Genesesi

25 Sambano Abulahamu ŵalombelesoni jwamkongwe jwine. Lina lya jwamkongweju ŵaliji Ketula. 2 Pali papite ndaŵi Ketula jwaŵeleche Simulani, Yokisani, Medani, Midiyani, Isibaki soni Suwaha.

3 Yokisani ŵaŵeleche Seba soni Dedani.

Ŵanache ŵa Dedani ŵaliji Asulimu, Letusimu soni Leumimu.

4 Ŵanache ŵa Midiyani ŵaliji Efa, Efeli, Hanoki, Abida soni Elida.

Ŵanache wosopeŵa ŵaliji yisukulu ya Ketula.

5 Kaneko Abulahamu ŵampele Isaki yindu yosope yiŵakwete. 6 Nambo Abulahamu ŵapeleche yindu yine yambone kwa ŵanache ŵakwe ŵaŵaŵeleche kwa achiŵamkwakwe ŵane. Kaneko Abulahamu ali chiŵela umi ŵasalile ŵanachewo kuti akatameje ku chilambo cha Kungopokolyuŵa kwakutalikangana ni Isaki. 7 Yaka yosope yaŵatemi ni umi Abulahamu yakwanile 175. 8 Kaneko Abulahamu ŵapumwile kakumalisya ni ŵawile, ali atemi ni umi wambone kwandaŵi jelewu. Jwalakwe ŵawile ali akalambele soni ali jwakwikutila ni umi, mwamti ŵamŵisile pampepe ni ŵandu ŵakwe.* 9 Isaki ni Isimayeli ŵaŵaliji ŵanache ŵa Abulahamu, ŵamsichile jwalakwe ku mbanga ja Makipela mumgunda wa Efuloni mwanache jwa Sohali jwele ŵaliji Mhiti. Mgundawu waliji mwakulolegana ni Mamule, 10 soni wele Abulahamu ŵawusumile kwa ŵanache ŵa Heti. Abulahamu ŵamsichile kweleko pamalo paŵamsichile Sala ŵaŵaliji ŵamkwakwe. 11 Abulahamu ali awile, Mlungu ŵapitilisye kumpa upile Isaki mwanache jwa Abulahamu jula. Isaki ŵatamaga mwakuŵandichila ku Beeli-lahai-loi.

12 Aji ni mbili ja Isimayeli mwanache jwa Abulahamu jwele Hagala jwamkongwe jwa ku Iguputo jula soni juŵaliji jwamasengo jwa Sala, ŵamŵelechele Abulahamu.

13 Sambano aga ni mena ga ŵanache ŵa Isimayeli. Maŵasa ga ŵanache ŵeleŵa gamanyikagasoni ni mena gelega. Mwanache jwandanda jwa Isimayeli jwaliji Nebayoti. Kaneko Kedala, Adibele, Mibisamu, 14 Misima, Duma, Maasa, 15 Hadadi, Tema, Yetulu, Nafisi soni Kedema. 16 Ŵeleŵa ni ŵaŵaliji ŵanache ŵa Isimayeli, soni gelega gali mena gawo mwakamulana ni misi jawo soni malo gawo gaŵataŵile matenti ni kutamaga. Wosopeŵa ŵaliji achimlongola ŵakwana 12 mwakamulana ni mbumba syawo. 17 Yaka yosope yaŵatemi ni umi Isimayeli yakwanile 137. Kaneko Isimayeli ŵapumwile kakumalisya ni ŵawile, mwamti ŵamŵisile pampepe ni ŵandu ŵakwe.* 18 Dela jaŵatamaga ŵanache wosope ŵa Isimayeli, jatandile ku Hafila chiŵandika dela ja Suli jajili mwakuŵandikana ni chilambo cha Iguputo mpaka kuja kwika ku Asiliya. Jemanjaji ŵatamaga mwakuŵandichila achalongo achimjawo* wosope.

