Masalimo
Kwa jwakulongolela nyimbo ja Nehiloti.* Nyimbo ja Daudi.
5 Apikane maloŵe gangu, wawo Yehofa,
Akupikanichisye kuwuwula kwangu.
2 Wawo Mwenye jwangu soni Mlungu jwangu,
Apikane kulila kwangu kwakuŵenda kuti angamuchisye ligongo une ngusapopela kwa wawo.
3 Wawo Yehofa, wawojo kundaŵi kulikose chachipikanaga maloŵe gangu.
Kundaŵi kulikose chinjasalilaga yakudandawula yangu soni chinjijembecheyaga mwachidwi kuti anjanje.
4 Pakuŵa wawojo Mlungu ŵangasangalala ni yakusakala.
Pangali jwalijose jwakusakala jwampaka atame ni wawojo.
5 Pangali mundu jwakulikwesya jwampaka ajime pameso pawo.
Wawojo akusaŵengana ni wosope ŵakusatenda yakusakala.
6 Chachajonanga wosope ŵakusaŵecheta yamabosa.
Yehofa akusaŵengana ni ŵandu ŵachiwawa* soni ŵachinyengo.
7 Nambo une chinjijinjila m’nyumba mwa wawojo ligongo lya chinonyelo chawo chakulupichika chachili chekulungwa.
Chinjitindiŵala ndili ndolite ku nyumba jawo jeswela pakwachimbichisya mnope wawojo.
8 Wawojo Yehofa alongolele m’matala gawo gachilungamo ligongo lya adani* ŵangu.
Angamuchisye kuti njende m’matala gawo pali pangali jwakusokonasya.
9 Pangali chilichose chakusaŵecheta jemanjajo champaka mundu achikulupilile,
Mwa jemanjajo mugumbele yindu yachabe,
Kungulo kwawo kuli mpela malembe gewuguche,
Akusanyenjelela ni pakamwa pawo.
10 Nambo Mlungu chachawona jemanjajo kuŵa ŵakulemwa.
Mapulani gawo gachagwisya achimisyenepewo.
Ŵatopole ligongo lya winji wa yakulemwa yawo.
Pakuŵa jemanjajo ŵajimuchile wawojo.
11 Nambo wosope ŵakutilila kwa wawojo chachisangalala.
Ndaŵi syosope chachijimbaga mwakusangalala.
Wawojo ngasakunda ŵakusakala kwaŵandichila jemanjajo.
Wosope ŵakulinonyela lina lya wawojo chachisangalala ligongo lya wawojo.
12 Pakuŵa wawojo Yehofa chachimpa upile mundu jwalijose jwali jwakulungama.
Wawojo chachajitichisya jemanjajo, mpela kuti akwachenjela ni chakuchijila chekulungwa.