Ekisodo
20 Kaneko Mlungu ŵaŵechete maloŵe aga gakuti:
2 “Une ndili Yehofa Mlungu jwenu junamkopwesye jemanja m’chilambo cha Iguputo, kumtyosya m’nyumba ja ukapolo. 3 Ngamkusosekwa kukola milungu jine akaŵe unepe basi.
4 “Mkasimlipanganyichisya chiwanichisyo chakusepa kapena kupanganya chindu chakulandana ni chilichose chachili kwinani kapena pachilambo chapasi kapenasoni m’mesi ga pachilambo chapasi. 5 Ngamkusosekwa kuyitindiŵalila yeleyo kapena kuyitumichila, pakuŵa une, Yehofa Mlungu jwenu, ndili Mlungu jwangusasaka kuti mundu andumichileje une jika ni mtima wosope. Une ngusakunda kuti ŵanache, yisukulu soni ŵanache ŵa yisukuluyo asimane ni yakusawusya yakwika ligongo lya ulemwa wa achinangolo ŵakusaŵengana ni une. 6 Nambo ngusalosya chinonyelo changamala ku mibado* masausande gejinji ga ŵandu ŵakusanonyela une soni kusunga malamusi gangu.
7 “Mkakamulichisyaga masengo lina lya Yehofa Mlungu jwenu mwangaŵajilwa, pakuŵa Yehofa ngasamlechelela ngampa chilango* mundu jwalijose jwakukamulichisya masengo lina lyakwe mwangaŵajilwa.
8 “Mlikumbuchileje lisiku lya Sabata soni mliwoneje kuŵa lyapajika. 9 Mkamuleje masengo genu gosope kwa masiku 6. 10 Nambo lisiku lya 7 lili lisiku lya Sabata lya Yehofa Mlungu jwenu. Ngamkusosekwa kukamula masengo palisikuli, chinga jemanja, chinga mwanache jwenu jwamlume, chinga mwanache jwenu jwamkongwe, chinga kapolo jwenu jwamlume kapena kapolo jwenu jwamkongwe, chinga chilango chenu kapena mlendo jwamkutama najo mumsinda wenu. 11 Pakuŵa kwa masiku 6 Yehofa ŵapanganyisye kwinani, chilambo chapasi, nyasa soni yosope yayili mwelemo, mwamti jwalakwe ŵatandite kupumula palisiku lya 7. Ni ligongo lyakwe Yehofa ŵalipele upile lisiku lya Sabata ni kulitenda kuŵa lyapajika.
12 “Mwachimbichisyeje baba ni mama ŵenu ni chakulinga chakuti mtame ni umi kwandaŵi jelewu m’chilambo chele Yehofa Mlungu jwenu akumpa jemanja.
13 “Mkawulaga mundu.
14 “Mkatenda chikululu.
15 “Mkajiŵa.
16 “Mkapeleka umboni waunami pakwamba ya mjenu.
17 “Mkakumbila mwakulemwecheka nyumba ja mjenu. Mkakumbila ŵakongwe ŵa mjenu mwakulemwecheka kapena kumkumbila kapolo jwakwe jwamlume, kapolo jwakwe jwamkongwe, ng’ombe jakwe, bulu jwakwe, kapena chilichose chakwete mjenu.”
18 Sambano ŵandu wosopewo ŵapikene kulindima soni kusiwona njasi. Ŵapikenesoni kulila kwa lipenga nambosoni ŵaliweni litumbi lili mkukopoka lyosi. Ŵanduwo paŵayiweni yeleyi ŵatetemele soni ŵajimi pakutalichila. 19 Pelepo ŵanduwo ŵamsalile Mose kuti, “Mmwejo ni ŵachimŵechetaneje ni m’weji, mwamti chitupikaneje. Nambo Mlungu akaŵecheta ni m’weji ligongo tukogopa kuti chituwe.” 20 Myoyo Mose ŵasalile ŵanduwo kuti, “Mkatenda woga, pakuŵa Mlungu jwakuwona ayiche kukumlinga jemanja ni chakulinga chakuti jemanja mpitilisye kumjogopa jwalakwe soni kuti mkalemwa.” 21 Pelepo ŵanduwo ŵajimipe pakutalichila nambo Mose ŵaliŵandichile liwunde lyepiliwu kwaŵaliji Mlungu jwakuwona.
22 Kaneko Yehofa ŵamsalile Mose kuti, “Ayisalayeli mkasalile kuti, ‘Jemanja myiweni mwachimsyene kuti une mbechete ni jemanja kutyochela kwinani. 23 Ngamkusosekwa kupanganya milungu jasilifa kuti mjitumichileje pampepe ni une, soni mkalipanganyichisya milungu jagolide. 24 Mumbanganyichisye malo gakupelechela mbopesi gakutaŵa ni litaka, soni mpelecheje pelepo mbopesi jenu jakutinisya, mbopesi jenu ja mkamulano,* ngondolo syenu soni ng’ombe syenu. Pamalo galigose gachinjitendekasya kuti alikumbuchile lina lyangu, une chinjiyika kwa jemanja soni chinjimpa upile. 25 Naga mkumbanganyichisya malo gakupelechela mbopesi gakutaŵila ni maganga, mkataŵaga malogo pakamulichisya masengo maganga gakusepa ni yida yakusepela. Ligongo naga mkutenda yeleyo, yichiŵa kuti mgasakesye malogo. 26 Nambosoni malo gangu gakupelechela mbopesigo ngamkusosekwa kuŵika masitepe kutendela kuti pakukwela, umakonope wenu mpaka uwonechele.’