Masalimo
Nyimbo jakudandawula* jiŵajimbile Daudi kwa Yehofa pakwamba ya maloŵe ga Kusi jwa mu mbumba* ja Benjamini.
7 Wawo Yehofa Mlungu jwangu, une ndilile kwa wawojo.
Angulupusye une kwa ŵandu wosope ŵakundagasya.
2 Naga ngakutenda yeleyo jemanjajo chachimbachulanyapachulanya mpela lisimba,
Chachingwekwelemya mwamti pangali juchachingulupusya.
3 Wawo Yehofa Mlungu jwangu, naga ndesile chilichose chakulemwecheka,
Naga ndesile yindu yangali chilungamo,
4 Naga namlemwechesye jwele jwakundendela yindu yambone,
Kapena sumwile yindu ya mdani* jwangu pali pangali ligongo lililyose,*
5 Akunde kuti mdani jwangu andopole ni kungamula.
Amkunde jwalakwejo kuti ambonde une mpaka kuwa
Ni kundeka ndili kwala pasi mwakutesya sooni. (Selah)
6 Anyakuche wawo Yehofa, ali atumbile.
Ajime ni kulimbana ni ukali wa adani wangu.
Ajime kuti angamuchisye, alamule kuti chilungamo chitendekwe.
7 Ŵandu ŵamitundu jine ŵasyungulile wawojo.
Soni wawojo chachilimbana nawo jemanjajo kutyochela kwinaniko.
8 Yehofa chachawelusya mwachilungamo ŵandu ŵamitundu jine.
Wawo Yehofa, awelusye une mwakamulana ni chilungamo changu
Soni mwakamulana ni kukulupichika kwangu.
9 Wawo Mlungu, chonde amasye yindu yakusakala yakutenda ŵandu ŵakusakala.
Nambo ŵandu ŵakulungama ŵatamilikasye mwakulimbangana,
Pakuŵa wawojo ali Mlungu jwakulungama, jwakusawungunya mitima soni nganisyo sya pasi pamtima.*
10 Mlungu ali chakuchijila changu, jwalakwe ali Mkulupusyo jwa ŵandu ŵagoloka mitima.
11 Mlungu ali jwakwelusya jwachilungamo,
Soni Mlungu akusiŵamanyikasya ŵandu kwelusya kwakwe* lisiku lililyose.
12 Naga mundu ngakugalawuka mtima, Mlungujo akusanola upanga* wakwe.
Jwalakwe akusakunga ukunje wakwe ni kosechela kusoma.
13 Jwalakwe akusayikosechelekasya yida yakwe yakogoya.
Akusajikosechelekasya mipamba jakwe jakolela moto.
14 Amlole mundu jwajigele msigo wa yindu yakusakala.
Jwalakwe ajigele msigo wa yakusawusya mwamti chachiŵeleka mabosa.
15 Jwalakwe akusola lisimbo, soni akulisola mwakuti lisokoche mnope.
Nambo pambesi pakwe chachigwila msyene mu lisimbo lyasosilelyo.
16 Yakusawusya yakuyitendekasya jwalakwe yichiwujila pamtwe pakwe,
Soni yachiwawa yakusatenda yichigwila pamtwe pakwe.
17 Chinjimchimbichisya Yehofa ligongo lya chilungamo chakwe.
Chinjijimba nyimbo syakuchimbichisya* lina lya Yehofa Mlungu Jwakwinani Mnope.