Buku Jandanda ja Samuyele
10 Sambano Samuyele ŵajigele libotolo lya mawuta ni kutaga mawutago pa mtwe pa Sauli. Kaneko ŵamkumbatile jwalakwe mwachinonyelo* ni kumsalila kuti, “Nditu Yehofa amsagwile mmwejo kuti mŵe jwakwalongolela ŵandu ŵali ŵakwe. 2 Pachimnyakuche lelo chimsimane ni achalume ŵaŵili chiŵandika malembe ga Lakele gagali mu dela ja Benjamini ku Selisa. Jemanjajo chakamsalile mmwejo kuti, ‘Abulu ŵamwapite kukwasosasosa ŵala apatikene. Nambotu baba ŵenu aliŵalile ya abuluwo, sambano akudandawula ya mmwejo. Ŵalakwewo akuŵecheta kuti, “Ana ndende chichi kuti nampate mwanache jwangu?”’ 3 Pachimkatyoche pelepo mkagambeje kwenda mpaka kuja kwika ku chitela chekulungwa cha Taboli kwele chimkasimane ni achalume ŵatatu ali mkwawula kwa Mlungu jwakuwona ku Beteli. Jumo chakaŵe ali anyakwile ŵanache ŵatatu ŵa mbusi. Jwine chakaŵe ali anyakwile mitanda jitatu ja mkate, soni jwinejo chakaŵe ali anyakwile lulo lwekulungwa lwa finyo. 4 Jemanjajo chakamkomasye ni kumpa mitanda jiŵili ja mkate, soni mmwejo mkusosekwa kuja kupochela mitandajo. 5 Kaneko chimkayiche ku litumbi lya Mlungu jwakuwona kwagali malo gakutama asilikali ŵa Afilisiti. Pachimkayiche mumsinda chimkasimane ni gulu ja ŵakulochesya ali mkutyochela kumalo gakwela, soni pasogolo pawo chipakaŵe ŵandu ali mkwimba ni yida yakwimbila yangonji, tugoma ni yitolilo kwineku ŵakulochesyawo ali mkulochesya. 6 Kaneko msimu wa Yehofa chiwukampe machili ni chimkalochesye pampepe ni jemanjajo, soni mmwejo chimkachenje ni kutendaga yindu mpela mundu jwine. 7 Yimanyisyo yosopeyi pachiyikatendekwe, mmwejo mkatende chilichose champaka mkakombole ligongo Mlungu jwakuwona ali ni mmwejo. 8 Kaneko mkalongolele kwawula ku Giligala, soni une chingamsimane kweleko kuti ngapeleche mbopesi syakutinisya soni mbopesi sya mkamulano. Mkanjembecheye kwa masiku 7 mpaka pachingamsimane kweleko. Panyuma pakwe chingamsalile yamkusosekwa kutenda.”
9 Sauli paŵagambile kugalawuka kuti ajawuleje ni kumleka Samuyele, Mlungu ŵatandite kuwuchenga mtima wakwe kuti uŵe mpela wa mundu jwine, soni yosope yaŵaŵechete Samuyele yatendekwe pa lisiku lyelelyo. 10 Myoyo Sauli ni jwakutumichila jwakwe jula ŵanyakwiche ni kwawula kwitumbi, mwamti jwalakwe ŵasimene ni gulu ja ŵakulochesya. Pelepo msimu wa Mlungu wampele machili jwalakwe mwamti jwalakwe ŵatandite kulochesya pasikati pa jemanjajo. 11 Ŵandu wosope ŵaŵammanyililaga Sauli, paŵam’weni jwalakwejo ali mkulochesya pampepe ni ŵakulochesyawo ŵatandite kuwusyana kuti, “Ana chimtendechele chichi mwanache jwa Kisi? Ana nombenajo Sauli ali jwakulochesya?” 12 Kaneko mundu jwine jwa kweleko jwawusisye kuti, “Nambo ana ŵakulochesya ŵaneŵa baba ŵawo ali ŵani?” Kutandila pelepo ŵandu ŵatandite kuŵecheta maloŵe* gakuti, “Ana nombenajo Sauli ali jwakulochesya?”
