Buku Jandanda ja Samuyele

27 Nambope Daudi jwatandite kuliŵechetela mumtima mwakwe kuti, “Lisiku line Sauli chachimbulaga nditu. Chindu chambone champaka ndende chili kutilila ku chilambo cha Afilisiti. Naga ngutenda yeleyi Sauli chachileka kusosasosa une m’madela gosope ga Ayisalayeli. Pelepo nikuti chinjikulupuka mmyala mwakwe.” 2 Myoyo Daudi ŵanyakwiche pampepe ni achalume ŵaŵaliji ni jwalakwe ŵakwana 600 ni kwawula kwa Akisi mwenye jwa ku Gati juŵaliji mwanache jwa Mawoki. 3 Daudi yimpepe ni achalume ŵaŵaliji ni jwalakwe ŵatemi ni Akisi ku Gati. Jwamlume jwalijose ŵaliji ni liŵasa lyakwe. Pandaŵiji Daudi ŵaliji yimpepe ni achiŵamkwakwe ŵaŵili ŵala, Ahinowamu jwa ku Yeseleeli soni Abigayeli jwa ku Kalimeli juŵaliji ŵamkwakwe Nabala mkanaŵe kuwa. 4 Sauli paŵapochele utenga wakuti Daudi atilile ku Gati jwalakwe ŵalesile kumsosasosa.

5 Kaneko Daudi ŵamsalile Akisi kuti, “Naga wawojo asalalile une mtima, chonde ambe malo mu msinda umo pa misinda jawo jamwanamwanaji kuti ndameje. Nganiyiŵa yiŵele chenene kuti jwakutumichila jwawo atameje yimpepe ni wawojo mumsinda wakuchimbichika.” 6 Myoyo Akisi ŵampele jwalakwejo msinda wa Sikilagi palisiku lyelelyo, mwamti ni ligongo lyakwe msinda wa Sikilagi uli wa mamwenye ga ku Yuda mpaka lelojino.

7 Ulewu ŵa ndaŵi jele Daudi ŵatemi mu msinda wamwana wa Afilisiti waliji chaka chimo ni myesi mcheche. 8 Daudi pampepe ni achalume ŵakwe ŵajawulaga kukwajimuchila Agesuli, Agilisi, soni Aamaleki, pakuŵa jemanjaji ŵaliji mkutama malo gakutyochela ku Telamu mpaka kuja kwika ku Suli soni mpaka kuja kwika ku chilambo cha Iguputo. 9 Daudi pagajimuchile madela gelega, jwalakwe nganamlekaga jwamlume kapena jwamkongwe jwalijose ni umi. Jwalakwe ŵajigalaga ngondolo, ng’ombe, abulu, ngamila soni yakuwala. Panyuma pakwe jwalakwe ŵawujilaga kwa Akisi. 10 Kaneko Akisi ŵawusyaga kuti, “Ana lelo mwapite kukujijimuchila dela jakwapi?” Daudi ni ŵajangaga kuti, “Napite kukujijimuchila dela ja kummwela kwa Yuda” kapena “Napite kukujijimuchila dela ja kummwela jakutama Ayelamele” kapenasoni “Napite kukujijimuchila dela ja kummwela jakutama Akeni.” 11 Daudi nganamlekaga jwamlume kapena jwamkongwe jwalijose ni umi. Jwalakwe jwatendaga yeleyi ni chakulinga chakuti jemanjajo akajawula ku Gati. Pakuŵa jwalakwe ŵaŵechetaga kuti, “Mwine jemanjaji mpaka akasalile ŵandu ŵane yakwamba m’weji kuti, ‘Daudi atesile yamtiyamti.’” (Yeleyi ni yaŵatendaga jwalakwe ndaŵi josope jaŵatemi mu msinda wamwana wa Afilisiti.) 12 Myoyo Akisi ŵamkulupilile Daudi soni ŵaŵechetaga mumtima mwakwe kuti, ‘Nditu jweleju aŵele chindu chakununga pasikati pa ŵandu ŵakwe Ayisalayeli, mwamti jwalakweju chachiŵa jwakutumichila jwangu kwandaŵi syosope.’