Genesesi
38 Pali papite ndaŵi, Yuda ŵalekangene ni achalongo achimjakwe ni kuja kukunga tenti jakwe chiŵandika ni mundu jwine jwa ku Adulamu lina lyakwe Hila. 2 Ali kweleko, Yuda ŵam’weni mwanache jwamkongwe jwa mundu jwine jwa Chikanani lina lyakwe Suwa. Myoyo Yuda ŵamjigele jwamkongwejo ni kuŵa ŵamkwakwe mwamti ŵagonile najo. 3 Kaneko jwamkongwejo ŵakwete msigo. Panyuma pakwe jwamkongwejo ŵaŵeleche mwanache jwamlume ni ŵampele lina lyakuti Ele. 4 Panyuma pakwe, jwamkongwejo jwakwetesoni msigo mwamti jwaŵeleche mwanache jwamlume ni ŵampele lina lyakuti Onani. 5 Jwamkongwejo jwaŵelechesoni mwanache jwine jwamlume ni ŵampele lina lyakuti Shela. Mwanacheju ŵapagwile jwalakwe* ali mkutama ku Akisibu.
6 Kaneko Yuda jwapatile jwamkongwe ni kumpa Ele, mwanache jwakwe jwandanda jula. Jwamkongwejo lina lyakwe ŵaliji Tamala. 7 Nambo Ele mwanache jwandanda jwa Yuda jula, ŵatendaga yindu yayaliji yakusakala pameso pa Yehofa. Myoyo Yehofa ŵamwuleje jwalakwe. 8 Payatendekwe yeleyi, Yuda ŵamsalile Onani kuti, “Mgone ni ŵamkwawo achimwene ŵenu kuti mtende ulombela wapachilamu, ni chakulinga chakuti mwaŵelechele ŵanache achimwene ŵenuwo.” 9 Nambo Onani jwayiweni kuti ŵanache ŵachachipagwawo ngasaŵa ŵakwe. Myoyo jwalakwe paŵaliji mkugona ni ŵamkwawo achimwene ŵakwewo, ŵajasilaga ulume wakwe pasi ni chakulinga chakuti akaŵelechela ŵanache achimwene ŵakwewo. 10 Yaŵatesile jwalakweyi yaliji yakusakala pameso pa Yehofa. Myoyo nombenajo ŵamwuleje. 11 Sambano Yuda ŵamsalile Tamala mkwegwawo jula kuti, “Mjawule kunyumba ja baba ŵenu ni mkatameje mpela jwamkongwe jwamasije mpaka mwanache jwangu Shela ali akusile.” Yuda jwaŵechetaga mumtima mwakwe kuti, ‘Mwinesoni Shela mpaka awe mpela achalongo achimjakwe ŵala.’ Myoyo Tamala ŵanyakwiche ni kuja kutamaga kunyumba ja babagwe.
12 Pali papitile ndaŵi, ŵamkwakwe Yuda, mwanache jwamkongwe jwa Suwa jula ŵajasiche. Yuda ŵalisile malilo ga ŵamkwakweŵa. Panyuma pakwe, jwalakwe ŵapite ku Timuna kwa ŵamasengo ŵakwe ŵakusenga ubweya* wa ngondolo. Paulendowu ŵaliji ni Hila jwa ku Adulamu. 13 Kaneko mundu jwine ŵamsalile Tamala kuti, “Akwegwe ŵenu akwawula ku Timuna kukusenga ubweya wa ngondolo.” 14 Pelepo jwalakwe ŵawusile yakuwala yakwe ya umasije ni kuliwunichila chenene nguwo. Soni ŵajigele nguwo jine ni kusisa ngope jakwe. Kaneko jwalakwe ŵapite kuja kutama pachipata cha msinda wa Enaimu chachili mumbali mwa msewu wakwawula ku Timuna. Jwalakwe jwatesile yeleyi ligongo jwayiweni kuti Shela jwaliji ali akusile nambo Yuda ŵaliji mkanaŵe kumpeleka jwalakwe kuti aŵe ŵamkwakwe.
