Ŵakulamula
14 Kaneko Samusoni ŵapite ku Timuna. Paŵayiche ku Timuna ŵam’weni jwamkongwe jwa Chifilisiti. 2 Jwalakwe paŵawujile kunyumba ŵasalile babagwe ni mamagwe kuti, “Panaliji ku Timuna nam’weni jwamkongwe jwa Chifilisiti. Ni ngusaka kuti jemanja alinganye yakuti namlombe jwalakwejo.” 3 Nambo babagwe ni mamagwewo ŵamjanjile jwalakwejo kuti, “Ana nganiyiŵa yikomboleche kuti mpate jwamkongwe pasikati pa achalongo achimjenu soni pasikati pa mtundu wetu wosope wa Ayisalayeli? Ana pana ligongo lyakuti mmwejo mjawule mkapate jwamkongwe pasikati pa Afilisiti ŵali ŵandu ŵangawumbala?” Nambope Samusoni ŵajanjile babagwewo kuti, “Agambe kwawula akanjigalile jwamkongwejo. Ligongo jwamkongwe jwelejo ni jwali jwakuŵajilwa kwa une.”* 4 Babagwe ni mamagwewo nganamanyililaga kuti juŵatendekasyaga yeleyi ŵaliji Yehofa, pakuŵa ŵasosagasosaga mpata wakuti atande kumenyana ni Afilisiti. Yaliji myoyo ligongo lyakuti Afilisitiwo ŵalamulilaga Ayisalayeli pandaŵi jeleji.
5 Sambano Samusoni ŵanyakwiche pampepe ni babagwe soni mamagwe kwawula ku Timuna. Samusoni paŵayiche mumgunda wa mipeleya ku Timuna, ŵaliweni lisimba lyamachili lili mkwika kwa jwalakwejo kwineku lili mkutongola. 6 Kaneko msimu wa Yehofa wampele jwalakwejo machili, ni ŵalikamwile lisimbalyo ni kulipachulanya, mpela mwampaka atendele mundu pakupachulanya mwanache jwa mbusi ni makono gakwe mwangakamulichisya masengo chida chine chilichose. Nambo jwalakwe nganiŵasalila babagwe kapena mamagwe yindu yaŵatesileyi. 7 Kaneko jwalakwe paŵayiche ku Timuna, ŵaŵechetene ni jwamkongwe jula, mwamti Samusoni ŵasimichisye kuti jwamkongwejo jwaliji jwakuŵajilwa mmeso mwakwe.
8 Ndaŵi jine Samusoni paŵajawulaga kuti akamjigale jwamkongwejo kwawula najo kumangwakwe, ŵasepwiche kuti akalole lisimba lyewe lila. Paŵayiche palyaliji lisimba lyewelyo ŵayiweni kuti mkati mwakwe mwaliji mwana nyuchi soni uchi. 9 Myoyo ŵajigele uchiwo ni kupitaga mchilya. Paŵasimene babagwe soni mamagwe ŵagayile uchiwo kuti alye. Nambo jwalakwe nganiŵasalila achinangolo ŵakwewo kuti ŵajigele uchiwo kutyochela mu lisimba lyewe.
10 Kaneko Samusoni soni babagwe ŵayiche kwa jwamkongwe jula. Paŵayiche kweleko, Samusoni ŵatesile pwando pakuŵa yeleyi ni yaŵatendaga anyamata pakulombela. 11 Ŵandu paŵam’weni jwalakwejo ŵampele achalume ŵakwana 30 kuti aŵe najo. 12 Kaneko Samusoni ŵasalile achalumewo kuti, “Ngusaka namsalile jemanja mwambi.* Naga jemanja mkusalila kagopolele ka mwambi welewu mkanigamale masiku 7 ga pwandoji, chinjimpa jemanja yakuwala yakusa 30 nambosoni yakuwala yine yambone 30. 13 Nambo naga jemanja mkulepela kusalila kagopolele ka mwambiwu chimumbe yakuwala yakusa 30 soni yakuwala yine yambone 30.” Jemanjajo ŵajanjile kuti, “Mtusalile mwambiwo tupikane.” 14 Myoyo jwalakwe ŵasalile jemanjajo kuti:
“Mu chakulya chijakwe mwakopweche yakulya,
Soni chindu chamachili chakopwesye chindu chakulyolyopela. Ana chelechi chili chichi?”
Nambo achalumeŵa ŵalepele kugopolela mwambiwu mpaka pamasile masiku gatatu. 15 Palisiku lyamcheche achalumewo ŵapite kwa ŵamkwawo Samusoni ni kwasalila kuti, “Mwanyenjelele ŵamkwenu kuti amsalile kugopolela kwa mwambiwu, kaneko mmwejo mtusalile m’weji. Naga ngamkutenda yeleyi chitumjoche ni moto mmwejo pampepe ni wosope ŵa m’liŵasa lya baba ŵenu. Ana mwatuŵilasile akuno ni chakulinga chakuti mtusumule yindu yetu?” 16 Myoyo ŵamkwakwe Samusoni ŵatandite kulila pameso pa ŵamkwakwewo ali mkuŵecheta kuti, “Mmwejo mkusimumbenga soni ngamkusamunonyela. Mwasalile mwambi ŵandu ŵa mtundu wangu nambo ngamkusalila une kugopolela kwakwe.” Pelepo Samusoni ŵajanjile ŵamkwakwewo kuti, “Namsalile mmwejo ligongo chichi, pakuŵa baba ŵangu ni mama ŵangu nganinasalila?” 17 Nambo jwamkongwejo ŵapitilisye kumlilila jwalakwejo kwa masiku 7 gosope ga pwandojo. Pambesi pakwe pa lisiku lya 7 jwalakwe ŵasalile ŵamkwakwewo kugopolela kwa mwambiwo. Ŵatesile yeleyi ligongo lyakuti jwamkongwejo ŵaliji mkwakanganichisya ŵamkwakwewo. Kaneko jwamkongwejo ŵapite kukwasalila ŵandu ŵa mtundu wakwe kugopolela kwa mwambiwo. 18 Myoyo pa lisiku lya 7 lyuŵa mkanilikapile,* achalume ŵa mumsindawo ŵapite kwa Samusoni ni kumsalila kuti:
“Ana pana chindu chakulyolyopela mnope kupunda uchi?
Ana pana chindu chamachili mnope kupunda lisimba?”
Pelepo Samusoni ŵajanjile jemanjajo kuti:
“Yikaŵe kuti jemanja nganimwawusya ŵamkwangu,*
Ngamkanimmanyilila kugopolela kwa mwambi wanguwu.”
19 Sambano msimu wa Yehofa wampele jwalakwejo machili ni ŵanyakwiche kwawula kumsinda wa Asikeloni. Kweleko jwalakwe ŵawuleje achalume 30 ni kujigala yakuwala yawo ni kuja kukuyipeleka kwa achalume ŵaŵagopolele mwambi wakwe ŵala. Jwalakwe paŵawujilaga ku nyumba kwa babagwe, ŵaliji ali atumbile.
20 Kaneko ŵamkwakwe Samusoniwo ŵajigalidwe ni jumo mwa achalume ŵaŵaliji nawo ŵala kuti aŵe ŵamkwakwe.