Chikalata Chakwawula kwa Filimoni
1 Une Paulo, mkayidi ligongo lya Klistu Yesu, pampepe ni Timoteyo mlongo mjetu, ngumlembela mmwejo Filimoni jwamasengo mjetu jwapamtima, 2 soni Afiya mlumbugwetu, nambosoni Alikipo msilikali mjetu, ni mpingo wawukusasongana m’nyumba jenu:
3 Nguŵenda kuti umbone mtima wekulungwa soni mtendele wakutyochela kwa Mlungu Atati ŵetu ni Ambuje Yesu Klistu, uŵe ni jemanja.
4 Ndaŵi syosope ngusamyamichila Mlungu jwangu pangukolanga ya mmwejo m’mapopelo gangu, 5 pakuŵa ngupikana ya chikulupi chenu soni chinonyelo chamkwete pa Ambuje Yesu ni pa ŵaswela* wosope. 6 Ngusapopela kuti chikulupi chimkwete mwakulandana ni ŵane chimtendekasye kumanyilila yiliyose yambone yatukwete mwa Klistu. 7 Pangupikana ya chinonyelo chenu, ngusaŵa jwakusangalala mnope soni yikusandamika mtima pasi, pakuŵa mitima ja ŵaswelawo jilimbile ligongo lya mmwejo mlongo mjangu.
8 Paligongo lyeleli, atamose kuti mwa Klistu ngwete ufulu wekulungwa wakumlamula mmwejo kutenda yayili yakuŵajilwa, 9 nambo ngumŵenda mwachinonyelo, pakuŵa apano, une Paulo ndili mundu jwachikulile, soni ndili mkayidi ligongo lya Klistu Yesu. 10 Ngumŵenda pakwamba ya mwanangu, Onesimo, jwele mbele babagwe pandili m’nyumba ja ukayidi.* 11 Jwalakweju pandanda jwaliji jwangali masengo kwa mmwejo, nambo sambano ali jwakusosekwa kwa mmwejo soni kwa une. 12 Ngumwuchisya jwalakweju kwa mmwejo, elo jwalakweju, jwapamtima jwangu.*
13 Sachileje kumsunga jwalakweju akuno mmalo mwa mmwejo kuti andumichileje pandili m’nyumba ja ukayidi ligongo lya ngani syambone. 14 Nambo ngangusaka kutenda chilichose mwangamŵenda mmwejo, kuti yambone yampaka mtende, yikaŵa yakumkanganichisya, nambo myitende mwakusaka kwenu. 15 Mwine ni ligongo lyakwe jwatisile kwa mmwejo kwakandaŵi, kuti chimtame najosoni mpaka kalakala, 16 ngaŵaga mpela kapolope, mpela muyaŵelele pandanda, nambo mpelasoni mlongo mjenu. Mtameje najo mpela mlongo mjetu jwapamtima, mnopemnope kwa une, nambo kwekulungwa mnope kwa mmwejo, mwakuchilu soni mwa Ambuje. 17 Myoyo naga mkusambona une mpela mjenu, mumpochele chenene mpela mwampaka mumbochelele unejo. 18 Nambosoni, naga chipali chakulemwa chilichose chaŵamtendele kapena naga akwete namwe ngongole, munjimbe une magambo. 19 Une Paulo, ngulemba ni mkono wangu kuti chinjilipila. Mkaliŵalilatu kuti mmwejosoni mkwete ngongole ni une, atamose umi wenu usyesyenewo. 20 Elo, mlongo mjangu, ngumŵenda kuti mundendele yeleyi mwa Ambuje, mlimbisye mtima wangu mwakamulana ni Klistu.
21 Ngumlembela chikalatachi pakulupilila kuti chimtende yeleyi. Ngumanyilila kuti chimtende atamosesoni yakupunda yimbecheteyi. 22 Konjechesya pelepa, mulinganyichisyesoni malo gagona, ligongo ngukulupilila kuti kupitila m’mapopelo ga jemanja, changopole ni kumbuchisya kwa jemanja.
23 Epafula, kapolo mjangu mwa Klistu Yesu, akuti moni. 24 Moni wine ukutyochela kwa Maliko, Alisitako, Dema, soni Luka, ŵamasengo achimjangu.
25 Umbone mtima wekulungwa wa Ambuje Yesu Klistu uŵe ni jemanja ligongo lya msimu wamkusalosya.