Ŵakulamula

16 Ndaŵi jine Samusoni ŵapite ku Gasa. Paŵayiche kweleko ŵaliweni lihule mwamti jwalakwe ŵajinjile m’nyumba mwa lihulelyo. 2 Ŵandu ŵa ku Gasa ŵapikene kuti Samusoni juyiche mumsindamo. Myoyo jemanjajo ŵamsyungulile ni kumjuŵilila jwalakwejo chilo chosope ku geti ja msindawo. Jemanjajo ŵagambile kutama jii chilo chosope ali mkuliŵechetela achimsyene m’mitima mwawo kuti, “Kwamba kuchamo chitum’wulaje jwalakwejo basi.”

3 Nambope Samusoni ŵagonile kweleko mpaka sikati ja chilo. Kaneko jwalakwe ŵajimwiche sikati ja chilojo ni kuja kukamula matanga ga geti ja msindawo soni njalamila syakwe siŵili. Pelepo jwalakwe ŵachuŵile getijo pampepe ni loko jakwe soni njalamila syakwesyo. Ŵanyakwile yosopeyi pamakoyo gakwe ni kwawula nayo penani pa litumbi mwakulolegana ni Hebuloni.

4 Pali papite ndaŵi jwalakwe ŵatandite kumnonyela jwamkongwe jwine juŵatamaga m’Chiŵata* cha Soleki. Jwamkongweju lina lyakwe lyaliji Delila. 5 Sambano ŵakulamulila ŵa Chifilisiti ŵayiche kwa jwamkongwejo ni kumsalila kuti, “Mumnyenjelele Samusoni kuti mmanyilile kwagakusatyochela machili gakwe gekulungwago soni yampaka tutende kuti tumgomeche ni kumtaŵa soni kummasya machili gakwe. Naga mkutenda yeleyi jwalijose jwetuwe chachimpa mmwejo mbiya sya silifa syakwana 1,100.”

6 Kaneko Delila ŵapite kukumnyenjelela Samusoni kuti, “Chonde musalile kwakukusatyochela machili genu gekulugwaga, soni ana mpaka amtaŵe ni chichi kuti amgomeche?” 7 Pelepo Samusoni ŵamjanjile jwamkongwejo kuti, “Naga ali andaŵile ni ngonji syasambano 7 syakunjila ukunje syasili syeŵisi, machili gangu mpaka gamale nikuŵa mpela mundu jwine jwalijose.” 8 Myoyo ŵakulamulila ŵa Chifilisitiwo ŵampele jwalakwejo ngonji 7 syasambano syakunjila ukunje, syasyaliji syeŵisi. Kaneko jwamkongwejo ŵajigele ngonjisyo nikumtaŵila Samusoni. 9 Sambano ŵandu ŵaliji ali amjuŵilile jwalakwejo m’chipinda chine cha jwamkongwejo. Kaneko jwamkongwejo ŵamŵilasile jwalakwejo kuti, “Samusoni, Afilisiti ayiche!” Pelepo jwalakwe ŵakutulenye ngonji sila mwangasawusya mpela mwampaka ukutuchile ulusi* ni moto, mwamti ŵanduwo nganamanyilila kugatyochelaga machili gakwe.

10 Kaneko Delila ŵamsalile Samusoni kuti, “Mlole mmwe mulambwisye mwakusalila yaunami. Sambano chonde musalile chindu champaka akamulichisye masengo pakumtaŵa mmwejo.” 11 Myoyo Samusoni ŵamjanjile jwalakwejo kuti, “Naga ali andaŵile une ni ngonji syasambano syanganisikamuleje masengo, chinjiŵa jwangali machili ni kuŵa mpela mundu jwine jwalijose.” 12 Pelepo Delila ŵajigele ngonji syasambano ni kumtaŵa Samumsoni ni ngonjisyo. Kaneko ŵamŵilasile jwalakwejo kuti, “Samusoni, Afilisiti ayiche!” Pandaŵiji ŵandu ŵala ŵaliji ali amjuŵililepe m’chipinda chine cha jwamkongwejo. Pelepo Samusoni ŵakutulenye ngonji syaŵamtaŵile m’makonosyo mpela akukutulanya ulusi.

13 Kaneko Delila ŵamsalile Samusoni kuti, “Mpaka apano mkwamba kulambusyape mwakusalila yaunami. Musalile chindu champaka akamulichisye masengo pakumtaŵa mmwejo.” Myoyo jwalakwe ŵamsalile jwamkongwejo kuti, “Naga mkuluka mangongo 7 ga mumtwe wanguga pakamulichisya masengo ulusi wakuluchila yakuwala, machili gangu mpaka gamale.” 14 Myoyo jwalakwe ŵaluchile mangongogo ni kugalimbisya mwakugataŵilila ku chichili.* Kaneko ŵamŵilasile Samusoni kuti, “Samusoni, Afilisiti ayiche!” Pelepo jwalakwe ŵajimwiche paŵagonile pala, kaneko chichili chila chachuŵiche nambosoni umbo syakwe syaswekwiche mu ulusi waŵamluchile wula.

15 Pelepo jwamkongwejo ŵaŵechete kuti, “Ligongo chichi mkusaŵecheta kuti mkusamunonyela chitamilecho mtima wenu nganuŵa pa une? Keleka kali katatu sambano mli mkulambusya soni ngamkusalila kwagakusatyochela machili genu gekulungwaga.” 16 Samusoni ŵayikene pakupela nayo ligongo lisiku lililyose jwamkongwejo ŵamlagasyaga soni kumkanganichisya. 17 Myoyo pambesi pakwe jwalakwe ŵamsalile jwamkongwejo chilichose. Jwalakwe ŵatite, “Umbo syangu nganisenjeje chitandilile ligongo ndili Mnasili jwa Mlungu kutandila pakupagwa kwangu. Naga akusenga umbo syangusi machili gangu mpaka gatyoche mwa une ni kuŵa mpela mwaŵelele ŵane wosope.”

