Genesesi

42 Sambano Yakobo paŵamanyilile kuti ku Iguputo kwana yakulya, ŵawusisye ŵanache ŵakwe kuti, “Ligongo chichi jemanja mgambile kutama ni kuloleganaga? 2 Jwalakwe ŵapitilisye kuŵecheta kuti, “Unetu mbikene yakuti ku Iguputo kwana yakulya. Myoyo mjawule kweleko kuti mkatusumile yakulya ni chakulinga chakuti tukawa.” 3 Pelepo achalongo achimjakwe ŵa Yosefe ŵakwana 10 ŵapite ku Iguputo kukusuma yakulya. 4 Nambo Yakobo nganakunda kuti Benjamini, juŵaliji mpwakwe jwa Yosefe, alongane ni achalongo achimjakwewo, pakuŵa jwalakwe ŵatite, “Mwinesoni aju mpaka asimane ni ngosi jinejakwe ni kuwa.”

5 Myoyo ŵanache ŵa Isalayeli ŵayiche ku Iguputo pampepe ni ŵandu ŵane ŵaŵayikaga kukusuma yakulya, ligongo salajo jakusile mnope mpaka jayiche m’chilambo cha Kanani. 6 Sambano Yosefe ni juŵaliji mkulolela chilambo cha Iguputo, soni jwalakwe ni juŵasumisyaga yakulya ŵandu wosope ŵa pachilambo chapasi. Myoyo, achalongo achimjakwe ŵa Yosefe ŵayiche ni kumtindiŵalila jwalakwe mpaka ngope syawo pasi. 7 Yosefe paŵagambile kwawona achalongo achimjakwewo, ŵamanyilile ndaŵi jijojo. Nambo jwalakwe jwatesile yakuti jemanjaji akammanyilila. Pelepo jwalakwe ŵatandite kuŵecheta mwaukali ni jemanjajo, ni ŵawusisye kuti, “Ana jemanja mtyochele kwapi?” Pelepo jemanjajo ni ŵajanjile kuti, “Tutyochele ku chilambo cha Kanani, soni tuyiche akuno kukusuma yakulya.”

8 Myoyo Yosefe ŵamanyilile achalongo achimjakwewo, nambo jemanjajo nganammanyilila jwalakwe. 9 Ndaŵi jijojo Yosefe ŵakumbuchile sagamisi syakwe syaŵasagamile pakwamba ya jemanjajo, soni jwalakwe ŵasalile jemanjajo kuti, “Jemanja mli ŵakusonda chilambo. Wele utendewu myiche m’chilambo chetu chino ni chakulinga chakuti mlole malo ganganigakola chiteteyo chakwanila.”* 10 Kaneko jemanjajo ŵajanjile kuti, “Iyayi ambuje ŵangu, m’we ŵakutumichila ŵawo tuyiche akuno kukusuma yakulya. 11 Wosopewe tuli ŵanache ŵa mundu jumo soni tuli ŵandu ŵachilungamo. M’weji ŵakutumichila ŵawo nganituŵa ŵandu ŵakusonda chilambo.” 12 Nambo jwalakwe ŵajanjile jemanjajo kuti, “Yaunami yeleyo. Jemanja myiche akuno kuti mlole malo ganganigakola chiteteyo chakwanila m’chilambo chetuchi.” 13 Pelepo jemanjajo ni ŵajanjile kuti, “M’weji ŵakutumichila ŵawo tupali ŵanache 12. Wosopewe tuli ŵanache ŵa mundu jumo jwakusatama m’chilambo cha Kanani. Mwanache jwakumalisya kupagwa asigele ni baba ŵetu, pele mwanache jwinejo ŵasoŵile.”

14 Pelepo Yosefe ŵajanjile jemanjajo kuti, “Nambotu une mbechete kala kuti ‘Jemanja mli ŵakusonda chilambo.’ 15 Paligongo lyeleli, une chinamlinje jemanja. Ngulumbila pameso pa Falawo kuti jemanja ngamtyoka pamalo agano mpaka ali ayiche mpwenu jwamnandijo. 16 Mumtume mundu jumo pasikati penu kuti akamjigale mpwenujo, nambo ŵane wosopemwe chitumtaŵe kaje. Chitutende yeleyi kuti tulole naga yamkuŵechetayi yili yisyesyene. Nambo naga yili yaunami, nditu ngulumbila pameso pa Falawo, jemanja chimmanyiche kuti mli ŵakusonda chilambochi.” 17 Pelepo Yosefe ŵajigele jemanjajo ni kwasunga mundende kwa masiku gatatu.

18 Palisiku lyatatu Yosefe ŵasalile jemanjajo kuti, “Pakuŵa une ngusamjogopa Mlungu, mtende yachinamsalileyi kuti mtame ni umi. 19 Naga mli ŵachilungamo ngusaka kuti jumo asigale mundendemu, nambo ŵane wosope mjawuleje soni mjigale yakulya kuti mkape ŵamwiŵasa mwenu ŵakulaga ni salawo. 20 Kaneko mkayiche najo mpwenu jwamnandijo akuno ni chakulinga chakuti simichisye kuti yamŵecheteyi yili yisyesyene soni kuti mkawa.” Panyuma pakwe jemanjajo ŵatesile yaŵasalileyo.

