Buku Jandanda ja Samuyele
13 Sauli jwakwete yaka yakwana . . * pandaŵi ja ŵaŵaga mwenye. Ali alamulile ku Isalayeli kwa yaka yiŵili, 2 Sauli ŵasagwile achalume ŵakwana 3,000 pasikati pa Ayisalayeli. Mwa achalume ŵeleŵa achalume ŵakwana 2,000 ŵaliji ni jwalakwe ku Mikimasi soni kudela jamatumbi ja ku Beteli. Soni achalume ŵakwana 1,000 ŵaliji ni Yonatani ku Gibeya ja ku Benjamini. Nambo jwalakwe ŵasalile ŵandu ŵane wosopewo kuti awujile jwalijose ku tenti jakwe. 3 Kaneko Yonatani ŵajiwuleje gulu ja asilikali ŵa Afilisiti ŵaŵaliji ku Geba, mwamti Afilisiti ŵapikene ya ngani jeleji. Pelepo Sauli ŵatumile ŵamitenga kuti agombe lipenga m’chilambo chosopecho, ni kuŵechetaga kuti, “Mpikane ayi jemanja Ahebeli!” 4 Pelepo Ayisalayeli wosope ŵapikene ngani jakuti, “Sauli ajiwuleje gulu ja asilikali ŵa Afilisiti, mwamti apano Ayisalayeli aŵele chindu chakununga pameso pa Afilisiti.” Myoyo ŵasongangenye ŵandu wosopewo kuti amkuye Sauli ku Giligala.
5 Nombenawo Afilisiti ŵasongangene pampepe kuti amenyane ni Ayisalayeli. Jemanjaji ŵajigele magaleta* ga ngondo gakwana 30,000 soni asilikali ŵakukwela pa mahachi ŵakwana 6,000 nambosoni asilikali ŵakwenda pasi ŵaŵaliji ŵajinji mpela mchenga wa mungulugulu nyasa. Kaneko jemanjaji ŵakunjile matenti gawo ku Mikimasi cha kungopokolyuŵa kwa Beti-afeni. 6 Achalume ŵa ku Isalayeli ŵayiweni kuti yindu yasawisye, ligongo jemanjaji ŵaliji ali ŵakanganiche mnope. Myoyo ŵanduwo ŵajuŵile mu mbanga, m’masimbo, m’malwala, m’yipinda yapasi ya m’nyumba, soni m’yisima. 7 Ahebeli ŵane ŵayikene mpaka pakomboka Yolodani kuja kwika ku dela ja Gadi soni Giliyadi. Nambo Sauli ŵaliji ku Giligala peko. Soni ŵandu wosope ŵaŵamkuyaga jwalakwe ŵatetemelaga ni woga. 8 Sauli ŵapitilisye kwembecheya kwa masiku 7 mpaka pajakwanile ndaŵi jele Samuyele ŵasasile kuti chakopochele. Nambo Samuyele ŵaliji mkanaŵe kukopochelape ku Giligala, mpaka ŵandu ŵatandite kubalalikangana ni kumleka Sauli. 9 Pambesi pakwe Sauli ŵatite, “Ayiche najo akuno mbopesi jakutinisyajo soni mbopesi jamkamulanojo.” Kaneko jwalakwe ŵapeleche mbopesi jakutinisyajo.
10 Nambo jwalakwe paŵagambile kumalisya kupeleka mbopesi jakutinisyajo, Samuyele ŵakopochele. Myoyo Sauli ŵakopweche ni kwawula kuja kusimana ni jwalakwe, ni ŵamkomasisye. 11 Kaneko Samuyele ŵamwusisye jwalakwe kuti, “Yamtesileyi ni yapi?” Pelepo Sauli ŵajanjile kuti, “Nayiweni kuti ŵandu akundeka jika, soni wawojo nganayika pandaŵi jiŵasosekwaga kwika, nambosoni Afilisiti ŵaliji kusongangana pampepe ku Mikimasi. 12 Ni naganisisye kuti, ‘Sambano Afilisiti chayiche kuti alimbane ni une ku Giligala kuno, soni une nganinamŵenda Yehofa kuti asalalile mtima.’ Myoyo nayiweni kuti uli udindo wangu kupeleka mbopesi jakutinisyajo.”
13 Pelepo Samuyele ŵamsalile Sauli kuti, “Mtesile yakuloŵela. Nganimpikanila lilamusi lyaŵampele Yehofa Mlungu jwenu. Yikaŵe kuti mwapikanile, Yehofa akatendekasisye kuti uchimwene wenu walamulileje Ayisalayeli mpaka kalakala. 14 Nambo sambano uchimwene wenu ngawutamilichika. Yehofa chasagule mundu jwine jwakumtima kwakwe. Soni Yehofa chachimŵika jwalakwe kuti aŵe jwakwalongolela ŵandu ŵakwe. Chatende yeleyi ligongo lyakuti mmwejo nganimpikanila yaŵamlamwile Yehofa.”
15 Kaneko Samuyele ŵanyakwiche kutyoka ku Giligala ni kwawula ku Gibeya ja ku Benjamini. Soni Sauli ŵaŵalasile ŵandu ŵaŵaliji ni jwalakwe. Ŵanduwo ŵaliji chiŵandika 600. 16 Sauli pampepe ni mwanache jwakwe Yonatani, soni ŵandu ŵaŵaliji ni jemanjaji ŵatamaga ku Geba ja ku Benjamini. Nambosoni Afilisiti ŵakunjile matenti gawo ku Mikimasi. 17 Magulu gatatu ga asilikali gakopokaga ku matenti ga Afilisiti kuti akajimuchile Ayisalayeli. Gulu jimo jajinjililaga ku msewu wakwawula ku Ofula soni ku dela ja Suwala. 18 Gulu jine jajinjililaga ku msewu wakwawula ku Beti-holoni, soni gulu jatatu jajinjililaga ku msewu wakwawula ku malile gagalolegene ni chiŵata* cha Seboimu kumbali jakwaliji chipululu.
19 Sambano mu chilambo cha Isalayeli chosope nganimusimanikwa mundu jwalijose jwakusyana chisyano. Ligongo Afilisiti nganasakaga kuti Ahebeli apanganyeje upanga* kapena lipanga. 20 Myoyo Ayisalayeli wosope pakusaka kunolesya mapulawo, majela, maŵago soni yikwakwa ŵajawulaga kwa Afilisiti. 21 Mtengo wakusyanila mapulawo, majela, yida yine yakola meno gatatu, maŵago soni mtengo ŵakulinganyila yisonga yakutonyela ng’ombe waŵaga pimu* jimo. 22 Palyayiche lisiku lya ngondo pa ŵandu wosope ŵaŵaliji ni Sauli soni Yonatani pangali atamose jumpepe juŵakwete upanga kapena lipanga. Saulipe ni mwanache jwakwe Yonatani ni ŵaŵakwete yida yakuputila ngondo.
23 Sambano gulu ja asilikali ŵa Afilisiti jakopweche ni kwawula mu msewu wawapitile mu chiŵata cha ku Mikimasi.