Genesesi
40 Panyuma pa yeleyi, jwamkulungwa jwakupelechela mgawo jwa mwenye jwa ku Iguputo soni jwamkulungwa jwakuteleka mkate wa mwenye, ŵaleŵele ambuje ŵawo ŵaŵaliji mwenye jwa ku Iguputo. 2 Myoyo Falawo ŵatumbilile mnope ŵamasengo ŵakwe ŵaŵiliwo ŵaŵaliji jwamkulungwa jwakupelechela mgawo ni jwamkulungwa jwakuteleka mkate. 3 Jwalakwe ŵaŵisile jemanjaji mu ndende jajaliji mu nyumba ja jwamkulungwa jwa asilikali ŵakulondela. Mu ndende jeleji ni muŵalijisoni Yosefe mpela mkayidi. 4 Kaneko jwamkulungwa jwa asilikali ŵakulondela, ŵamsagwile Yosefe kuti atameje ni jemanjaji soni kuti ŵaloleleje. Jemanjaji ŵatemi mu ndendemo kwa masiku gejinji.
5 Sambano jwakupelechela mgawo soni jwakuteleka mkate wa mwenye jwa ku Iguputo ŵaŵaliji mu ndende ŵala, chilo chine ŵasagamile. Yaŵasagamile wosopeŵa yakwete ngopolelo syakulekangana. 6 Kundaŵi pakwachele, Yosefe paŵapite kukwalola jemanjaji, ŵasimene kuti ngope syawo syaliji syangasangalala. 7 Myoyo Yosefe ŵawusisye ŵamasengo ŵa Falawo ŵala ŵele ŵaŵisile mu ndende pampepe ni Yosefejo m’nyumba ja abwana ŵakwe ŵala. Ŵawusisye kuti, “Ligongo chichi ngope syenu sikuwoneka syangasangalala lelo?” 8 Pelepo jemanjajo ŵamjanjile kuti, “Wosopewe tusagamile chilochi, nambo pangali jwampaka atugopolele sagamisisyo.” Yosefe ŵasalile jemanjajo kuti, “Ana Mlungu ngaŵa ni jwakusagopolela sagamisi? Mgambe kusalila yamsagamile jemanja.”
9 Myoyo jwamkulungwa jwakupelechela mgawo jula ŵamsalile Yosefe yaŵasagamile. Jwalakwe ŵatite, “Panasagamilagapo nachiweni chitela cha mipeleya chili pasogolo pangu. 10 Chitela cha mipeleyacho chakwete nyambi sitatu soni chitelacho pachaliji mkusipuka chagopwele ni koposya maluŵa, mwamti chasogwele yisogosi yele panyuma pakwe yajiwile. 11 Mmyala mwangu mwaliji mgawo wa Falawo ni najigele mipeleya jila ni kujiminyila mu mgawo wa Falawowo. Panyuma pakwe najigele mgawowo ni kumpa Falawo.” 12 Kaneko Yosefe ŵamsalile jwalakwejo kuti, “Kugopolela kwa sagamisi syenu ni aku: Nyambi sitatu syamwasiwenisyo sikwimila masiku gatatu. 13 Pachigamale masiku gatatu Falawo chamkoposye ni kumwuchisya pa masengo genu, mwamti chimchipelechelaga mgawo kwa Falawo mpela mumwatendelaga munyumamu pamwaliji jwakupelechela mgawo jwakwe. 14 Nambope chimchisosekwa kungumbuchila yindu payimchimjendela chenenepo. Chonde mundosye une chinonyelo changamala soni mkasale ya une kwa Falawo ni chakulinga chakuti angoposye akuno. 15 Unetu ŵatesile kunjiŵa kutyochela ku chilambo cha Ahebeli soni akuno pangali chilichose chandemwisye chakutendekasya kuti mpaka ambiche mu ndende* muno.”
16 Sambano jwamkulungwa jwakuteleka mkate jula paŵayiweni kuti Yosefe agopolele chenene sagamisisyo, nombenajo jwatite, “Unesoni sagamile. Sagamile ndili ndwichile mbeta sitatu sya mikate* jeswela. 17 Mu lupeta lwalwaliji penani mwaliji mwana mikate ja Falawo ja mitundu jakulekanganalekangana, soni yijuni yaliji mkulya mikate jajaliji m’lupeta lwalwaliji penani pa mbeta syanatwichilesyo.” 18 Pelepo Yosefe ŵamjanjile jwalakwejo kuti, “Aku ni kugopolela kwa sagamisi syenu. Mbeta sitatu syamwasiwenisyo sikwimila masiku gatatu. 19 Pachigamale masiku gatatu, Falawo chamkate mtwe mmwejo ni kumkoleka pachitela. Kaneko yijuni yichiyika ni kulyaga mnowu wenu.”
20 Sambano lisiku lyatatu lila lyakwanile. Lisiku lyeleli lyaliji lyakukumbuchila kupagwa kwa Falawo mwamti Falawo ŵalinganyichisye pwando ŵamasengo ŵakwe wosope. Kaneko jwalakwe ŵamkopwesye jwamkulungwa jwakupelechela mgawo jula soni jwamkulungwa jwakuteleka mkate ni kwaŵika pameso pa ŵamasengo ŵakwe wosopewo. 21 Kaneko Falawo ŵamwuchisye jwamkulungwa jwakupelechela mgawo jula pamasengo gakwe gakupelechela mgawo, mwamti jwalakwe ŵapitilisye kupelechela mgawo kwa Falawo. 22 Nambo jwamkulungwa jwakuteleka mkate jula, ŵamkoleche pachitela mpela muŵaŵechetele Yosefe pakugopolela sagamisi sila. 23 Atamose kuti yaŵele myoyo, jwakupelechela mgawo jula nganamkumbuchila Yosefe, ŵagambile kumliŵalila.