Chiwunukuko Chakwawula kwa Yohane
12 Kaneko kwawoneche chimanyisyo chekulungwa kwinani. Kwawoneche jwamkongwe ali awete lyuŵa, soni kusajo kwakwe kwaliji mwesi. Kumtwe kwakwe ŵawete chisoti chakola ndondwa 12. 2 Jwamkongwejo ŵakwete msigo, soni ŵaliji mkulila ligongo lyakupikana kupweteka kwa pakuŵeleka.
3 Kwawonechesoni chimanyisyo chine kwinani. Kwawoneche chingwena chechejewu mpela moto cha mitwe 7 ni misengo 10. Kumitwe jakwejo chawete yisoti yaumwenye yakwana 7. 4 Mchila wakwe wakokosile mbali jimo mwa mbali sitatu sya ndondwa syakwinani ni kusigwichisya pachilambo chapasi. Chingwenacho chagambile kwima pasogolo pa jwamkongwe juŵasigele panandi kuŵeleka jula, ni chakulinga chakuti pachagambe kuŵeleka chimlye mwanachejo.
5 Jwamkongwe jula ŵaŵeleche mwanache jwamlume jwele chachijilamulila mitundu josope ja ŵandu ni ndodo jachisyano. Kaneko mwachitemachitema ŵamjigele mwanachejo ni kwawula najo kwa Mlungu jwatemi pampando wakwe waumwenye. 6 Pelepo jwamkongwejo ŵatilile ku chipululu, kwele Mlungu ŵamlinganyichisye malo soni kwele chakamlisyeje kwa masiku 1,260.
7 Kaneko kwinani kwatandite ngondo. Mikayeli* ni malayika gakwe ŵamenyene ni chingwena. Nombenacho chingwena ni malayika gakwe chaputile ngondo, 8 nambo nganapunda* pangondojo mwamti malo gawo nganigasimanikwasoni kwinani. 9 Myoyo chingwenacho ŵachigwisisye, chachili lijoka lyakalakala lila, chachikusamanyikasoni kuti Satana soni Jwakulambusya, jwele jwakusokonasya chilambo chosope chapasi.* Chingwenacho ŵachigwichisye pachilambo chapasi yimpepe ni malayika gakwe. 10 Kaneko napikene maloŵe gamachili kutyochela kwinani gali mkuti,
“Sambano Mlungu ŵakulupwisye ŵandu ŵakwe, soni machili gakwe gapundile. Jwalakwe atamilikasisye ulamusi wakwe, soni Klistu atandite kulamulila. Yeleyi yitendekwe ligongo lyakuti jwele jwakusiŵalambuchisya achalongo achimjetu amgwichisye pasi. Jwelejo ni jwakusiŵaŵechetela jemanjaji yaunami kwa Mlungu jwetu musi ni chilo. 11 Jemanjaji ŵamgomeche jwalakwejo ligongo lya myasi ja Mwanache Jwangondolo soni ligongo lya maloŵe gawo gakutendela umboni. Jemanjaji nganajogopaga kuwa, atamose paŵasimanaga ni yindu yakuti yikawuleje. 12 Paligongo lyeleli, msangalale jemanja kwinani soni wosope ŵamkutama kweleko. Nambo likungu* pachilambo chapasi ni nyasa, ligongo Satana juyiche kweleko. Jwalakwe ali jwakutumbila mnope ligongo akumanyilila kuti jimsigalile ndaŵi japanandi.”
13 Sambano chingwenacho pachayiweni kuti achiponyisye pachilambo chapasi, chatandite kumlagasya jwamkongwe juŵaŵeleche mwanache jwamlume jula. 14 Nambo jwamkongwejo ŵampele mapapiko gaŵili ga ngwasi jekulungwa kuti aguluche ni kwawula kumalo gakwe ku chipululu, kwakutalikangana ni lijoka lila. Kweleko chakamlisyeje kwa ndaŵi jimo, ndaŵi siŵili soni ndaŵi ja hafu.*
15 Kaneko lijoka lila lyamlukulile jwamkongwejo mesi gejinji mpela lusulo kutyochela mkamwa mwakwe, ni chakulinga chakuti lusulolo lumkokolanye. 16 Nambo chilambo chapasi chamkamuchisye jwamkongwejo. Chilambocho chawugwile kukamwa ni kumila mesi ga m’lusulo gagatyochele mkamwa mwa chingwena chila. 17 Pelepo chingwenacho chamtumbilile jwamkongwejo soni chapite kukuputa ngondo jakulimbana ni ŵanache ŵakusigala ŵa jwamkongwejo, ŵele ŵakusapikanila malamusi ga Mlungu soni ŵakwete masengo gakutendela umboni yakwamba Yesu.