21 Sambano jemanjajo ŵatandite kuŵechetana kuti, “M’wejitu tukupochela chilango* ligongo lya yindu yatwamtendele mlongo mjetu jula. Twakuweni kulagasika kwakwe pandaŵi jiŵatuŵendaga kuti tumtendele chanasa, nambo m’weji nganitumpikanila. Ni ligongo lyakwe yosopeyi yikututendechela.” 22 Pelepo Lubeni ŵajanjile achalongo achimjakwewo kuti, “Ana une nganinamsalila jemanja kuti mkamtenda chakusakala chilichose mwanacheju? Nambo jemanja nganimpikanila. Aloletu sambano myasi jakwe jikutukuya m’weji.” 23 Jemanjaji nganamanyililaga kuti Yosefe akupikana yakuŵechetayo, pakuŵa Yosefe ŵaŵechetanaga ni jemanjaji pakamulichisya masengo jwagopolela. 24 Myoyo Yosefe ŵatyosile paŵaliji jemanjajo ni kutanda kulila. Panyuma pakwe jwalakwe ŵawujile kwaŵaliji jemanjajo ni kutanda kuŵechetana nawosoni. Kaneko ŵamkamwile Simiyoni ni kumtaŵa jemanjajo ali mkulola. 25 Yosefe ŵalamwile ŵamasengo ŵakwe kuti ŵaŵichile jemanjajo yakulya m’misaku jawo, soni ŵalamwile kuti jwalijose amwuchisye mbiya syakwe mu msaku wakwe, nambosoni kuti ŵape yakulya yakuti alyeje mwitala. Pelepo ŵamasengowo ŵatesile yaŵalamwileyo.

26 Myoyo jemanjajo ŵanyakwile yakulya yila pa abulu ŵawo ni kuwutanda ulendo. 27 Paŵayiche pamalo gakupumulila, jumo mwa jemanjajo ŵagopwele msaku wakwe kuti ajigale yakulya yakumpa bulu jwakwe. Paŵagambile kugopola msakuwo, ŵasiweni mbiya syakwe sili penani pa yakulya yayaliji mumsakuwo. 28 Pelepo jwalakwe ŵasalile achalongo achimjakwewo kuti, “Alole mbiya syangu ambuchisye, asi syasili mumsaku wangusi.” Paŵapikene yeleyi, jemanjajo mitima jawo jasupwiche, mwamti ŵatandite kutetemela mnope ni kutanda kuwusyana kuti, “Ana Mlungu akusaka kututenda chichi m’weji kusyesyene?”

29 Jemanjaji paŵayiche kwa Yakobo baba ŵawo ŵala ku chilambo cha Kanani, ŵasalile yindu yosope yayatendechele. Ŵasalile kuti, 30 “Mundu jwali jwakulolela chilambocho jwatuŵechetele mwaukali mnope, soni ŵasalaga kuti m’weji tuli ŵakusonda chilambocho. 31 Nambo twamsalile jwalakwejo kuti, ‘M’wejitu tuli ŵandu ŵachilungamo, soni nganituŵa ŵandu ŵakusonda chilambo. 32 Mwiŵasa mwetu tupali ŵanache 12, wosopewe tuli ŵanache ŵa mundu jumo. Mwanache jumo jwasoŵile, nambo mwanache jwakumalisya kupagwa asigele ni baba ŵetu ku chilambo cha Kanani.’ 33 Kaneko jwakulolela jwa chilambocho ŵatusalile kuti, ‘Naga jemanja mli ŵachilungamo mtende ayi: Jumo mwa jemanja asigale ni une, ŵanemwe mjawuleje soni mjigale yakulya kuti mkape ŵamwiŵasa mwenu ŵakulaga ni salawo. 34 Mkayiche najosoni akuno mpwenu jwamnandijo ni chakulinga chakuti ngulupilile kuti jemanja nganimŵa ŵakusonda chilambo, nambo mli ŵandu ŵachilungamo. Kaneko chinjimwuchisya mlongo mjenujo kwa jemanja soni mpaka mtendeje malonda m’chilambo chetuchi.’”

35 Jemanjaji paŵakusulaga misaku jawo, jwalijose ŵasisimene mbiya syakwe mu msaku wakwe. Pelepo jemanjajo pampepe ni baba ŵawowo paŵasiweni mbiyasyo ŵatesile woga. 36 Kaneko Yakobo baba ŵawo ŵala, ŵatandite kuŵecheta mwakudandawula kuti, “Jemanja mundendekasisye une kuŵa mundu jwakuwilwa, Yosefe kwangali, soni Simiyoni kwangali. Nambosoni apa mkuŵecheta kuti mkusaka kumjigala Benjamini. Yindu yosopeyitu yingwile une basi.” 37 Nambo Lubeni ŵajanjile babagwewo kuti, “Naga ngulepela kuwuja najo mwanache jweleju kwa wawojo, ngwasalila kuti chiŵawulaje ŵanache ŵangu ŵaŵili ŵachalume. Chonde ampeleche jwalakwejo mmyala mwangu, mwamti chinjiwuja najosoni kwa wawojo.” 38 Nambope Yakobo ŵajanjile kuti, “Une ngangunda kuti mwanache jwangu ajawule ni jemanja, ligongo mkulugwe jwawile, soni jwalakwejo asigele jika. Myoyo naga jwalakwe akusimana ni ngosi paulendo wenuwo, nditu chimchitendekasya kuti njawule ku Malembe* mu ukalamba wangu ndili jwachanasa.”*