Genesesi
36 Aji jili mbili ja Esawu, juŵamanyikagasoni kuti Edomu.
2 Esawu ŵajigele achakongwe pasikati pa achakongwe ŵa ku Kanani ni kuŵa achiŵamkwakwe. Achakongweŵa ŵaliji Ada, mwanache jwa Eloni Mhiti, soni Oholibama, mwanache jwa Ana juŵaliji chisukulu cha Sibiyoni Mhifi. 3 Ŵalombelesoni Basemati juŵaliji mwanache jwa Isimayeli soni mlumbugwe jwa Nebayoti.
4 Ada ŵamŵelechele Esawu mwanache lina lyakwe Elifasi, soni Basemati ŵaŵeleche Leuwele.
5 Nombenajo Oholibama ŵaŵeleche Yeusi, Yalamu ni Kola.
Ŵeleŵa ni ŵanache ŵa Esawu ŵaŵapagwile kwa jwalakwe m’chilambo cha Kanani. 6 Panyuma pakwe Esawu ŵajigele achiŵamkwakwe, ŵanache ŵakwe ŵachalume, ŵanache ŵakwe ŵachakongwe ni ŵandu wosope ŵa m’nyumba jakwe. Ŵajigelesoni yilango yakwe soni yinyama yakwe yosope nambosoni chipanje chakwe chosope chaŵapatile mu chilambo cha Kanani. Jwalakwe ŵasamile ni kwawula ku chilambo chine, kwakutalikangana mnope ni Yakobo, mpwakwe jula. 7 Ŵasamile ligongo lyakuti katundu jwa jemanjaji jwatupile mnope mwamti yaliji yakusawusya kuti atameje pampepe, soni chilambo chaŵatamaga chaliji changakwanila kwa jemanjaji ligongo yilango yawo yatupile mnope. 8 Myoyo Esawu ŵapite kutama kudela jamatumbi ja Seili. Esawu ŵamanyikagasoni kuti Edomu.
9 Sambano, aji ni mbili ja Esawu juŵaliji nangolo jwa Aedomu ŵaŵatamaga kudela jamatumbi ja Seili.
10 Aga ni mena ga ŵanache ŵa Esawu. Elifasi mwanache jwamlume jwa Ada, ŵamkwakwe ŵa Esawu, soni Leuwele mwanache jwamlume jwa Basemati, ŵamkwakwe ŵa Esawu.
11 Ŵanache ŵa Elifasi ŵaliji Temani, Omali, Sefo, Gatamu soni Kenasi. 12 Timuna jwaŵele jwamkongwe jwaŵili jwa Elifasi, mwanache jwa Esawu. Panyuma pakwe jwalakwe ŵamŵelechele Elifasi mwanache lina lyakwe Amaleki. Ŵeleŵa ni ŵaŵaliji ŵanache ŵa Ada, ŵamkwakwe ŵa Esawu.
13 Ŵanache ŵa Leuwele ŵaliji Nahati, Sela, Samima soni Misa. Ŵeleŵa ni ŵaŵaliji ŵanache ŵa Basemati, ŵamkwakwe ŵa Esawu.
14 Ŵanache ŵele Oholibama ŵamŵelechele Esawu ŵaliji Yeusi, Yalamu ni Kola. Oholibama jweleju jwaliji mwanache jwa Ana soni chisukulu cha Sibiyoni.
15 Papalisoni mamwenye ga mbumba sya ŵanache ŵa Esawu. Mamwenye gakutyochela kwa Elifasi juŵaliji mwanache jwandanda jwa Esawu galiji Mwenye Temani, Mwenye Omali, Mwenye Sefo, Mwenye Kenasi, 16 Mwenye Kola, Mwenye Gatamu soni Mwenye Amaleki. Gelega galiji mamwenye gakutyochela mwa Elifasi m’chilambo cha Edomu. Wosopeŵa ŵaliji ŵanache ŵaŵaŵeleche Ada.
17 Mamwenye gakutyochela mwa Leuwele juŵaliji mwanache jwa Esawu gali aga: Mwenye Nahati, Mwenye Sela, Mwenye Samima soni Mwenye Misa. Ŵeleŵa ŵaliji mamwenye gakutyochela mwa Leuwele m’chilambo cha Edomu. Wosopeŵa ŵaliji ŵanache ŵaŵaŵeleche Basemati, ŵamkwakwe ŵa Esawu.
18 Pakumalisya, aga ni mamwenye gakutyochela mwa Oholibama, ŵamkwakwe ŵa Esawu. Mwenye Yeusi, Mwenye Yalamu soni Mwenye Kola. Gosopega galiji mamwenye gakutyochela mwa Oholibama mwanache jwa Ana juŵalijisoni ŵamkwakwe ŵa Esawu.
