Genesesi
46 Myoyo, Isalayeli ŵajigele yindu yosope yaŵakwete ni kuwutanda ulendo. Paŵayiche ku Beele-seba jwalakwe ŵapeleche mbopesi kwa Mlungu jwa Isaki, babagwe. 2 Kaneko Mlungu ŵaŵechete ni Isalayeli chilo kupitila mu sagamisi. Mlungu ŵamŵilasile jwalakwejo kuti, “Yakobo, Yakobo!” Pelepo jwalakwe ŵajanjile kuti, “Une ndili apano!” 3 Mlungu ŵamsalile jwalakwejo kuti, “Une ndili Mlungu jwakuwona, Mlungu jwa baba ŵenu. Mkajogopa kwawula ku Iguputo ligongo kweleko ni kuchingamtende mmwejo kuŵa mtundu wekulungwa. 4 Une chinjiŵa ni mmwejo pamkwawula ku Iguputo soni une ni juchimjimwusya mmwejo kutyochela kweleko, mwamti Yosefe ni juchachiwunichila meso genu mmwejo pachimchiwa.”
5 Panyuma pakwe, Yakobo ŵanyakwiche ku Beele-seba, mwamti ŵanache ŵa Isalayeli ŵajigele baba ŵawo, Yakobo, soni ŵanache ŵawo ni achiŵamkwawo pa ngolo syele Falawo ŵatumisye kuti sikamjigale Yakobojo. 6 Paulendowu, jemanjaji ŵajigele yilango yawo yosope soni katundu jwawo josope juŵampatile m’chilambo cha Kanani. Myoyo jemanjaji ŵayiche ku Iguputo, Yakobo pampepe ni ŵanache ŵakwe wosope ŵaŵaliji nawo. 7 Yakobo ŵayiche ku Iguputo pampepe ni ŵanache ŵakwe ŵachalume soni yisukulu yakwe yachilume nambosoni ŵanache ŵakwe ŵachakongwe soni yisukulu yakwe yachikongwe. Jwalakwe ŵayiche ni ŵanache ŵakwe wosope.
8 Sambano aga ni mena ga ŵanache ŵa Isalayeli ŵali ŵanache ŵa Yakobo ŵaŵayiche ku Iguputo: Mwanache jwandanda jwa Yakobo jwaliji Lubeni.
9 Ŵanache ŵa Lubeni ŵaliji Hanoki, Palu, Hesiloni soni Kalimi.
10 Ŵanache ŵa Simiyoni ŵaliji Yemuyele, Yamini, Ohadi, Yakini, Sohali, soni Salo juŵaliji mwanache juŵaŵeleche kupitila mwa jwamkongwe jwa ku Kanani.
11 Ŵanache ŵa Lefi ŵaliji Gelisoni, Kohati soni Melali.
12 Ŵanache ŵa Yuda ŵaliji Ele, Onani, Shela, Pelesi soni Sela. Nambope Ele ni Onani ŵawilile m’chilambo cha Kanani.
Ŵanache ŵa Pelesi ŵaŵele Hesiloni soni Hamuli.
13 Ŵanache ŵa Isakala ŵaliji Tola, Pufa, Iyobu soni Similoni.
14 Ŵanache ŵa Sebuloni ŵaliji Selede, Eloni soni Yahaleeli.
15 Ŵeleŵa ali ŵanache ŵachalume ŵele Leya ŵamŵelechele Yakobo ku Padani-alamu pampepe ni mwanache jwamkongwe lina lyakwe Dina. Ŵanache ŵakwe wosope ŵachalume soni ŵachakongwe ŵapali ŵakwana 33.
16 Ŵanache ŵa Gadi ŵaliji Sifiyoni, Hagi, Suni, Esiboni, Eli, Alodi soni Aleli.
17 Ŵanache ŵa Aseli ŵaliji Imuna, Isafa, Isifi, Beliya pampepe ni mchemwali gwawo lina lyakwe Sela.
Ŵanache ŵa Beliya ŵaliji Hebeli ni Malakiyeli.
