Lute
3 Sambano Naomi, akwegwe ŵakwe Lute ŵala ŵamsalile Lutejo kuti, “Sambano yili yakuŵajilwa kuti namsosele malo gakutama* mmwejo mwanangu, ni chakulinga chakuti yindu yimjendele chenene. 2 Pajatu Bowasi ali jwachibale jwetu sonitu jwalakwe ali msyene jwa asikana ŵamasengo ŵamwaliji nawo ŵala. Chilochi jwalakwe chaŵe ali mkupeta balele pa malo gakuputilapo mbeju. 3 Myoyo, mjoje ni mpakale mawuta gakununjila mnope gala soni m’wale chenene. Kaneko mjawule ku malo gakuputila mbejugo. Mkatende yakuti jwalakwe akaja kumanyilila kuti mmwejo myiche, mpaka ali amalisisye kulya ni kumwa. 4 Jwalakwe pachakagoneje mkalolechesye chenene malo gachakagonego. Kaneko mkajawule pa malo gachakagone jwalakwejo. Soni mkamwunukule kusajo syakwe ni mkagone papopo. Jwalakwe chakamsalile yakuti mtende mwanangu.”
5 Pelepo jwalakwe ŵajanjile kuti, “Chindende yosope yaŵecheteyo.” 6 Myoyo jwalakwe ŵapite ku malo gakuputila mbeju kula ni ŵatesile yosope yaŵamsalile akwegwe ŵakwe ŵala. 7 Sambano Bowasi ŵalile ni kumwa soni jwaliji jwakusangalala mumtima mwakwe. Kaneko jwapite kukugona chakumbesi kwa liwunjili lya balele. Pelepo Lute ŵajesile mwapanandipanandi ni kuja kumwunukula Bowasi kusajo ni ŵagonile. 8 Chapasikati pa chilo, Bowasi ŵatandite kutetemela. Jwalakwe paŵagalawiche, ŵam’weni jwamkongwe ali agonile kusajo syakwe. 9 Myoyo Bowasi ŵamwusisye kuti, “Ana mmwejo ŵani?” Pelepo Lute ŵajanjile kuti, “Ndili une Lute, kapolo jwawo. Chonde andambasukulile chakuliwunichila chawocho, pakuŵa wawojo ali jwakutuwombola.” 10 Pelepo Bowasi ŵamsalile Lute kuti, “Yehofa ampe upile mwanangu. Mlosisye chinonyelo changamala pandaŵi ajino kupunda pandanda pala, ligongo nganimsaka kwawula kwa achalume ŵachinyamata, chinga ŵakulaga kapena ŵakusichila. 11 Sambano mkatenda woga mwanangu. Une chinamtendele yiliyose yamŵecheteyo, ligongo jwalijose mumsindamu akumanyilila kuti mmwejo mli jwamkongwe jwambone. 12 Atamose kuti une ndili jwakwawombola, nambo pana jwakwawombola jwine jwali jwachibale mnope jwa jemanja kupunda une. 13 Mgone panopano, soni naga kundaŵi jwalakwe akumwombola nikuti yili chenene. Chinjikunda kuti jwalakwejo amwombole. Nambo naga jwalakwejo akukana kumwombola, nditu ngusalichisya pameso pa Yehofa Mlungu jwaumi kuti unejo chinamwombole. Mgone panopano mpaka kundaŵi.”
14 Myoyo jwalakwe ŵagonile chakusajo syakwe kula mpaka kundaŵi. Nambo jwalakwe ŵajimwiche kusa mkanikutande kulanguka kuti jwalijose akamwona. Bowasi jwaŵechetesoni kuti, “Jwalijose akamanyilila kuti ku malo gakuputila mbeju kuno kwayiche jwamkongwe.” 15 Bowasi ŵamsalilesoni Lute kuti, “Myiche najo akuno nguwo jim’wetejo, soni mjitandiche pasi.” Myoyo jwalakwe ŵatandiche nguwojo pasi soni Bowasi ŵakusulile milingo 6* ja balele pa nguwojo ni kumtwika jwalakwejo. Kaneko Bowasi ŵanyakwiche ni kwawulaga kunyumba.
16 Pelepo Lute ŵawujile kwa akwegwe ŵakwe ŵala, ni akwegwe ŵakwewo ŵamwusisye kuti, “Yijesile uli mwanangu?” Ni Lute ŵasasile yosope yele Bowasi ŵamtendele jwalakwe. 17 Jwalakwe ŵasalile akwegwe ŵakwewo kuti, “Ambelesoni milingo 6 ja balele aji ni kusalila kuti, ‘Mkawujila kwa akwegwe ŵenu yalayalape.’” 18 Pelepo Naomi jwaŵechete kuti, “Mtame apa mwanangu. Mlindilile mpaka mli mmanyilile mwachijimalile nganiji. Pakuŵa jwalakwejo ngatama pasi lelo, mpaka ali amalene najo ngani jeleji.”