19 Ŵeleŵa ni ŵaŵaliji ŵanache ŵa Esawu, soni gelega ni gagaliji mamwenye gawo. Esawu jwamanyikagasoni kuti Edomu.
20 Ŵanache ŵa Seili jwa ku Holi, ŵaŵalijisoni achimsyene ŵa chilambocho, ŵaliji Lotani, Sobali, Sibiyoni, Ana, 21 Disoni, Eseli soni Disani. Ŵeleŵa ni ŵaŵaliji mamwenye ga ŵandu ŵa ku Holi, ŵelesoni ŵaliji ŵanache ŵa Seili m’chilambo cha Edomu.
22 Ŵanache ŵa Lotani ŵaliji Holi soni Hemamu. Lotani ŵakwete mlumbugwe lina lyakwe Timuna.
23 Ŵanache ŵa Sobali ŵaliji Alifani, Manahati, Eba, Sefo soni Onamu.
24 Ŵanache ŵa Sibiyoni ŵaliji Ayiya ni Ana. Ana jweleju ni jwele juŵapatile yisima ya mesi mu chipululu, pandaŵi jiŵalolelaga abulu ŵa Sibiyoni, babagwe.
25 Ŵanache ŵa Ana ŵaliji Disoni soni Oholibama juŵaliji mwanache jwakwe jwamkongwe.
26 Ŵanache ŵa Disoni ŵaliji Hemudani, Esibani, Itilani soni Kelani.
27 Ŵanache ŵa Eseli ŵaliji Bilihani, Saafani soni Ekani.
28 Ŵanache ŵa Disani ŵaliji Usi soni Alani.
29 Mena ga mamwenye ga ŵandu ŵa ku Holi galiji: Mwenye Lotani, Mwenye Sobali, Mwenye Sibiyoni, Mwenye Ana, 30 Mwenye Disoni, Mwenye Eseli soni Mwenye Disani. Gelega ni mamwenye ga ŵandu ŵa ku Holi m’chilambo cha Seili, jwalijose mwakamulana ni umwenye wakwe.
31 Sambano aga ni mamwenye gekulungwakulungwa gele galamulile m’chilambo cha Edomu. Mamwenye gelega galamulile Ayisalayeli* mkanatande kola mamwenye gakwalamulila. 32 Bela, mwanache jwa Beoli, jwalamulile Edomu, soni lina lya msinda wakwe lyaliji Dinihaba. 33 Bela pajwawile, Yobabu mwanache jwa Sela jwakutyochela ku Bosila ŵajinjile mmalo mwakwe ni kutanda kulamulila. 34 Yobabu paŵawile, Husamu jwakutyochela ku chilambo cha ŵandu ŵa ku Temani, ŵajinjile mmalo mwakwe ni kutanda kulamulila. 35 Husamu paŵawile, Hadadi mwanache jwa Bedadi jwele ŵagomeche Amidiyani mudela ja Mowabu, ŵajinjile mmalo mwakwe ni kutanda kulamulila. Soni lina lya msinda wakwe lyaliji Afiti. 36 Hadadi paŵawile, Samula jwakutyochela ku Masileka ŵajinjile mmalo mwakwe ni kutanda kulamulila. 37 Samula paŵawile, Salo jwakutyochela ku Lehoboti chiŵandika lusulo, ŵajinjile mmalo mwakwe ni kutanda kulamulila. 38 Salo paŵawile, Baala-hanani mwanache jwa Akiboli, ŵajinjile mmalo mwakwe ni kutanda kulamulila. 39 Baala-hanani mwanache jwa Akiboli paŵawile, Hadala ŵajinjile mmalo mwakwe ni kutanda kulamulila. Lina lya msinda wakwe lyaliji Pawu, soni lina lya ŵamkwakwe lyaliji Mehetabele, mwanache jwamkongwe jwa Matiledi juŵaliji mwanache jwamkongwe jwa Mesahabu.
40 Myoyo mamwenye gosope gakutyochela mwa Esawu mwakamulana ni maŵasa gawo soni malo gaŵatamaga, mena gawo galiji aga: Mwenye Timuna, Mwenye Alifa, Mwenye Yeteti, 41 Mwenye Oholibama, Mwenye Ela, Mwenye Pinoni, 42 Mwenye Kenasi, Mwenye Temani, Mwenye Mibisala, 43 Mwenye Magidiyele soni Mwenye Ilamu. Gelega ni gagaliji mamwenye ga Edomu mwakamulana ni malo gaŵatamaga soni malo gaŵakwete. Jeleji ni mbili ja Esawu juŵaliji nangolo jwa Aedomu.