Buku Jandanda ja Samuyele
9 Sambano papali mundu jwine jwakutyochela ku Benjamini lina lyakwe Kisi juŵaliji mwanache jwa Abiyele, Abiyele ŵaliji mwanache jwa Seloli, Seloli ŵaliji mwanache jwa Bekolati, soni Bekolati ŵaliji mwanache jwa Afiya. Kisi jweleju jwaliji jwakutyochela mu mbumba* ja Benjamini soni jwaliji mundu jwakusichila mnope. 2 Jwalakwe ŵakwete mwanache jwamlume lina lyakwe Sauli, juŵaliji jwachinyamata soni jwakusalala. Paliji pangali jwamlume jwakusalala kumpunda jwalakweju pasikati pa Ayisalayeli wosope, soni jwalakwe jwaliji jwamlewu kwapunda ŵandu wosope mwamti pangali juŵapundaga makoyo gakwe.
3 Abulu ŵa Kisi babagwe Sauli ali asoŵile, Kisi ŵamsalile Sauli juŵaliji mwanache jwakwe kuti, “Mjigale jwakutumichila jumo ni mjawule mkasosesose abuluwo.” 4 Jemanjaji ŵajesile mudela josope ja matumbi ja Efulayimu mpaka ŵayiche ku dela ja Salisa, nambo abuluwo nganiŵapata. Kaneko jemanjaji ŵajesilesoni mudela josope ja Saalimu nambo nganiŵasimanasoni kweleko. Ŵajesilesoni mudela josope ja ŵandu ŵa mu mbumba ja Benjamini nambo kweleko nganiŵapatasoni abuluwo.
5 Kaneko jemanjaji ŵayiche mudela ja Sufi, ni Sauli ŵamsalile jwakutumichila jwakwe juŵaliji najo jula kuti, “Kwende tuwujileje ligongotu baba mpaka aleche kudandawula ya abuluwo ni kutanda kudandawula ya m’weji.” 6 Nambo jwakutumichilajo ŵajanjile kuti, “Mumsinda awuno mwana mundu jwa Mlungu jwele ŵandu akusamchimbichisya, soni yindu yosope yakusaŵecheta yikusatendekwa. Kwende tujawule kwa jwalakwejo, komboleka kuti chakatusalile kwampaka tukapate abuluwo.” 7 Pelepo Sauli ŵamwusisye jwakutumichila jwakwejo kuti, “Naga tukwawula ni chitukampe chichi mundujo? Nganitukola chilichose chakuti tukampe mpela mtuka mundu jwa Mlungu jwakuwonajo, ligongo mkate umasile m’misaku jetu. Tukwete chichi chakuti mpaka tukampe jwalakwejo?” 8 Myoyo jwakutumichilajo ŵajanjile kuti, “Mlole une ngwete mbali jimo mwa mbali mcheche sya sekeli* jasilifa. Chingampe jeleji mundu jwa Mlungu jwakuwonajo, mwamti jwalakwe chakatusalile kwampaka tukapate abuluwo.” 9 (Kalakala ku Isalayeli mundu jwakusaka kwawula kukuwusya kwa Mlungu ŵaŵechetaga kuti, “Kwende tujawule kwa mundu jwakulotela yamsogolo.” Mundu jwakusamsala kuti jwakulochesya masiku agano, ni jwele kalakala ŵamsalaga kuti jwakulola yamsogolo.) 10 Kaneko Sauli ŵamsalile jwakutumichila jwakwejo kuti, “Mkusala yisyene, kwende tujawule.” Myoyo jemanjajo ŵapite mumsindawo kuŵaliji mundu jwa Mlungu jwakuwona jula.
11 Jemanjajo ali mkukwela chikwesya paŵajawulaga mumsindawo ŵasimene ni asikana ali mkwawula kukuteka mesi, ni ŵawusisye asikanawo kuti, “Ana mundu jwakulola yamsogolo ali akuno?” 12 Asikanawo ŵajanjile kuti, “Elo ali akuno. Jwalakwe ali kwamkwinjililako. Mjanguye pakuŵa lelo jwalakwe ayiche mumsinda awuno ligongo lyakuti ŵandu akupeleka mbopesi lelo pamalo gakwela. 13 Pachagambe kwinjila mumsinda chamsimane jwalakwejo mkanajawule kukulya kumalo gakwela. Ŵandu nganaŵa atandite kulya jwalakwejo mkanayiche, pakuŵa jwalakwe ni jwakusajipa upile mbopesijo. Pajipele upile mbopesijo ŵandu ŵaŵaŵilanjile akusatanda kulya. Sambano mjawuleje soni jemanja chimkamsimane.” 14 Myoyo jemanjajo ŵajinjile mumsindamo. Paŵayikaga pakatikati pa msindawu Samuyele ŵaliji ali mkwika kukusimana ni jemanjaji kuti ajawule yimpepe kumalo gakwela.
