Ŵakulamula

18 Mundaŵi jelejo mu Isalayeli mwaliji mwangali mwenye. Nambosoni mundaŵi jelejo ŵandu ŵa mu mbumba* ja Dani ŵaliji mkusosasosa malo gakuti atameje, ligongo lyakuti ŵaliji mkanajigale malo gawo gaŵapele mpela chipanje chawo pasikati pa mbumba sya Isalayeli.

2 Sambano ŵandu ŵa mu mbumba ja Dani ŵatumile achalume msano kutyochela mu mbumba jawoji kuti ajawule akasosesose chilambo chakuti atameje nambosoni kuti akachisonde chilambocho. Jemanjaji ŵaliji achalume ŵakudalilichika ŵakutyochela mu msinda wa Sola soni msinda wa Esitaoli. Ŵanduwo ŵasalile achalumewo kuti, “Ajawule akatusosele chilambo chakuti tutameje.” Myoyo jemanjaji paŵayiche kunyumba ja Mika jijaliji mudela ja matumbi ja Efulayimu, ŵagonile kweleko. 3 Paŵaliji chiŵandika nyumba ja Mika jemanjaji ŵapikene maloŵe, ni ŵagamanyilile kuti gali maloŵe ga Mlefi jula.* Myoyo ŵapite kwa jwalakwejo ni kumwusya kuti, “Ana ŵamŵilasile ŵani kuti msimanikwe akuno? Ligongo chichi mwayiche akuno, soni ana mkutenda chichi?” 4 Jwalakwejo ŵajanjile jemanjajo kuti, “Pana yindu yatulangene unejo ni Mika, mwamti jwalakwejo anembile une masengo kuti namtumichileje mpela jwakutaga mbopesi jwakwe.” 5 Sambano achalumewo ŵamsalile jwalakwejo kuti, “Chonde mtuŵendele kwa Mlungu kuti tumanyilile naga chitujende chenene paulendo wetuwu.” 6 Jwakutaga mbopesijo ŵasalile jemanjajo kuti, “Akadandawula chilichose. Yehofa ali ni jemanja paulendo wawowu.”

7 Myoyo achalume msanowo ŵapitilisye ulendo wawo, ni ŵayiche mu msinda wa Layisi. Paŵayiche kweleko, ŵayiweni kuti ŵandu ŵakwe ŵatamaga mwamtendele mwangamdalila jwine jwalijose kuti ŵakamuchisyeje mpela muŵatamilaga Asidoni. M’chilambomo mwaliji mwangali ngondo soni ŵanduwo nganajogopaga yakuti ŵane mpaka ŵajimuchile. Paliji pangalisoni mundu jwalijose jwangasa juŵachijimuchilaga chilambo chawocho ni kusokonasyaga mtendele wawo. Ŵanduŵa ŵatamaga kwakutalikangana ni Asidoni nambosoni nganakola mkamulano uliwose ni ŵandu ŵane.

8 Achalume ŵala paŵawujile kwa achalongo achimjawo ku msinda wa Sola soni wa Esitaoli, achalongo achimjawowo ŵawusisye jemanjajo kuti, “Ana ajesile uli?” 9 Jemanjajo ŵajanjile kuti, “Tuchipatile chilambo chambone kwabasi. Kwende tukamenyane ngondo ni ŵandu ŵa kweleko. Kwende tutende yindu mwachitema, tukajigale chilambocho kuti chiŵe chetu. 10 Pachitukayiche chakayiwone kuti ŵandu ŵakwe akusagamba kutama mwangajogopa kuti ŵane mpaka ŵajimuchile nambosoni chakayiwone kuti chilambo chawocho chili chekulungwa. Mlungu achipeleche chilambocho mmyala mwetu, soni m’chilambomotu mwana chilichose champaka mundu achisache.”

11 Pelepo achalume ŵakwana 600 ŵakutyochela mu mbumba ja Dani ŵaŵakosechele kuti akapute ngondo ŵanyakwiche mu msinda wa Sola soni msinda wa Esitaoli. 12 Paŵanyakwiche kweleko, ŵapite kuja kukunga matenti gawo mwakuŵandikana ni msinda wa Kiliyati-yelimu ku Yuda. Lyeleli ni ligongo lyakwe malo gelega, gagali kungapililolyuŵa kwa msinda wa Kiliyati-yelimu, gakusamanyika ni lina lyakuti Mahane-dani* mpaka lelo. 13 Kaneko jemanjaji ŵanyakwiche kweleko ni kwawula ku dela ja matumbi ja Efulayimu, ni ŵayiche kunyumba ja Mika.

