Numeli
25 Ayisalayeli paŵaliji mkutama ku Sitimu, ŵatandite kutenda chikululu ni achakongwe ŵa ku Mowabu. 2 Achakongwewo ŵaŵilanjilaga jemanjajo kuti akapelecheje mbopesi kwa milungu jawo, mwamti Ayisalayeliwo ŵatandite kulya mbopesi syakupelechedwa kwa milungu jawojo soni ŵatandite kujitindiŵalila milungujo. 3 Myoyo Ayisalayeliwo, ŵatandite kutindiŵalila nawo* Baala jwa ku Peoli. Ligongo lya yeleyi Yehofa ŵatumbilile mnope Ayisalayeli. 4 Pelepo Yehofa ŵamsalile Mose kuti, “Mwakamule achakulungwakulungwa wosope ŵatendekasisye yeleyi ni mwawulaje. Kaneko mjigale mitembo jawojo ni kujikoleka payitela pameso pa Yehofa musi kuti ŵandu wosope ajiwoneje. Mtende yeleyi kuti Yehofa aleche kwatumbilila Ayisalayeli.” 5 Pelepo Mose ŵasalile ŵakwelusya ŵa Ayisalayeli kuti, “Jwalijose jwa jemanja ŵawulaje ŵandu ŵakwe* ŵatindiŵalile nawo* Baala jwa ku Peoli.”
6 Pandaŵi jijiji pakopochele jwamlume jwine jwa Chiyisalayeli ali ajigele jwamkongwe jwa Chimidiyani ni kwika najo pasikati pa achalongo achimjakwe. Pandaŵiji Mose soni Ayisalayeli wosope ŵaliji ali mkulola. Payatendekwaga yeleyi Ayisalayeli wosope ŵaliji ali mkulila kumlango wa chitenti chakusimanilana. 7 Nambo chisukulu cha jwakutaga mbopesi Aloni jwali Pinihasi mwanache jwa Eliyesala paŵayiweni yeleyi, ndaŵi jijojo ŵanyakwiche pasikati pa ŵanduwo ni kujigala lipanga mmyala mwakwe. 8 Kaneko jwalakwe ŵamkuyisye jwamlume jwa Chiyisalayeli jula mpaka mu tenti jakwe. Paŵayiche mwelemo, jwalakwe ŵasomile ŵaŵiliwo ni lipanga lila. Ŵamsomile jwamlume jwa Chiyisalayeli soni jwamkongwejo, mwamti lipangalyo lyapitile kumalo gakusisika ga jwamkongwejo ni kukopochela pasi. Pelepo mlili wawabuchile pasikati pa Ayisalayeliwo walesile. 9 Ŵandu wosope ŵaŵawile ni mliliwo ŵakwanile 24,000.
10 Kaneko Yehofa ŵamsalile Mose kuti, 11 “Chisukulu cha jwakutaga mbopesi Aloni jwali Pinihasi mwanache jwa Eliyesala atendekasisye kuti ndeche kwatumbilila Ayisalayeli, ligongo jwalakwe nganalechelela ungakulupichika wa ŵandu. Myoyo nganinapyajila Ayisalayeli wosope atamose kuti ngusasaka kuti jemanjajo alipelecheje kwa une jikape basi. 12 Pa ligongo lyeleli, mumsalile jwalakwejo kuti ngutenda chilanga cha mtendele ni jwalakwejo. 13 Ligongo lya chilanga chelechi, jwalakwejo soni yisukulu yakwe yichitumichilaga mpela ŵakutaga mbopesi mpaka kalakala. Yeleyi yili myoyo ligongo jwalakwe nganalechelela kuti ŵandu aŵe ŵangakulupichika kwa Mlungu jwakwe, mwamti asimasisye ulemwa wa Ayisalayeliwo.”
14 Lina lya jwamlume jwa Chiyisalayeli juŵawulajidwe pampepe ni ŵakongwe ŵa Chimidiyani ŵala lyaliji Simili mwanache jwa Salu. Jwalakwe ŵaliji jwamkulungwa juŵajimilaga mbumba* ja Simiyoni. 15 Lina lya jwamkongwe jwa Chimidiyani juŵawulajidwejo, lyaliji Kosibi mwanache jwa Suli. Suli jwaliji jwakulolela kagulu ka maŵasa ku Midiyani.
16 Kaneko Yehofa ŵamsalile Mose kuti, 17 “Mwawulaje Amidiyani, mkasimwatendela chanasa. 18 Mwatende yeleyi jemanjajo ligongo lyakuti ŵayikasisye yipwetesi pa jemanja mwakumnyenjelela mwakalamuka kuti mtande kutindiŵalila Baala jwa ku Peoli. Soni mwatende yeleyi ligongo lya Kosibi jwali mwanache jwa jwakulolela kagulu ka maŵasa ku Midiyani, jwamkongwe jwele juŵawulajidwe palisiku lyawagwilile Ayisalayeli mlili ligongo lyakutindiŵalila Baala jwa ku Peoli.”