19 Aji ni mbili ja Isaki mwanache jwa Abulahamu.

Abulahamu ŵaŵeleche Isaki. 20 Isaki paŵaliji ni yaka 40, ŵalombele Labeka mwanache jwa Betuwelo, juŵaliji Mualamu jwa ku Padani-alamu, jwelesoni jwaliji mchemwali jwakwe jwa Labani juŵalijisoni Mualamu. 21 Sambano Isaki ŵatamilaga kumŵenda Yehofa pakwamba ya ŵamkwakwe ŵele ŵaliji ŵangaŵeleka. Myoyo Yehofa ŵajanjile yaŵaŵendagayo, mwamti Labeka ŵakwete msigo. 22 Pelepo ŵanache ŵaŵaliji m’matumbo mwa Labeka ŵatandite kulimbana, mwamti Labeka ŵatite, “Naga kulaga kwakwe chikuŵe kweleku, ni bola ngambe kuwa.” Myoyo jwalakwe ŵamwusisye Yehofa kuti amanyilile chachikutendekwa. 23 Pelepo Yehofa ŵamjanjile jwalakwejo kuti, “M’matumbo mwenu mwana mitundu jiŵili ja ŵandu, soni mitundu jiŵili ja ŵandu jeleji jajili mwa mmwejo jichiŵa jakulekangana. Mtundu umo uchiŵa wamachili kuwupunda mtundu winewo, soni mwanache jwamkulungwajo chachimtumichila jwamnandi.”

24 Ndaŵi pajakwanile jakuti Labeka aŵeleche, m’matumbo mwakwe mwaliji mwana ŵanache ŵaŵili ŵamaŵila. 25 Mwanache jwandanda kupagwa jwaliji jwamchejewu chilu chosope mwamti pa chilu pakwe pawonekaga mpela chakuwala chaubweya.* Myoyo ŵampele lina lyakuti Esawu.* 26 Kaneko ŵapagwile mpwakwe jwele mkono wakwe waliji uli ukamwile chindende cha Esawu. Myoyo jwalakwe ŵampele lina lyakuti Yakobo.* Isaki ŵaliji ali akwete yaka 60 pandaŵi jiŵapagwaga ŵanache ŵakweŵa.

27 Anyamataŵa paŵakulaga, Esawu jwaŵele jwakumayilila chenene kusakula yinyama soni jwakunonyela kwenda mwitinji, nambo Yakobo jwaŵele mundu jwangali chakulemwa soni jwakutama m’matenti. 28 Isaki ŵamnonyelaga mnope Esawu ligongo ŵamwulajilaga nyama, nambo Labeka ŵamnonyelaga mnope Yakobo. 29 Lisiku line Yakobo paŵateleche mbweso, Esawu ŵakopochele ali mkutyochela kwitinji soni ali apesile. 30 Myoyo Esawu ŵamsalile Yakobo kuti, “Mjanguye, mungayile yakulya yechejewu yamteleche pelepoyo. Mbesiletu une.”* Ali ni ligongo lyakwe jwalakwe ŵampele lina lyakuti Edomu.* 31 Pelepo Yakobo ŵajanjile kuti, “Musumisye kaje upile wenu wakuŵa jwandanda kupagwa.” 32 Myoyo Esawu ŵapitilisye kuŵecheta kuti, “Unetu sigele panandi kuwa, ni upile wakuŵa jwandanda kupagwawo wana masengochi?” 33 Pelepo Yakobo jwaŵechetesoni kuti, “Nambo chandanda mlumbile kaje.” Myoyo Esawu jwalumbile mwamti jwasumisye kwa Yakobo upile wakwe wakuŵa jwandanda kupagwa. 34 Kaneko Yakobo ŵampele Esawu mkate* soni mbweso, mwamti jwalakwe ŵalile ni kumwela. Kaneko jwalakwe ŵanyakwiche ni kwawulaga. Yeleyi ni yaŵatesile Esawu pakunyosya upile wakwe wakuŵa jwandanda kupagwa.