14 Sambano achalume msano ŵala ŵaŵapite kukusonda msinda wa Layisi ŵasalile achalongo achimjawowo kuti, “Ana akumanyilila kuti m’nyumba asi mwana chakuwala cha efodi, atelafi,* chiwanichisyo chakusepa nambosoni chiwanichisyo chagumba chachisyano? Aganisye yampaka tutende pelepa.” 15 Myoyo ŵandu wosopewo ŵajimi ku geti jakwinjilila ku nyumbasyo. Kaneko achalume msano ŵala ŵapite kunyumba ja Mlefi jula kuti akamkomasye. Nyumba jakweji jaliji mwakuŵandikana ni nyumba ja Mika. 16 Pandaŵi josope jeneji achalume 600 ŵa mu mbumba ja Dani ŵala ŵaŵakosechele kuti akapute ngondo ŵaliji mkwalindilila ku geti kulakula. 17 Sambano achalume msano ŵaŵapite kukusonda chilambo ŵala ŵajinjile m’nyumba ja Mika kuti ajigale chiwanichisyo chakusepa, chakuwala cha efodi, atelafi* soni chiwanichisyo chagumba chachisyano. Pandaŵiji jwakutaga mbopesi jula ŵaliji ali amlesile ku geti kula yimpepe ni achalume 600 ŵaŵakoseche kuja kuputa ngondo ŵala. 18 Myoyo jemanjajo ŵajinjile m’nyumba ja Mika ni kujigala chiwanichisyo chakusepa, chakuwala cha efodi, atelafi* soni chiwanichisyo chagumba chachisyano. Pelepo jwakutaga mbopesi jula ŵawusisye jemanjajo kuti, “Ana akutenda chichi?” 19 Nambo jemanjajo ŵamjanjile jwalakwejo kuti, “Mjile jii, soni mwugale pakamwa penupo. Tukusaka mmwejo mkaŵe mundu jwakutukamuchisya lunda* soni mkatumicheleje mpela jwakutaga mbopesi jwetu. Ana chambone ni chapi champaka msagule mmwejo pasikati pa kuŵa jwakutaga mbopesi ku liŵasa lya mundu jumo, kapena kuŵa jwakutaga mbopesi jwa mbumba josope jakola maŵasa gejinji?” 20 Yeleyi yamkamwile mtima jwakutaga mbopesijo. Myoyo jwalakwe ŵajigele chakuwala cha efodi chila, atelafi* nambosoni chiwanichisyo chakusepa chila, ni ŵalongene nawo jemanjajo.

21 Kaneko ŵanduwo ŵawutandite ulendo wawo ali ŵaŵisile pasogolo ŵanache, yilango nambosoni yindu yine ya mtengo wapenani. 22 Ŵandu ŵa mu mbumba ja Daniwo paŵajesile kalutando nditu kutyochela pa nyumba ja Mika, ŵandu ŵaŵatamaga m’majumba gakuŵandikana ni Mika ŵaŵilangene pampepe ni kutanda kwakuya jemanjajo. Pambesi pakwe ŵaweni pakutalichila nditu ŵandu ŵa mu mbumba ja Dani ŵala. 23 Kaneko paŵagumilile ŵandu ŵa mu mbumba ja Daniwo, jemanjajo ŵagalawiche ni ŵamwusisye Mika kuti, “Ana chisawisye chichi? Ligongo chichi mjigalene ŵajinji myoyo?” 24 Pelepo jwalakwe ŵajanjile kuti, “Jemanja mjigele milungu jangu jinapanganyisye, soni mumjigele jwakutaga mbopesi jwangu, mwamti pangali chilichose chamundechele. Sambano ni mkumbusya kuti, ‘Chisawisye chichi?’” 25 Ŵandu ŵa mu mbumba ja Daniwo ŵamjanjile jwalakwejo kuti, “Mmwe, mkaŵecheta mwakutukalipila! Naga mkupitilisya, pana apano achalume ŵangakaŵa kupya mtima, champute. Soni mbesi jakwe mpaka amwulaje mmwejo ni wosope ŵa m’nyumba jenu.” 26 Myoyo ŵandu ŵa mu mbumba ja Daniwo ŵapitilisye ulendo wawo. Nambo Mika pakuyiwona kuti jemanjajo ŵaliji ŵamachili kumpunda jwalakwejo, ŵagalawiche ni kuwujilaga kumangwakwe.

27 Jemanjaji paŵajigele yindu yaŵapanganyisye Mika pampepe ni jwakutaga mbopesi jwakwe, ŵapite ku msinda wa Layisi kwele ŵandu ŵakwe ŵatamaga mwamtendele, soni mwangajogopa kuti ŵane mpaka ŵajimuchile. Paŵayiche kweleko ŵawuleje ŵandu wosope ni upanga.* Kaneko ŵawujochiche moto msindawo. 28 Paliji pangali jwalijose jwakwakulupusya jemanjaji pakuŵa ŵaliji kwakutalikangana ni kuŵatamaga Asidoni nambosoni nganakola mkamulano uliwose ni ŵandu ŵane. Msinda wawowu waliji mu chiŵata* cha ku Beti-lehobu. Kaneko ŵandu ŵa mu mbumba ja Dani ŵala ŵawutaŵilesoni msindawo ni kutamaga mwelemo. 29 Konjechesya pelepa, msindawo ŵawupele lina lyakuti Dani pakujigalila lina lya baba ŵawo ŵaŵaliji mwanache jwa Isalayeli. Nambo msindawo pandanda wamanyikaga ni lina lyakuti Layisi. 30 Pambesi pakwe, ŵandu ŵa mu mbumba ja Dani ŵala ŵajigele chiwanichisyo chakusepa chila ni kuchijimika kuti achitindiŵalileje. Kaneko Yonatani mwanache jwa Gelisomu juŵaliji mwanache jwa Mose, ŵaŵele jwakutaga mbopesi jwawo pampepe ni ŵanache ŵakwe ŵachalume, mpaka pandaŵi jele ŵandu ŵa m’chilambocho ŵajigalidwe kwawula ku chilambo chine mpela achikapolo. 31 Jemanjaji ŵapitilisye kuchitindiŵalila chiwanichisyo chakusepa chiŵapanganyisye Mika chila pandaŵi josope jele chitenti cha Mlungu jwakuwona chaliji ku Silo.