Chikalata Chakwawula kwa Tito
3 Mpitilisye kwakumbusya kuti apikanileje maboma soni ŵakulamulila, soni kuti aŵe ŵakoseka kamula masengo galigose gambone. 2 Akaŵechetaga yakumnyosya mundu jwalijose, soni akaŵa ŵaukali, nambo aŵe ŵakupikana ya ŵane, soni aŵe ŵakufasa kwa ŵandu wosope. 3 Pakuŵa m’wejisoni pandanda twaliji ŵangali lunda, ŵangapikanila, ŵakusokonechela, achikapolo ŵa yakumbila soni ŵa yakusangalasya yakulekanganalekangana, ŵakutenda yakusakala, ŵawiwu, ŵakunyalaya soni ŵauŵengani.
4 Nambope, umbone mtima wa Mkulupusyo jwetu, Mlungu, soni chinonyelo chakwe kwa ŵandu payawonechele, 5 jwalakwe ŵatukulupwisye, ngaŵaga ligongo lya masengo gakulungama gatwatesile, nambo ligongo lya chanasa chakwe. Jwalakwe ŵatukulupwisye mwakutujojesya kuti tupate umi, soni ŵatukulupwisye mwakututendekasya kuŵa ŵasambano mwa msimu weswela. 6 Jwalakwe ŵatupele msimu welewu mwakoloŵa makono* kupitila mwa Yesu Klistu Mkulupusyo jwetu, 7 kuti patuweni kuŵa ŵakulungama kupitila mu umbone mtima wakwe wekulungwa, tuŵe ŵakupochela chipanje mwakamulana ni chembecheyo cha umi wangamala.
8 Maloŵe gelega gali gakudalilichika, soni ngusaka kuti mmwejo mŵecheteje mwagombelechesya yindu yeleyi, kuti ŵele ŵakusamkulupilila Mlungu apitilisye kuŵika nganisyo syawo pakutenda masengo gambone. Yindu yeleyi yili yambone soni yakamuchisya kwa ŵandu.
9 Nambo mmwejo mkajinjililaga nawo mu kukangana pa yindu yangali mate, kulondesya ya mibado* ja achinangolo, kangana, soni kulimbana pa yindu yakwamba Chilamusi, ligongo yili yangapindulisya nambosoni yangali mate. 10 Mundu jwakulimbikasya kugaŵikangana, mkakamulana najosoni pamumjamwiche* kandanda soni kaŵili, 11 pakumanyilila kuti mundu jwelejo jusokonechele pa litala, soni akulijimba magambo ligongo lya yakulemwa yakwe.
12 Pachinjimtumisya Atema kapena Tukiko kwa mmwejo, chimtende yiliyose yakomboleka kuti chimusimane ku Nikopoli, ligongo nganisisye kuti ngatame kweleko mu nyengo jakusisima. 13 Sena, jwakumanyilila Chilamusi jula, soni Apolo mwape yakusosechela yakwanila kuti akasoŵa chilichose paulendo wawo. 14 Nambo achalongo achimjetu nombenawo akusosekwa alijiganye kutenda yambone, ni chakulinga chakuti akomboleje kwakamuchisya ŵane.
15 Wosope ŵali ni une akuno akupeleka moni. Mumbelechele moni kwa ŵakulupilila achimjetu ŵele ŵakusatunonyelasoni.
Umbone mtima wekulungwa uŵe ni jemanja wosope.