya kuti ali jwamswela.
Nambo kwa mundu jwangakulupichika wawo chachililosya kuti ali jwalunda.*
28 Pakuŵa wawo akusiŵakulupusya ŵandu ŵali ŵakulinandiya,
Nambo meso gawo gakusiŵasisya ŵandu ŵakulikwesya, soni akusiŵatulusya jemanjaji.
29 Pakuŵa wawo Yehofa ali nyali jangu,
Yehofa ni jwakusamulichila une pandili m’chipi.
30 Ni chikamuchisyo cha wawojo une mpaka ngombole kujigomeka gulu ja ŵachiswamba.
Mwamachili ga Mlungu mpaka ngombole kuguluka lipupa.
31 Litala lya Mlungu jwakuwona lili lyakulungamika.
Maloŵe ga Yehofa gali gangali chakugasakasya.
Jwalakwe ali chakulichinjilichisya cha ŵandu ŵele ŵakusatilila kwa jwalakwejo.
32 Ana pana Mlungu jwinesoni jwakupunda Yehofa?
Ana ngaŵa Mlungu jwetupe ni jwali lwala lwakulimba?
33 Mlungu jwakuwona ali sanja jangu jakutililako jakulimba mnope.
Jwalakwe chachilitendekasya litala lyangu kuŵa lyakulungamika.
34 Jwalakwe akusasitendekasya ngongolo syangu kuti siŵe mpela sya mbaŵala.
Jwalakwe akusandendekasya une kuti njime m’malo gakwela.
35 Jwalakwe akusagakosechelesya makono gangu kuti gapute ngondo.
Makono gangu mpaka gapinde ukunje wachisyano chakopa.
36 Wawo akusamba une chakulichinjilichisya cha chikulupusyo,
Soni kulinandiya kwawo ni kwakukusandendekasya une kuŵa jwapenani.
37 Wawo akusakusya litala lyangu pangwenda.
Sajo syangu ngasisitelesya.
38 Une chinjatopola adani ŵangu ni kwamasya wosope.
Ngasimbujila mpaka ndili napyajisile wosope.
39 Chinjapyajila jemanjajo ni kwakasakasa, ni chakulinga chakuti akajimukasoni.
Jemanjaji chachigwila pasi pa sajo syangu.
40 Wawojo chachimba une machili gakuputila ngondo.
Chachatendekasya adani ŵangu kuti agwe pameso pangu.
41 Wawojo chachitendekasya kuti adani ŵangu atile pameso pangu,
Soni chinjamasya ŵandu ŵakumbenga une.
42 Jemanjajo chachilila pakuŵenda chikamuchisyo nambo pangali juchachakulupusya.
Chachilililasoni kwa Yehofa kuti ŵakamuchisye, nambo jwalakwejo ngasiŵajanga.
43 Une chinjatwa jemanjajo kuti atililiche mpela luwundu lwa pachilambo chapasi.
Chinjaliŵata soni kwapondaponda jemanjajo mpela matope ga mumsewu.
44 Wawojo chachingulupusya mmyala mwa ŵandu ŵangu ŵakumbatila magongo.
Wawo chachinjenjela mmyala mwa achakulungwakulungwa ŵa mitundu ja ŵandu.
Ŵandu ŵakuti unejo ngangwamanyilila chachindumichila.
45 Ŵandu ŵa chilambo chine chachiyika pameso pangu mwakulinandiya uli wakamwile woga.
Yachachipikana jemanjaji yakwamba une yichatendekasya kumbikanila.
46 Ŵandu ŵachilambo chine chachijasa mtima.
Jemanjajo chachikopoka mmalo gawo gakuuŵa ali mkutetemela ni woga.
47 Yehofa ali jwaumi. Lwala lwangu lupochele uchimbichimbi.
Achimbichikwe mnope Mlungu jwangu jwali lwala lwalukusangulupusya.
48 Mlungu jwakuwona akusiŵawuchisya adani ŵangu.
Jwalakwe akusiŵagomeka ŵandu ni kwaŵika pasi pangu.
49 Jwalakwe akusangulupusya mmyala mwa adani ŵangu.
Wawotu akusangwesya ni kumbika penani pa ŵandu ŵakusanjimuchila,
Soni wawo akusangulupusya une mmyala mwa mundu jwakutenda yachiwawa.
50 Ni ligongo lyakwe une chinjayamichila wawo Yehofa, pasikati pa mitundu ja ŵandu.
Soni une chinjijimba nyimbo syakulichimbichisya lina lyawo.
51 Jwalakwe akusatenda masengo gamakulungwa pakusaka kumkulupusya mwenye jwakwe.
Akusamlosya chinonyelo changamala jwamsagulwe jwakwe,
Elo kwa Daudi soni ŵanache* ŵakwe mpaka kalakala.”