Ŵakulamula
17 Sambano papali mundu jwine juŵatamaga ku dela jamatumbi ja Efulayimu. Mundujo lina lyakwe lyaliji Mika. 2 Lisiku line jwalakwe ŵasalile mamagwe kuti, “Ana akukumbuchila mbiya syawo sya silifa syakwana 1,100 syasyasoŵile sila? Wawojo ŵamtembelele mundu juŵajigele mbiyasyo une ndili mkupikana. Mbiyasyotu sili ni une. Unejo ni jwanajigele.” Mamagwewo paŵapikene yeleyi ŵatite, “Yehofa ampe upile mwanangu.” 3 Myoyo jwalakwe ŵajigele mbiya sya silifa sila syakwana 1,100 ni kwawuchisya mamagwe. Nambo mamagwewo ŵamsalile jwalakwejo kuti, “Une nditu ngandepela kupeleka mbiya sya silifasi kwa Yehofa. Ngusaka kuti mmwejo mkamulichisye masengo mbiyasi pakupanganya chiwanichisyo chakusepa soni chiwanichisyo chagumba chachisyano kuti yiŵe yenu. Myoyo mbiya sya silifasi chisiŵe syenu.”
4 Mika paŵawuchisye mamagwe mbiya sya silifa sila, mamagwewo ŵajigele mbiya syakwana 200 ni kuja kusipeleka kwa mundu jwakupanganya yindu pakamulichisya masengo silifa. Mundujo ŵapanganyisye chiwanichisyo chakusepa soni chiwanichisyo chagumba chachisyano. Yiwanichisyo yeleyi ŵapite kuja kuyiŵika m’nyumba ja Mika. 5 Mika ŵakwete nyumba muŵaŵisile milungu jiŵajitindiŵalilaga. Jwalakwe ŵapanganyisye chakuwala cha efodi soni atelafi.* Nambosoni ŵamŵisile mwanache jwakwe jwamlume kuti atumichileje mpela jwakutaga mbopesi jwakwe. 6 Mundaŵi jelejo mu Isalayeli mwaliji mwangali mwenye. Mundu jwalijose ŵagambaga kutenda yindu yaŵayiwonaga kuŵa yakuŵajilwa mmeso mwakwe.*
7 Sambano papali jwamlume jwine jwa m’liŵasa lya mbumba* ja Yuda juŵatamaga ku Betelehemu jwa ku Yuda. Jwalakwe ŵaliji jwakutyochela mu mbumba ja Lefi, soni ŵatemi kweleko kwakandaŵi nditu. 8 Munduju ŵasamile mu msinda wa Betelehemu jwa ku Yuda ni kupita mchisosasosa malo gane gakutama. Paŵaliji paulendo wakwewu jwalakwe ŵayiche ku dela jamatumbi ja Efulayimu ku nyumba ja Mika. 9 Pelepo Mika ŵamwusisye mundujo kuti, “Ana mkutyochela kwapi?” Jwalakwe ŵajanjile kuti, “Une ndili Mlefi soni ndyochele ku Betelehemu jwa ku Yuda. Pelepa ndili paulendo wakusosasosa malo gakutama.” 10 Myoyo Mika ŵamsalile jwalakwejo kuti, “Mtameje ni une. Ngusaka mŵe jwakungamuchisya lunda* soni mtumichileje mpela jwakutaga mbopesi jwangu. Une chinampeje mbiya syakwana 10 sya silifa pachaka soni yakuwala ya jwakutaga mbopesi ni yakulya.” Pelepo Mlefijo ŵajinjile m’nyumba. 11 Myoyo Mlefi jula ŵajitichisye yakuti atameje ni Mika. Soni jwalakwe ŵaŵele mpela jumo mwa ŵanache ŵakwe. 12 Konjechesya pelepa, Mika ŵamŵisile Mlefijo kuti atumichileje mpela jwakutaga mbopesi jwakwe, mwamti jwalakwe ŵatamaga m’nyumba ja Mika. 13 Pelepo Mika ŵatite, “Sambano nguyiwona kuti Yehofa chandendeleje yambone, pakuŵa namŵisile Mlefi kuti aŵe jwakutaga mbopesi jwangu.”