Buku Jaŵili ja Samuyele
1 Panyuma pa chiwa cha Sauli, Daudi ali awusile kukwagomeka Aamaleki, jwalakwe jwatemi ku Sikilagi kwa masiku gaŵili. 2 Palisiku lyatatu mundu jwine jwayiche kutyochela ku matenti ga Sauli. Munduju jwayiche ali apapwile yakuwala yakwe soni mumtwe mwakwe muli mwana mataka. Jwalakwe paŵayiche kwaŵaliji Daudijo ŵatindiŵele ni kwinama kaneko ŵagonile mwakulola pasi.
3 Daudi ŵamwusisye mundujo kuti, “Ana mkutyochela kwapi?” Mundujo ni ŵajanjile kuti, “Ndisile ku matenti ga Ayisalayeli.” 4 Daudi ŵamwusisyesoni mundujo kuti, “Ana kweleko chitendekwe chichi? Chonde musalile.” Pelepo mundujo ŵajanjile kuti, “Ŵandu atisile ku ngondo soni ŵandu ŵajinji awile, mwamti nombenajo Sauli ni mwanache jwakwe Yonatani awile.” 5 Kaneko Daudi ŵamwusisye mnyamata juŵayiche ni utengajo kuti, “Mmwejo mmanyilile uli kuti Sauli ni mwanache jwakwe Yonatani awile?” 6 Pelepo mnyamatajo ni ŵajanjile kuti, “Yagambile kutendekwa kuti unejo naliji ku Litumbi lya Gilibowa, soni ndili kweleko nam’weni Sauli ali ajegamile lipanga lyakwe. Nambosoni nagaweni magaleta* soni achalume ali akwesile mahachi ali mkwika paŵaliji jwalakwe. 7 Jwalakwe paŵagalawiche ni kumbona une, ŵambilasile, ni une najanjile kuti, ‘Une ndili apano.’ 8 Kaneko jwalakwe ŵambusisye kuti, ‘Ana mmwejo mli ŵani?’ Une ni najanjile kuti, ‘Ndili jwa mtundu wa Aamaleki.’ 9 Pelepo ni ŵasalile kuti, ‘Chonde myiche pandili unepa ni mumbulaje, pakuŵa ngupikana kupweteka mnope nambo ndili chiŵela umi.’ 10 Myoyo najawile paŵaliji jwalakwe ni namwuleje. Pakuŵa namanyililaga kuti ngalama ligongo ŵaliji ali awulele mnope. Kaneko najigele chisoti chaumwenye chachaliji mumtwe mwakwe soni chibangili chachaliji pamkono pakwe. Mwamti yichenayo yinduyi akuno kwa wawojo ambuje ŵangu.”
11 Pelepo Daudi ŵakamwile yakuwala yakwe ni kuyipapula, yeleyi ni yaŵatesilesoni achalume ŵaŵaliji ni jwalakwe. 12 Jemanjaji ŵalisile mnope soni nganalya yakulya mpaka ligulo. Ligongo ŵamlililaga Sauli, Yonatani juŵaliji mwanache jwa Saulijo, ŵandu ŵa Yehofa, nambosoni ŵandu ŵa m’nyumba ja Isalayeli. Pakuŵa jemanjajo ŵaliji ali awile ni upanga.*
13 Daudi ŵamwusisye mnyamata juŵayiche ni utenga jula kuti, “Ana mmwejo kumangwenu kwapi?” Mundujo ni ŵajanjile kuti, “Une ndili mwanache jwa mlendo jwine jwa mtundu wa Aamaleki.” 14 Kaneko Daudi ni ŵamwusisye mundujo kuti, “Ligongo chichi mmwejo nganimtenda woga kunyakula mkono wenu ni kumwulaga jwamsagulwe jwa Yehofa?” 15 Pelepo Daudi ŵamŵilasile mnyamata jwine ni ŵamsalile kuti, “Myiche mumwulaje munduju.” Pelepo jwalakwe ŵayiche ni kumwulaga mundujo. 16 Munduju mkanawe Daudi ŵamsalile kuti, “Magambo ga myasi jenu gaŵe pamtwe penu.” Ligongo mmwejo mŵechete jika ni pakamwa penu kuti, ‘Namwuleje jwamsagulwe jwa Yehofa.’”
17 Kaneko Daudi jwajimbile nyimbo jakudandawula* pakwamba ya Sauli soni mwanache jwakwe Yonatani. 18 Soni jwalakwe jwasasile kuti ŵandu ŵa ku Yuda alijiganye nyimboji, jakolanjidwa kuti “Ukunje.” Nyimboji ŵajilembile m’buku ja yasala.
19 “Mmwe Isalayeli, ŵandu ŵenu ŵakuchimbichika awile mmalo genu gakwela.
Elo ŵandu ŵamachili agwile.
20 Mkaja kusala yeleyi ku Gati,
Mkaja kuyigombelesya yeleyi m’misewu ja ku Asikeloni,
Nimkaŵa ŵanache ŵachakongwe ŵa Afilisiti kusangalala,
Nimkaŵa ŵanache ŵachakongwe ŵa achalume ŵangawumbala kusechelela.
21 Jemanja matumbi ga ku Gilibowa,
Mangame soni wula yikagwila pa jemanja,
Nombenajo migunda jenu jikakoposya yakupeleka yakwawula kwa Mlungu,
Ligongo kweleko chakuchijila cha ŵandu ŵamachili ŵachisakesye,
Chakuchijila cha Sauli ngakuchitagasoni mawuta.
22 Ukunje ŵa Yonatani soni upanga wa Sauli,
Yapakalaga myasi ja adani ŵawo soni yasomaga mawuta ga ŵandu ŵakuputa ngondo,
Jemanjaji nganalepelaga.
23 Sauli ni Yonatani paŵaliji umi, ŵaliji ŵakunonyeledwa ni ŵandu soni ŵakusangalasya,
Soni pachiwa chawo jemanjaji nganalekangana.
Jemanjaji ŵaliji ŵakuwutuka kujipunda ngwasi,
Ŵaliji ŵamachili kugapunda masimba.
24 Jemanja ŵanache ŵachakongwe ŵa ku Isalayeli, amlilile Sauli,
Juŵam’wechiche jemanja yakuwala yechejewu soni yakusalala,
Juŵaŵisilesoni yakusalalisya yagolide pa yakuwala yenu.
25 Ŵandu ŵamachili agwile ku ngondo,
Yonatani awile m’malo genu gakwela.
26 Ngudandawula ya mmwejo mlongo mjangu Yonatani,
Mwaliji jwakunonyelwa mnope kwa une.
Chinonyelo chenu kwa une chaliji chekulungwa kupunda chinonyelo cha achakongwe.
27 Ŵandu ŵamachili agwile
Soni yida yangondo yijonasiche.”