18 Delila ali ayiweni kuti Samusoni amsalile chilichose, ndaŵi jijojo jwalakwe ŵaŵilasile ŵakulamulila ŵa Chifilisiti ŵala ni kwasalila kuti, “Mpaka ayiche sambano ligongo jwalakwe asalile chilichose.” Myoyo ŵakulamulila ŵa Chifilisiti ŵala ŵayiche kwa jwamkongwejo ni ŵampele mbiya. 19 Delila ŵamnyenjelele Samusoni kuti agone lugono pangongolo syakwe. Kaneko jwalakwe ŵamŵilasile mundu jwine ni kumsenga Samusoni mangongo 7 ga mumtwe wakwe gala. Pambesi pakwe jwamkongwejo ŵatandite kukola machili pa Samusoni ligongo machili gakwe gamasile. 20 Kaneko Delila ŵamŵilasile Samusoni kuti, “Samusoni, Afilisiti ayiche!” Pelepo jwalakwe ŵajimwiche paŵagonile pala ni ŵaliŵechetele jika kuti, “Mpela mwangusatendela ndaŵi syosope chinalikulupule ni kukopoka pasa.” Nambope jwalakwe nganamanyililaga kuti Yehofa ŵaliji ali amlesile. 21 Myoyo Afilisiti ŵamkamwile jwalakwe ni kumkolotola meso. Kaneko ŵamjigele jwalakwe ni kumjawusya ku Gasa ali amtaŵile ni cheni chachisyano cha kopa. Paŵayiche kweleko ŵamŵisile kuŵa jwakusyaga mbeju mundende. 22 Nambo umbo syaŵamsenjile mumtwe mwakwe sila syatandite kumelasoni.

23 Ŵakulamulila ŵa Chifilisiti ŵasongene pampepe kuti apeleche mbopesi syejinji kwa mlungu jwawo Dagoni soni kuti atende chisangalalo ligongo jemanjajo ŵatiga, “Mlungu jwetu ampeleche Samusoni mdani jwetu mmyala mwetu.” 24 Ŵandu paŵam’weni Samusoni ŵatandite kumchimbichisya mlungu jwawo ali mkuŵecheta kuti, “Mlungu jwetu ampeleche mmyala mwetu mdani jwetu. Mundu jweleju ajonasile chilambo chetu soni awuleje ŵandu ŵajinji ŵa mtundu wetu.”

25 Ligongo lyakuti jemanjaji ŵaliji mkusangalala mnope, ŵatite, “Amŵilanje Samusoni ayiche akuno ni tumsecheje.” Myoyo jemanjajo ŵamkopwesye Samusoni mundende mula kuti akaŵe chakwasekasya chawo, mwamti ŵamjimiche jwalakwejo pasikati pa yipilala yiŵili. 26 Kaneko Samusoni ŵamsalile mnyamata juŵamkamulaga pamkono pakumlongolela kuti, “Mungamuchisye kuti ngamule yipilala ya nyumbaji. Ngusaka njegamile yipilalayo.” 27 Pandaŵiji m’nyumbamo mwaliji muli mugumbele achalume ni achakongwe. Ŵakulongolela ŵa Chifilisiti wosope ŵaliji mwelemo. Nambosoni chakumsakasa kwa nyumbaji kwapali achalume ni achakongwe chiŵandika 3,000. Jemanjaji ŵamlolelaga Samusoni paŵatendaga yindu mpela chakwasekasya chawo.

28 Sambano Samusoni ŵamŵendile Yehofa kuti, “Wawo Yehofa, Ambuje Ŵakulungwa Mnope, angumbuchile. Wawo Mlungu, ambe machili chonde pandaŵi ajinopeji. Angunde nawuchisye Afilisitiŵa atamose pa liso limopeli mwa meso gaŵili gaŵangolotwelega.”

29 Sambano Samusoni ŵajimi mwakulimbangana pakatikati pa yipilala yiŵili ya nyumbajo. Kaneko ŵayikamwile yipilalayo. Chipilala chimo ŵachikamwile ni mkono wamlyo soni chipilala chinecho ŵachikamwile ni mkono wamchiji ni ŵayitutile. 30 Pelepo Samusoni ŵagumisile kuti, “Angunde kuti mbwe pampepe ni Afiisitiŵa!” Jwalakwe ŵayitutile yipilalayo ni machili gakwe gosope, mwamti nyumbajo jagwilile ŵakulamulila ŵa Chifilisiti nambosoni ŵandu wosope ŵaŵaliji mwelemo. Myoyo jwalakwe ŵawuleje ŵandu ŵajinji pa chiwa chakwe kupundana ni ŵandu ŵaŵawuleje paŵaliji umi.

31 Kaneko achalongo achimjakwe pampepe ni ŵandu wosope ŵa m’liŵasa lya babagwe ŵayiche kuti ajigale mtembo wakwe ni kwawula nawo kumangwawo. Paŵayiche nawo mtembowo, ŵawusichile m’malembe ga Manowa babagwe, gagaliji pasikati pa msinda wa Sola ni msinda wa Esitaoli. Samusoni ŵaŵele jwakwelusya jwa Ayisalayeli kwa yaka 20.