15 Yuda paŵam’weni jwamkongwejo, ndaŵi jijojo ŵaganisisye kuti ali lihule ligongo lyakuti Tamala ŵaliji ali awunichile ngope jakwe. 16 Myoyo Yuda ŵasepuchile pajwaliji jwamkongwejo mumbali mwa msewu mula. Ni ŵamsalile jwalakwejo kuti, “Chonde mungunde kuti ngone ni mmwejo.” Yuda nganamanyililaga kuti jwamkongwejo jwaliji mkwegwe jwakwe jula. Nambope jwamkongwejo jwamwusisye jwalakwejo kuti, “Ni chambe chichi pachagone ni une?” 17 Pelepo Yuda ŵajanjile kuti, “Chinjisapula pa yilango yangu mbusi jamwana ni kumtumichisya.” Nambo jwamkongwejo ŵajanjile kuti, “Sanotu ambe chakuti ngamulile pakwembecheya mbusijo.” 18 Pelepo jwalakwe ŵamwusisye kuti, “Mkusaka kuti nampe chichi?” Jwamkongwejo ni ŵajanjile kuti, “Ambe mbete jawo pampepe ni lukonji lwakwelo soni ndodo jajili mmyala mwawojo.” Jwalakwe ŵampele yinduyo jwamkongwejo, kaneko ŵagonile najo mwamti jwamkongwejo ŵakwete msigo. 19 Panyuma pakwe jwamkongwe jula ŵanyakwiche ni kwawulaga. Ni ŵawusile nguwo jila ni kuwalasoni yakuwala yakwe ya umasije yila.
20 Sambano Yuda ŵajigele mbusi jamwana jila ni kumpela mjakwe jwa ku Adulamu jula, ni chakulinga chakuti akajigale yindu yaŵampele jwamkongwe jula. Nambo mjakwe jula nganamsimana jwamkongwejo. 21 Myoyo jwalakwe ŵawusisye ŵandu ŵaŵaliji pelepo kuti, “Ana lihule* lyalikusatama mumbali mwa msewu ku Enaimu kuno lila lili kwapi?” Nambo jemanjajo ŵajanjile kuti, “Apanotu nganipasimanikweje lihule chitandilile.” 22 Pambesi pakwe, jwalakwe ŵawujile kwa Yuda ni kuja kumsalila kuti, “Jwamkongwe julatu nganinamsimana soni ŵandu ŵa kweleko asasile kuti, ‘Apanotu nganipasimanikweje lihule chitandilile.’” 23 Pelepo Yuda ŵajanjile kuti, “Basi amleche ajigale yinduyo yiŵe yakwe kupali ŵandu kutuseka. Sonitu unejo ndesile mbali jangu ligongo namtumichisye mwanache jwa mbusijo. Yigambile kusawusya kuti mmwejo nganimumsimana jwamkongwejo.”
24 Nambope, pali papitile miyesi jitatu, ŵandu ŵamsalile Yuda kuti, “Tamala, akwegwe ŵenu ŵala atesile uhule mwamti apano akwete msigo ligongo lya uhulewo. Yuda paŵapikene yeleyo ŵatite, “Amkoposye kusa jwelejo, soni amwulaje ni kumjocha.” 25 Ŵandu paŵamkoposyaga kusa, jwamkongwejo jwatumisye utenga kwa akwegwe ŵakwe ŵala wakuti, “Mundu jwambele une msigo ni jwali msyene jwa yindu ayi.” Jwalakwe ŵapitilisye kuŵechetasoni kuti, “Chonde ayilolechesye chenene yindu yeleyi kuti yili ya ŵani, mbetejo, lukonjilo nambosoni ndodojo.” 26 Yuda paŵayilolechesye yinduyo jwatite, “Jwamkongwe jweleju ali jwakulungama mnope kupunda une ligongo une nganinampeleka jwalakwe kwa mwanache jwangu Shela.” Panyuma pa yeleyi, Yuda nganagonasoni ni mkwegwe jwakwejo.
27 Ndaŵi pajakwanile jakuti jwamkongwejo aŵeleche, m’matumbo mwakwe mwaliji ŵanache ŵaŵili ŵamaŵila. 28 Pandaŵi jele jwamkongwejo ŵaliji mkuŵeleka, mwanache jumo jwakopwesye mkono wakwe. Ndaŵi jijojo, jwamkongwe jwakamuchisya pakuŵeleka ŵajigele lukonji lwechejewu ni kutaŵa mkono wa mwanachejo, soni jwaŵechete kuti, “Aju ni jwatandite kopoka.” 29 Nambo mwanachejo paŵagambile kwinjisya mkono wakwe mkati, ndaŵi jijojo mlongo mjakwe ŵakopweche. Pelepo jwamkongwe jwakamuchisya pakuŵeleka jula jwagumisile kuti, “Ligongo chichi mkuliwugulila jika litala chamti myiyi?” Myoyo mwanachejo ŵampele lina lyakuti Pelesi.* 30 Pambesi pakwe, mlongo mjakwe juŵamtaŵile lukonji lwechejewu pamkono jula jwakopweche, ni ŵampele lina lyakuti Sela.