Masalimo
Kwa jwakulongolela nyimbo. Nyimbo ja Daudi.
41 Jwakusangalala ali mundu jwakusamganichisya mundu jwakunyoseka.
Yehofa chachimkulupusya jwalakwejo palisiku lyachachisimana ni yipwetesi.
2 Yehofa chachimchenjela mundu jwelejo soni chachimsunga ni umi.
Jwalakwe chachikolanjidwa kuti ali mundu jwakusangalala pachilambo chapasi.
Wawojo ngasampeleka jwalakwejo kwa adani* ŵakwe kuti amtende yakusaka.
3 Yehofa chachimsamalila jwalakwejo pandaŵi jali pa bedi* jakwe ligongo lya kulwala.
Wawojo chachimkamuchisya pandaŵi josope jali pa bedi jakwejo.
4 Une natite, “Wawo Yehofa, andendele chanasa.
Ambosye, pakuŵa nalemwechesye wawojo.”
5 Nambo adani ŵangu akuŵecheta yachabe yakwamba une.
Jemanjajo akuŵecheta kuti, “Ana jweleju chawe chakachi kuti lina lyakwe likapikanikasoni?”
6 Jumo mwa jemanjajo payiche kukundola, akusaŵecheta yaunami kutyochela mumtima mwakwe.
Jwalakwe akusasonganganya ngani syakwamba ulwele wangu kuti akasiŵecheteje kwine.
Kaneko patyosile akusajendaga ni kuwandisyaga nganisyo.
7 Ŵandu wosope ŵakusaŵengana ni une akuŵechetana mwakusongona yakwamba une.
Akupangana yakuti andendele yindu yachabe. Akuŵecheta kuti:
8 “Yipwetesi yimkunjile jwalakwejo.
Ligongo lyakuti apano ali chigonele, jwalakwejo ngasajimukasoni.”
9 Atamose mundu jwanaliji najo pamtendele, mundu jwele jwanamdalilaga,
Mundu jwanalyaga najo yimpepe mkate* wangu, anyakwile chindende chakwe kuti alimbane ni une.*
10 Nambo wawo Yehofa, andendele chanasa soni ambosye,
Kuti nawuchisye jemanjajo.
11 Une chinjimanyilila kuti wawojo akusangalala ni une
Naga wawojo ngasakunda kuti adani ŵangu asangalale ligongo lya yakusawusya yangu.
12 Nambo pakwamba ya une, wawojo akungamuchisya ligongo lya kukulupichika kwangu.
Wawojo chachingunda kuti ndame pameso pawo mpaka kalakala.
13 Achimbichikwe Yehofa, Mlungu jwa Isalayeli,
Jwalakwejo achimbichikwe mpaka kalakala.
Ame! Ame!