Masalimo

8 Wawo Yehofa Ambuje ŵetu, lina lyawo lili lyekulungwa mnope pachilambo chosope chapasi.

Uchimbichimbi wawo awukwesisye mnope kupunda kwinani.*

 2 Wawojo atendekasisye pakamwa pa ŵanache soni makandi kuti palosye machili.

Alosisye machili ligongo lya adani* ŵawo,

Kuti adani ŵawowo soni ŵakuwuchisya akakola chiyawo chilichose.

 3 Pangukuwona kwinani, masengo ga yala yawo,

Mwesi soni ndondwa syaŵapanganyisye,

 4 Ngusaganisya kuti ana mundu ali ŵani kuti wawojo amkumbuchileje,

Soni mwanache jwa mundu ali ŵani kuti wawojo amsamalileje?

 5 Wawojo ŵamtulwisye jwalakwejo panandi pakulandanya ni malayika,*

Nambosoni wawojo ŵam’wechiche jwalakwejo ulemu ni uchimbichimbi.

 6 Wawojo ŵampele jwalakwejo ulamusi pa masengo ga makono gawo

Ŵaŵisile chilichose pasi pa sajo* syakwe:

 7 Chinga ngondolo, mbusi soni ng’ombe,

Pampepe ni yinyama yosope yamwitinji.

 8 Chinga yijuni yamwinani soni somba sya m’nyasa,

Chinga chilichose chachikusajenda m’nyasa.