15 Mkaniliyiche lisiku lyaŵayiche Sauli, Yehofa ŵaliji ali amsalile kala Samuyele kuti, 16 “Malaŵi ndaŵi mpela jinojino chinjimtumisya mundu kwa mmwejo jwakutyochela ku dela ja Benjamini. Mkusosekwa kumsagula jwalakwe kuti ŵalongoleleje ŵandu ŵangu Ayisalayeli, soni jwalakwe chachakulupusya ŵandu ŵangu mmyala mwa Afilisiti. Pakuŵa une nakuweni kudandawula kwa ŵandu ŵangu, soni kulila kwawo nakupikene.” 17 Samuyele paŵam’weni Sauli, Yehofa ŵamsalile jwalakwejo kuti, “Aju ni mundu jwanamsalileje mmwejo kuti, ‘Jwalakweju ni juchiŵalamulileje ŵandu ŵangu.’”
18 Kaneko Sauli ŵajawile kuŵaliji Samuyele pa chipata ni ŵamwusisye kuti, “Asalile chonde. Ana akuno nyumba ja mundu jwakusala yamsogolo jili kwapi?” 19 Pelepo Samuyele ŵamjanjile Saulijo kuti, “Jwakusala yamsogolojotu ni une. Kwende tulongane kumalo gakwela soni mmwejo chimlye yimpepe ni une lelo. Chinjimkunda kuti mjawuleje kumangwenu malaŵi kundaŵi soni chinjimsalila yosope yamkusaka kumanyilila. 20 Nambo pakwamba ya abulu ŵaŵasoŵilewo ngamkusosekwa kudandawula ligongo apano apatikene. Nambosoni ana yindu yosope yambone mnope ya mu Isalayeli yili ya ŵani? Ana nganiyiŵa ya mmwejo, soni ya nyumba josope ja baba ŵenu?” 21 Pelepo Sauli ŵajanjile kuti, “Ana ngati une ndili jwa mu mbumba ja Benjamini, jajilisoni mbumba jamwana mnope pa mbumba syosope sya Isalayeli? Soni ana ngati liŵasa lyangu lili lyakutuluka mnope pa maŵasa gosope ga mu mbumba ja Benjamini? Sambano ligongo chichi akuŵecheta ni une chamti myiyi?”
22 Kaneko Samuyele ŵamjigele Sauli pampepe ni jwamasengo jwakwe ni kwawula nawo m’nyumba jakulila yakulya. Kaneko ŵapele malo gakuchimbichika mnope pasikati pa ŵandu ŵele ŵaŵilanjidwe. Ŵanduwo ŵaliji ŵakwana chiŵandika 30. 23 Sambano Samuyele ŵamsalile jwakuteleka yakulya kuti, “Myiche nayo yakulya yanampele soni yanamsalile kuti, ‘Myiŵiche pambali yila.’” 24 Pelepo jwakuteleka yakulya jula jwajigele lukongolo pampepe ni mbali jine ja lukongololo ni kuyiŵika pasogolo pa Sauli. Kaneko Samuyele ŵamsalile Sauli kuti, “Yindu yatwasunjile ni yele yatumpeleyi. Myoyo mlye ligongo ŵayisunjile kuti ampe mmwejo pa mwambo welewu. Sonitu une ni jwanasalile jemanjaji kuti, ‘Mbilasile achalendo.’” Myoyo Sauli ŵalile ni Samuyele pa lisiku lyelelyo. 25 Kaneko jemanjaji ŵatyosile kumalo gakwela kula ni kwawula mumsinda, mwamti Samuyele jwapitilisye kuŵechetana ni Sauli ali penani pa nyumba. 26 Panyuma pakwe jemanjajo ŵajimwiche kundaŵindaŵipe, soni kusa pakwachele Samuyele ŵamŵilasile Sauli juŵaliji penani pa nyumba pala ni kumsalila kuti, “Mkoseche ni chakulinga chakuti nampechesye.” Myoyo Sauli ŵakoseche mwamti jwalakwe yimpepe ni Samuyele ŵapite pasa. 27 Jemanjajo paŵakopokaga mumsindawo, Samuyele ŵamsalile Sauli kuti, “Mumsalile jwamasengo jwenujo kuti alongolele. Nambo mmwejo mjime papapa kuti namsalile yaŵechete Mlungu.” Myoyo jwamasengojo jwalongolele.