Buku Jandanda ja Samuyele
6 Libokosi lya Yehofa lyatemi mu dela ja Afilisiti kwa myesi jakwana 7. 2 Afilisiti ŵaŵilasile ŵakutaga mbopesi soni ŵakutenda yamasenga ni kwawusya kuti, “Ana Libokosi lya Yehofali tutende nalyo chichi? Atusalile yampaka tutende kuti tuliwuchisye Libokosili kumangwakwe.” 3 Pelepo jemanjajo ŵajanjile kuti, “Naga mkulitumisya kumangwakwe libokosi lya chilanga lya Yehofa, Mlungu jwa Ayisalayeli, ngamkusosekwa gamba kulitumisya pali pangali mituka. Nambo mkusosekwa kuliwuchisya libokosilyo pampepe ni mbopesi syachimpeleche ligongo lya kuleŵako. Naga mkutenda yeleyi nikuti chimpole, soni chimchimanyilila ligongo lyakwe mkono wakwe ngawukutyoka pa jemanja.” 4 Myoyo jemanjajo ŵawusisye kuti, “Ana tutumisye kwa jwalakwejo mbopesi jamtuli ja kuleŵako?” Pelepo jemanjajo ni ŵajanjile kuti, “Mwakamulana ni winji wa ŵakulamulila ŵa Afilisiti mkusosekwa kutumisya yiwanichisyo msano yagolide yakuwoneka mpela yakuyimba ya ulwele wa mlindimo* soni yiwanichisyo msano yagolide yakuwoneka mpela makoswe, pakuŵa ulwele welewu umgwilile jemanja pampepe ni ŵakulamulila ŵenu. 5 Mkusosekwa mpanganye yiwanichisyo yakulandana ni yakuyimba ya ulwele wenu wa mlindimowo soni yiwanichisyo yine yakulandana ni makoswe genu gagakonanga chilambo chenu. Mtende yeleyi kuti mumchimbichisye Mlungu jwa Ayisalayeli. Naga mkutenda yeleyi komboleka mpaka atyosye usito wa mkono wakwe pa jemanja soni pa mlungu jwenu ni chilambo chenu. 6 Ligongo chichi mkusaka kumusya mitima jenu mpela muŵatendele Aiguputo ni Falawo pakumusya mitima jawo? Pajatu jemanjaji ŵakundile Ayisalayeli kutyoka panyuma pakuti Mlungu ŵapele chilango,* mwati Ayisalayeliwo ŵanyakwiche nditu. 7 Myoyo mpanganye ngolo jasambano soni mjigale ng’ombe siŵili syekongwe syasikwete ŵanache, syele nganasitaŵililejepo ku likongwa. Kaneko mjigale ng’ombesyo ni kusitaŵilila kungolojo, nambo mwajigale ŵanachewo ni kwajawusya kumangwawo kuti akaŵa yimpepe ni ng’ombesyo. 8 Panyuma pakwe mjigale Libokosi lya Yehofa ni kuliŵika mu ngolojo, soni mjigale yindu yagolide yila yamkuyitumisya mpela mbopesi ja kulemwa kwenu ni kuyiŵika mu libokosi. Libokosilyo mliŵiche mu ngolomo chiŵandika ni Libokosi lya Chilanga lila kaneko mlitumisye kuti lijawuleje. 9 Ngolojo pajinyakwiche mlolechesye kwa jikwawula naga jikwinjilila ku litala lyakwawula ku Beti-semesi kwakuli kumangwakwe nikuti Mlungu jwa Ayisalayeli ni jwatendekasisye yakusawusyayi kwa m’weji. Nambo naga ngalikwinjilila kweleko pelepo chitumanyilile kuti nganiliŵa ligasa lyakwe lyalitendekasisye yeleyi, soni nikuti yigambile kututendechela mwangosi.”
