Masalimo
Kwa jwakulongolela nyimbo. Ajimbe nyimboji pakuya kajimbe ka Gititi.* Nyimbo ja Asafu.
81 Mumjimbile Mlungu mwakusangalala pakuŵa jwalakwejo ali machili getu.
Mgumile mwakusangalala pameso pa Mlungu jwa Yakobo.
2 Mtande kwimba nyimbo ni kagoma,
Chida cha ngonji chakulila chenene pampepe ni chida chine changonji.
3 Mlisye lipenga lyamsengo pawuwoneche mwesi,
Elo, pawuwoneche mwesi wamtundu pakuŵa lyeleli lili lisiku lya chisangalalo chetu.
4 Lyeleli lili lilamusi lyakuti Ayisalayeli alikuyeje,
Lyaŵalamwile Mlungu jwa Yakobo.
5 Jwalakwe ŵatamilikasisye lilamusi lyeleli kuti liŵe mpela chakumkumbusya Yosefe.
Jwalakwe ŵatesile yeleyi paŵapite kuja kulimbana ni chilambo cha Iguputo.
Une napikene maloŵe* nambo nganinagamanyililaga. Maloŵe gakwe galiji gakuti:
6 “Namtusile jwalakwejo katundu jwakusitopa pa makoyo gakwe.
Makono gakwe gapumwile kunyakula lukalala.*
7 Pamwaliji pa yipwetesi mwambilasile mwamti namkulupwisye.
Namjanjile kutyochela m’liwunde lyakulindima.*
Namlinjile pa mesi ga ku Meliba.* (Selah)
8 Mumbikane jemanja ŵandu ŵangu pangupeleka umboni wakusisyana namwe.
Mmwe Isalayeli, une ngasangalele mli mumbikanile.
9 Pasikati penu ngasipapagwa mlungu jwachilendo,
Soni ngasimumtindiŵalila mlungu jwachilendo.
10 Une Yehofa ni jwandili Mlungu jwenu,
Jwanamkopwesye mmwejo m’chilambo cha Iguputo.
M’wugule mnope pakamwa penu kuti namlisye mpaka kwikuta.
11 Nambo ŵandu ŵangu nganapikanila maloŵe gangu.
Isalayeli nganalipeleka kwa une.
12 Myoyo nalesile jemanjajo kuti ajikuye mitima jawo jamakanijo.
Jemanjajo ŵatesile yindu yaŵayiwonaga mpela yakuŵajilwa.*
13 Yikaliji chenene ŵandu akambikanile une.
Yikaliji chenene Isalayeli akajende m’matala gangu.
14 Pelepo une ngagomeche mwachitemachitema adani* ŵawo.
Ngajimuchile adani ŵawo ni mkono wangu.
15 Wosope ŵakusaŵengana ni Yehofa chachiyika pameso pakwe ali mkutetemela.
Soni chachiŵa pa yipwetesi mpaka kalakala.
16 Nambo jwalakwe chachimlisya mmwejo* tiligu jwambone,
Soni chachimjikutisya ni uchi wakutyochela mulwala.”