18 Ŵeleŵa ni ŵaŵaliji ŵanache ŵa Silipa, jwamkongwe jwele Labani ŵampele Leya mwanache jwakwe jwamkongwe. Silipa ŵamŵelechele Yakobo ŵanache ŵeleŵa. Wosope pamo ŵapali ŵakwana 16.
19 Ŵanache ŵa Lakele, ŵamkwakwe Yakobo, ŵaliji Yosefe ni Benjamini.
20 Nombenajo Yosefe jwaŵeleche Manase soni Efulayimu kuchilambo cha Iguputo. Jwaŵeleche ŵanache ŵeleŵa kupitila mwa Asenati juŵaliji mwanache jwamkongwe jwa Potifela jwakutaga mbopesi jwa ku Oni.*
21 Ŵanache ŵa Benjamini ŵaliji Bela, Bekeli, Asibele, Gela, Namani, Ehi, Losi, Mupimu, Hupimu ni Alidi.
22 Ŵeleŵa ni ŵaŵaliji ŵanache ŵele Lakele ŵamŵelechele Yakobo. Wosope pamo ŵapali ŵakwana 14.
23 Mwanache* jwa Dani jwaliji Husimu.
24 Ŵanache ŵa Nafitali ŵaliji Yahaseeli, Guni, Yesa ni Silemu.
25 Ŵeleŵa ŵaliji ŵanache ŵa Biliha, jwamkongwe jwele Labani ŵampele Lakele mwanache jwakwe jwamkongwe. Biliha ŵamŵelechele Yakobo ŵanache ŵeleŵa. Wosope pamo ŵapali ŵakwana 7.
26 Wosope ŵaŵapagwile mwa Yakobo ŵele ŵapite ku Iguputo pampepe ni jwalakwejo ŵapali ŵakwana 66 nambo ngaŵalanjila achiŵamkwawo ŵa ŵanache ŵakwe. 27 Ŵanache ŵele Yosefe ŵaŵeleche ali ku Iguputo ŵapali ŵaŵili. Ŵandu wosope ŵa m’nyumba ja Yakobo ŵaŵayiche ku Iguputo ŵapali ŵakwana 70.
28 Yakobo ŵamtumile Yuda kuti alongolele ni chakulinga chakuti akamsalile Yosefe kuti babagwewo akwika soni ali mwitala akwawula ku Goseni. Jemanjaji paŵayiche m’chilambo cha Goseni 29 Yosefe ŵasalile ŵandu kuti alinganye ligaleta* lyakwe ni ŵanyakwiche kuti akawonegane ni Isalayeli babagwe ŵala ku Goseni. Paŵagambile kwawona babagwewo, ndaŵi jijojo ŵakumbatile soni ŵalisile kwandaŵi jelewu. 30 Kaneko Isalayeli jwamsalile Yosefe kuti, “Sambano ndili jwakoseka kuwa ligongo najiweni ngope jenu soni nayimanyi kuti mli chiŵela umi.”
31 Pelepo Yosefe ŵasalile achalongo achimjakwewo soni ŵandu ŵa m’nyumba ja babagwe kuti, “Angunde kuti njawule kwa Falawo ni ngamsalile jwalakwejo kuti, ‘Achalongo achimjangu soni ŵandu ŵa m’nyumba ja baba ŵangu ŵaŵaliji m’chilambo cha Kanani ayiche akuno kwandili une. 32 Ŵanduwo ali ŵakuchinga soni aŵele ali mkulanga yilango mwamti jemanjaji ayiche nasyo akuno ngondolo soni ng’ombe ni yosope yakwete. 33 Naga Falawo akumŵilanga ni kumwusya kuti ‘Ana mkusakamula masengo gamtuli?’ 34 Pelepo jemanja mkajanje kuti, ‘M’we ŵakutumichila ŵawo tuŵele tuli mkulanga yilango kutyochela tuli ŵanache mpaka apano kutandila m’weji soni achinangolo ŵetu.’ Mkatende yeleyi ni chakulinga chakuti akamkunde kutama m’chilambo cha Goseni, pakuŵa Aiguputo akusaŵengana ni jwalijose jwakulisya ngondolo.”