10 Pelepo achalumewo ŵatesile yaŵasalileyo. Jemanjaji ŵajigele ng’ombe siŵili syekongwe syasyakwete ŵanache ni kusitaŵilila ku ngolo jila, nambo ŵanache ŵa ng’ombesyo ŵawugalile mwichinga kumangwawo. 11 Kaneko ŵajigele Libokosi lya Yehofa lila ni kulikwesya mu ngolojo, ŵakwesisyemosoni libokosi lyalyakwete yiwanichisyo yagolide yakuwoneka mpela makoswe yila soni yiwanichisyo yakuwoneka mpela yakuyimba ya ulwele wa mlindimo yila. 12 Ng’ombe sila pasyanyakwiche syajinjilile msewu wakwawula ku Beti-semesi. Ng’ombesyo syagambaga kwenda mu msewu umo pewo soni syaliji mkulila pasyajendagapo, nganisijinjilila ku mkono wamlyo kapena wamchiji. Paulendo wosopewu ŵakulamulila ŵa Afilisiti ŵaliji mkukuya panyuma pakwe mpaka ŵayiche m’malile ga Beti-semesi. 13 Pandaŵiji ŵandu ŵa ku Beti-semesi ŵaliji ali mkutyosya tiligu m’chiŵata.* Paŵakwesisye meso gawo ni kuliwona Libokosi lya Chilanga lila, ŵasangalele mnope pakuliwona. 14 Sambano ngolo jila jayiche mu mgunda wa Yoswa jwa ku Beti-semesi ni jajimi mumgundamo chiŵandika liganga lyekulungwa. Myoyo jemanjajo ŵasalenye matabwa ga ngolojo, kaneko ŵajigele ng’ombe sila ni kusipeleka mbopesi jakutinisya kwa Yehofa.
15 Pelepo Alefi ŵatulwisye Libokosi lya Yehofa pampepe ni libokosi line lyalyaliji mu ngolo jila lyele mkati mwakwe mwaliji yindu yagolide ni kuyiŵika yosopeyo pa liganga lyekulungwa lila. Palisiku lyeleli ŵandu ŵa ku Beti-semesi ŵapeleche kwa Yehofa mbopesi syakutinisya soni mbopesi sine.
16 Ŵakulamulila msano ŵa Afilisiti paŵagambile kuyiwona yeleyi, ŵawujile ku Ekiloni lisiku lyelelyo. 17 Sambano ayi ni yiwanichisyo yagolide yakuwoneka mpela yakuyimba ya ulwele wa mlindimo yele Afilisiti ŵayipeleche kwa Yehofa ligongo lya ulemwa wawo: chiwanichisyo chimo ŵachipeleche mmalo mwa ŵandu ŵa ku Asidodi, chine mmalo mwa ŵandu ŵa ku Gasa, chine mmalo mwa ŵandu ŵa ku Asikeloni, chine mmalo mwa ŵandu ŵa ku Gati, soni chine mmalo mwa ŵandu ŵa ku Ekiloni. 18 Nambosoni winji wa yiwanichisyo yagolide yakuwoneka mpela makoswe waliji wakulandana ni winji wa misinda josope ja Afilisiti jajaliji mmyala mwa ŵakulamulila msano ŵala. Kutandila ni misinda jakola ndenje syakulimba mnope mpaka kumisi.
Soni liganga lyekulungwa lyaŵawisilepo Libokosi lya Yehofa mu mgunda wa Yoswa jwa ku Beti-semesi lili mpela umboni mpaka lelo. 19 Nambo Mlungu ŵawuleje ŵandu ŵa ku Beti-semesi, ligongo lyakuti jemanjajo ŵaliweni Libokosi lya Yehofa. Jwalakwe ŵawuleje ŵandu ŵakwana 50,070.* Mwamti ŵandu ŵa kweleko ŵatandite kulila mnope ligongo lyakuti Yehofa ŵawuleje ŵandu ŵajinji. 20 Kaneko ŵandu ŵakutama ku Beti-semesi ŵatandite kuwusya kuti, “Ana ŵani ŵampaka akombole kwima pameso pa Yehofa Mlungu jwamswelaju? Ana nganiyiŵa yikomboleche kuti jwalakweju atuleche m’weji ni kwawula kwa ŵandu ŵane?” 21 Myoyo jemanjajo ŵatumile ŵamitenga ŵakuti akasalile ŵandu ŵa ku Kiliyati-yelimu kuti, “Afilisiti awusile nalyo Libokosi lya Yehofa lila. Ayiche akuno alijigale kuti ajawuleje nalyo kumangwawo.”