13 Jwalakwe paŵamalisisye kulochesya ŵapite kumalo gakwela. 14 Kaneko mlongomjawo jwa babagwe Sauli, ŵamwusisye jwalakwe pampepe ni jwamasengo jwakwejo kuti, “Ana mwapite kwapi?” Pelepo jwalakwe ŵajanjile kuti, “Twapite kukwasosasosa abulu, nambo nganitwapataga ni twapite kwa Samuyele.” 15 Kaneko mlongomjawo jwa babagwe Sauli jula ŵawusisye kuti, “Chonde musalile, ana Samuyele amsalile yamtuli?” 16 Sauli ŵamjanjile mlongomjawo jwa babagwewo kuti, “Jwalakwe ŵatusalile kuti abuluwo apatikene kala.” Nambo Sauli nganamsalila jwalakwe yaŵasasile Samuyele yakwayana ni umwenye yila.
17 Kaneko Samuyele ŵasongangenye ŵandu kwa Yehofa ku Misipa. 18 Ni ŵasalile Ayisalayeliwo kuti, “Yehofa Mlungu jwa Ayisalayeli akuŵecheta kuti, ‘Une ni junakopwesye Ayisalayeli ku Iguputo, soni une ni junamkulupwisye jemanja mmyala mwa ŵandu ŵa ku Iguputo. Nambosoni une ni junamkulupwisye mmyala mwa mauchimwene gosope gagamtendelaga jemanja yindu yangasa. 19 Nambo lelo jemanja mumkanile Mlungu jwenu juŵamkulupwisye mu yakupweteka ni yakusawusya yenu yosope. Soni jemanja mwatite, “Iyayi, mtusagulile mwenye jwakuti atulamulileje.” Sambano jemanja mjime pameso pa Yehofa mwakuya mbumba* syenu soni magulu genu ga ŵandu 1,000* pa gulu jilijose.’”
20 Myoyo Samuyele ŵasisalile mbumba syosope sya Isalayeli kuti siyiche pakuŵandichila, soni mbumba ja Benjamini jasagulidwe. 21 Kaneko jwalakwe ŵajisalile mbumba ja Benjamini kuti jiyiche pakuŵandichila mwakamulana ni maŵasa gawo, soni liŵasa lya Matiliti lyasagulidwe. Pambesi pakwe Sauli mwanache jwa Kisi ŵasagulidwe. Kaneko ŵanduwo ŵatandite kumsosasosa jwalakwe nambo nganampata. 22 Myoyo jemanjajo ŵatandite kuwusya kwa Yehofa kuti, “Ana munduju ayiche kala akuno?” Pelepo Yehofa ŵajanjile kuti, “Ni ajo jwajuŵile pajili katundupo.” 23 Kaneko jemanjajo ŵawutwiche ni kuja kumjigala jwalakwe paŵajuŵilepo. Jwalakwe paŵajimi pasikati pa ŵanduwo, jwaliji jwamlewu mwamti pangali juŵapundaga makoyo gakwe. 24 Pelepo Samuyele ŵasalile ŵandu wosopewo kuti, “Alole mundu jwele Yehofa amsagwile. Pangali mundu jwakulandana ni jwalakweju pasikati pa ŵandu wosope.” Kaneko ŵandu wosope ŵatandite kugumila kuti. “Akole umi wawulewu mwenye!”
25 Panyuma pakwe Samuyele ŵasalile ŵanduwo yindu yele mwenye chachisosekwaga kumpa soni ŵayilembile yinduyo m’buku ni kujisunga mu chitenti cha Yehofa. Kaneko Samuyele ŵasalile ŵanduwo kuti jwalijose ajawuleje kunyumba jakwe. 26 Nombenajo Sauli ŵapite kumangwakwe ku Gibeya, soni asilikali ŵangondo ŵampechesye jwalakwe. Yehofa ni juŵalimbikasisye asilikali ŵeleŵa kuti atende yeleyo. 27 Nambo ŵandu ŵane ŵakusakala ŵatite, “Ana mundu jweleju mpaka atukulupusye?” Myoyo jemanjajo ŵatandite kumnyosya jwalakwe soni nganampa mtuka uliwose. Nambope Samuyele nganaŵecheta chilichose pa yeleyi.*