Buku Jaŵili ja Samuyele
16 Kaneko Daudi ali apundile panandi penani pa litumbi pala, Siba juŵaliji jwamasengo jwa Mefiboseti ŵaliji ali kweleko kuti asimane ni Daudi. Pakwawula kweleko Siba ŵajigele abulu ŵaŵili ŵakola yakutamila pa mgongo pawo soni ŵakwesisye pa abuluwo mikate 200, makeke 100 ga yisogosi yejumu ya mipeleya, makeke gane 100 ga yisogosi ya muchawu* soni lulo lumo lwekulungwa lwa finyo. 2 Kaneko mwenyewo ŵamwusisye Siba kuti, “Ligongo chichi myiche ni yindu yeleyi? Pelepo Siba ŵajanjile kuti, Abuluŵa ali ŵakuti ŵandu ŵa kunyumba ja mwenye akweleje, mkatewu soni yisogosi yamuchawuyi yili yakuti anyamataŵa alyeje nambosoni finyojo ali jwakuti amweje ŵandu ŵapesile m’chipululu muno.” 3 Mwenyewo ni ŵamwusisye jwalakwe kuti, “Sano mwanache* jwa ambuje ŵenu ali kwapi?” Siba ni ŵajanjile mwenyewo kuti, “Asigele ku Yelusalemu pakuŵa jwalakwe atite, ‘Lelo ŵandu ŵa mnyumba ja Isalayeli chambuchisye uchimwene wa baba ŵangu.’” 4 Kaneko mwenyewo ŵamsalile Siba kuti, “Mpikane, yindu yosope yayili ya Mefiboseti nguyipeleka kwa mmwejo.” Pelepo Siba ŵajanjile kuti, “Ngutindiŵala pameso pawo, soni nguŵenda kuti apitilisye kusalalila mtima wawo ambuje ŵangu mwenye.”
5 Mwenye Daudi paŵayiche ku Bahulimu, jwamlume jwine jwa mu liŵasa lya Sauli lina lyakwe Simeyi, mwanache jwa Gela, ŵakopochele ali mkuŵecheta maloŵe gakunyosya paŵayikaga kwaŵaliji Daudijo. 6 Jwalakwe ŵamsomaga maganga Daudijo soni ŵakutumichila wosope ŵa mwenye Daudiwo. Jwalakwe ŵasomagasoni ŵandu wosope ŵaŵaliji ni mwenyewo soni achalume ŵamachili ŵaŵaliji kumkono wamlyo soni wamchiji wa mwenyewo. 7 Paŵamnyosyaga Daudijo, Simeyi ŵaŵechetaga kuti, “Mtyoche, mtyoche akuno mmwe mundu jwakola magambo ga myasi soni mundu jwangali mate!” 8 Yehofa akumwuchisya mmwejo magambo gosope ga myasi ja ŵandu ŵa m’nyumba ja Sauli, jwele mmwejo mwamjinjile mmalo mwakwe ni kulamulilaga mpela mwenye. Nambo Yehofa apeleche uchimwenewo mmyala mwa Abisalomu mwanache jwenu. Sano likungu limgwilile mmwejo ligongo mkwete magambo ga myasi.”
9 Kaneko Abisayi mwanache jwa Seluya ŵawusisye mwenyewo kuti, “Ana ligongo chichi mbwa jewe jeleji jikwanyosya ambuje ŵangu mwenye? Angunde chonde kuti njawule kwali jwalakwe kuti ngamkate mtwe wakwe.” 10 Nambo mwenyewo ŵamjanjile jwalakwe kuti, “Ana yikumkwaya uli jemanja ŵanache* ŵa Seluya? Mumleche jwalakwe anyosyeje, pakuŵa Yehofa ni jwamsalile jwalakwejo kuti, ‘Mumnyosye Daudi.’ Sambano ana ŵani ŵampaka amwusye jwalakwe kuti, ‘Ligongo chichi mkutenda yeleyi.’” 11 Kaneko Daudi ŵamsalile Abisayi soni ŵakutumichila ŵakwe ŵane wosope kuti, “Naga mwanache jwangu jwakuliŵelechela akusaka kumbulaga, kuli uli jweleju jwali jwa mu mtundu wa Benjamini. Amleche jwalakwe anyosyeje, pakuŵa Yehofa ni jwamsalile. 12 Mwine Yehofa chakuwone kulagasika kwangu soni Yehofajo chambuchisye umbone mmalo mwa maloŵe gakunyosya gakumbechetela lelojino.” 13 Pelepo Daudi yimpepe ni achalume ŵakwe ŵapitilisye kwenda ulendo wawo, soni Simeyi ŵajendaga mumbali mwa litumbi chiŵandika ni Daudijo kwineku ali kumnyosya Daudi, kumsoma maganga soni mkutaga luwundu jwalakwejo pampepe ni achalume ŵakwe.
14 Pali papite ndaŵi mwenyewo pampepe ni ŵandu ŵaŵaliji ni jwalakwe ŵayiche kwaŵajawulaga ali apesile, mwamti ŵapumwile.
15 Pandaŵiji Abisalomu pampepe ni achalume wosope ŵa ku Isalayeli ŵakopochele ku Yelusalemu, soni Ahitofeli ŵaliji yimpepe ni Abisalomujo. 16 Husayi jwa mumbumba ja Aliki, mjakwe jwa Daudi jula, paŵayiche kwa Abisalomu ŵamsalile Abisalomujo kuti, “Akole umi wawulewu mwenye, akole umi wawulewu mwenye.” 17 Pelepo Abisalomu ŵamwusisye Husayijo kuti, “Ana yamkutenda pelepayi nikuti mkumlosya mjenu jula chinonyelo changamala? Ligongo chichi nganimumkuya mjenujo?” 18 Myoyo Husayi ŵamjanjile Abisalomujo kuti, “Iyayi ndili kumbali ja mundu jwele Yehofa, ŵanduŵa soni achalume wosope ŵa ku Isalayeli amsagwile. Une chindame ni jwele mundujo. 19 Mbechetesoni mwakusimichisya. Ana une ngusosekwa natumichile ŵani? Ana ngangusosekwa kumtumichila mwanache jwa mjangujo? Mpela yanatite pakwatumichila baba ŵawo chinatumichilesoni wawojo.”
20 Sambano Abisalomu ŵamŵendile Ahitofeli kuti, “Mungamuchisye lunda. Ana tutende uli?” 21 Pelepo Ahitofeli ŵamsalile Abisalomu kuti, “Mgone ni achiŵamkwawo ŵapambali ŵa baba ŵenu, ŵaŵalesile kuti asamalileje nyumba.* Pelepo Ayisalayeli wosope chachipikana kuti mmwejo mŵele chindu chakununga mnope kwa baba ŵenu, mwamti yeleyi yichalimbikasya wosope ŵali kumbali jenu.” 22 Myoyo jemanjajo ŵamkunjile tenti Abisalomu pa msakasa wa nyumba, mwamti Abisalomujo ŵagonile ni achiŵamkwawo ŵapambali ŵa baba ŵakwe Ayisalayeli wosope ali mkulola.
23 M’masiku gelego Ahitofeli pamkamuchisye lunda mundu yaŵaga mpela kuti gali maloŵe gakutyochela kwa Mlungu jwakuwona.* Mwelemu ni muŵagawonelaga Daudi ni Abisalomu maloŵe gosope gaŵaŵechetaga Ahitofeli.