Buku Jandanda ja Mbili

4 Ŵanache ŵachalume ŵa Yuda ŵaliji Pelesi, Hesiloni, Kalimi, Hula, soni Sobali. 2 Leyaya mwanache jwamlume jwa Sobali ŵaŵeleche Yahati. Yahati ŵaŵeleche Ahumayi soni Lahadi. Gelega ni gagaliji maŵasa ga Asolati. 3 Babagwe* Etamu, ŵanache ŵakwe ŵachalume ŵaliji aŵa: Yeseleeli, Isima, soni Idibasi. Ŵanache ŵeleŵa alumbuŵawo lina lyawo lyaliji Haseleponi. 4 Penueli ŵaliji babagwe Gedoli, soni Eseli ŵaliji babagwe Husa. Ŵeleŵa ŵaliji ŵanache ŵachalume ŵa Hula. Jwalakweju ŵaliji mwanache jwandanda kupagwa jwa Efulata, soni ŵaliji babagwe Betelehemu. 5 Asahali babagwe Tekowa ŵakwete achakongwe ŵaŵili, Hela ni Naala. 6 Asahali ni ŵamkwakwe Naala ŵaŵeleche ŵanache aŵa: Ahusamu, Hefa, Temeni, ni Hahasitali. Ŵeleŵa ni ŵaŵaliji ŵanache ŵachalume ŵa Naala. 7 Ŵanache ŵachalume ŵa Hela ŵaliji Seleti, Isala, ni Etani. 8 Kosa ŵaŵeleche Anubi, soni Sobeba. Kosa ŵalijisoni nangolo jwa maŵasa ga Ahahelo mwanache jwa Halumu.

9 Yabesi ŵaliji jwakuchimbichika mnope kupunda achalongo achimjakwe. Mamagwe ŵampele jwalakwe lina lyakuti Yabesi* ligongo ŵatite, “Napikanaga kupweteka panamŵelekaga jwalakweju.” 10 Yabesi ŵaŵilasile pa Mlungu jwa Isalayeli kuti, “Wawo Mlungu, ambe upile une soni akusye dela jangu. Nambosoni akunde kuti mkono wawo uŵe pa une, soni angulupusye ku yakusawusya. Atende yeleyi ni chakulinga chakuti ngasimana ni chine chilichose champaka chinjonanje.” Myoyo Mlungu ŵamtendele jwalakwe yaŵaŵendileyo.

11 Kelubu mkulugwe Suha ŵaŵeleche Mehili ŵaŵaliji babagwe Esitoni. 12 Esitoni ŵaŵeleche Beti-lafa, Paseya, soni Tehina ŵaŵaliji babagwe Ili-nahasi. Achalume ŵeleŵa ŵaliji ŵa ku Leka. 13 Ŵanache ŵachalume ŵa Kenasi ŵaliji Otiniyele, soni Seleya. Mwanache jwamlume* jwa Otiniyele ŵaliji Hatati. 14 Mewonotayi ŵaŵeleche Ofula. Seleya ŵaŵeleche Yowabu juŵaliji babagwe jwa ŵandu ŵaŵatamaga ku Ge-halasimu.* Maloga ŵagapele linali ligongo kweleko kwatamaga ŵandu ŵaŵapanganyaga yindu ni makono mwalunda.

15 Kalebe mwanache jwa Yefune ŵanache ŵakwe ŵachalume ŵaliji aŵa: Ilu, Ela, soni Namu. Mwanache jwamlume* jwa Ela ŵaliji Kenasi. 16 Ŵanache ŵachalume ŵa Yehalele ŵaliji Sifi, Sifa, Tiliya, soni Asaleli. 17 Ŵanache ŵachalume ŵa Esila ŵaliji Yeteli, Meledi, Efeli, soni Yaloni. Jumo mwa achiŵamkwawo* ŵa Meledi ŵaŵeleche Miliyamu, Samayi, soni Isiba ŵaŵaliji babagwe Esitemowa. 18 Ŵeleŵa ni ŵaŵaliji ŵanache ŵachalume ŵa Bitiya ŵamkwawo Meledi. Bitiya ŵaliji mwanache jwamkongwe jwa Falawo. Nambosoni ŵamkwawo ŵane ŵa Meledi ŵaŵaliji ŵa Chiyuda ŵaŵeleche ŵanache aŵa: Yeledi juŵaliji babagwe Gedoli, Hebeli juŵaliji babagwe Soko, soni Yekutiyele juŵaliji babagwe Sanowa.

19 Ŵanache ŵachalume ŵa ŵamkwawo Hodiya ŵaliji achibabagwe ŵa Keyila jwa ku Galimiti, soni Esitemowa jwa ku Maakati. Alumbuŵawo Hodiya ŵaliji Nahamu. 20 Ŵanache ŵachalume ŵa Simona ŵaliji Aminoni, Lina, Beni-hanani, soni Tiloni. Ŵanache ŵachalume ŵa Isi ŵaliji Soheti soni Beni-soheti.

21 Shela mwanache jwa Yuda, ŵanache ŵakwe ŵachalume ŵaliji Ele babagwe Leka, soni Lada babagwe Malesa. Shela ŵalijisoni nangolo jwa ŵandu ŵa m’nyumba ja Asibeya. Ŵandu ŵeleŵa masengo gawo galiji gakupanganya nguwo syambone. 22 Shela ŵalijisoni nangolo jwa Yokimu, achalume ŵa ku Koseba, Yowasi, Salafi juŵalombele achakongwe ŵa Chimowabu, soni Yasubi-lehemu. Yakulemba yeleyi yatyochele pa mbili jakalakala.* 23 Ŵane mwa achalume ŵeleŵa ŵaliji ŵagumba yiŵiga ŵaŵatamaga ku Netayimu soni ku Gedela. Jemanjaji ŵatamaga kweleko ni kwakamulilaga masengo mwenye.

24 Ŵanache ŵachalume ŵa Simiyoni ŵaliji Nemuyele, Yamini, Yalibu, Sela, soni Salo. 25 Salo ŵaŵeleche Salumu. Salumu ŵaŵeleche Mibisamu. Mibisamu ŵaŵeleche Misima. 26 Misima ŵaŵeleche Hamuyele. Hamuyele ŵaŵeleche Sakuli, soni Sakuli ŵaŵeleche Simeyi. 27 Simeyi ŵakwete ŵanache ŵachalume 16 soni ŵanache ŵachakongwe 6. Nambo achalongo achimjakwe nganakola ŵanache ŵajinji ŵachalume. Pangali atamose liŵasa limo lya achalongo achimjakwewo lyalyakwete ŵanache ŵajinji mpela mwayaŵelele ni achalume ŵa mu mbumba* ja Yuda. 28 Jemanjaji ŵatamaga ku Beele-seba, Molada, Hasala-suwali, 29 Biliha, Esemu, Toladi, 30 Betuwelo, Holima, Sikilagi, 31 Beti-makaboti, Hasala-susimu, Beti-bili, soni ku Saalaimu. Jeleji ni jajaliji misinda jawo mpaka pandaŵi jiŵatandite kulamulila mwenye Daudi.

32 Jemanjaji ŵatamagasoni ku Etamu, Aini, Limoni, Tokeni, soni ku Asani. Josope pampepe jaliji misinda msano. 33 Ŵatamaga m’misinda jeleji soni m’malo gosope gakusyungulila misindaji mpaka kuja kwika ku Baala. Gelega ni mena gawo gaŵagalembile pakujigalila maŵasa ga achinangolo ŵawo soni malo gaŵatamaga. 34 Yisukulu yine ya Simiyoni yaliji ayi: Mesobabu, Yamuleki, Yosa mwanache jwa Amasiya, 35 Yoweli, soni Yehu mwanache jwa Yosibiya. Yosibiya ŵaliji mwanache jwa Seleya, soni Seleya ŵaliji mwanache jwa Asiyele. 36 Yisukulu yinesoni ya Simiyoni yaliji Eliyoyenayi, Yakoba, Yesohaya, Asayiya, Adiyele, Yesimiyele, Benaya, 37 soni Sisa mwanache jwa Sifayi. Sifayi ŵaliji mwanache jwa Aloni. Aloni ŵaliji mwanache jwa Yedaya. Yedaya ŵaliji mwanache jwa Simuli, soni Simuli ŵaliji mwanache jwa Semaya. 38 Wosope ŵatwasasile menaŵa ŵaliji achalume ŵakulongolela m’maŵasa gawo, soni maŵasa gakumanyika ni mena ga achinangolo ŵawo gakulilagakulilaga. 39 Jemanjaji ŵapite kukusosasosa malo gakulichisya yilango yawo chakungopokolyuŵa kwa chitiŵi, chiŵandika ni ku Gedoli. 40 Pambesi pakwe ŵapatile chilambo chachakwete mopo wejinji wambone kulichisya yilango. Chilambocho chaliji chekulungwa soni cha bata ni mtendele. Ŵandu ŵaŵatamaga kweleko pandanda ŵaliji yisukulu ya Hamu. 41 Ŵandu ŵatwasasile menaŵa ŵayiche ni konanga matenti ga yisukulu ya Hamu soni matenti ga Ameunimu ŵaŵatamaga kweleko. Yeleyi yatendekwe mundaŵi ja mwenye Hesekiya jwa ku Yuda. Ŵandu ŵeleŵa ŵapyajisile, mwamti ngakusimanikwasoni mpaka lelo. Kaneko jemanjajo ŵatamilichiche pamalo ga ŵandu ŵeleŵa ligongo kweleko kwaliji malo gejinji gambone kulichisya yilango yawo.

42 Achalume ŵane ŵa mu mbumba ja Simiyoni ŵakwana 500 ŵapite ku Litumbi lya Seili. Jemanjaji ŵapite kweleko mwakulongoleledwa ni Pelatiya, Neyaliya, Lefaya, soni Usiyele ŵaŵaliji ŵanache ŵa Isi. 43 Jemanjaji ŵapite kweleko kukwawulaga Aamaleki wosope ŵakusigala ŵaŵatisile. Panyuma pakwe ŵatandite kutama kweleko mwamti ali kukoko mpaka lelo.