Yoswa
1 Mose mtumiki jwa Yehofa paŵawile, Yehofa ŵaŵechete kwa Yoswa* mwanache jwa Nuni juŵaliji jwakutumichila jwa Mose. Ŵamsalile kuti, 2 “Mose jwakutumichila jwangu awile. Sambano mmwejo yimpepe ni ŵandu wosopeŵa, mnyakuche, mjomboche lusulo lwa Yolodani kuti mkajinjile m’chilambo changusaka kwapa jemanjaji, ŵanache ŵa Isalayeli. 3 Chinjimpa malo galigose gachimkaponde mmwejo mpela yanatite pakumsalila Mose. 4 Chilambo chenu chichitandila ku Chipululu mpaka ku Lebanoni. Chichitandilasoni ku Lusulo lwekulungwa lwa Filate mpaka chilambo chosope cha Ahiti ni kuja kwika ku Nyasa Jekulungwa* chakungapililolyuŵa. 5 Pangali jwalijose juchachikombola kulimbana ni mmwejo pandaŵi josope ja umi wenu. Une chinjiŵa ni mmwejo mpela yanatite pakuŵa ni Mose. Ngasinamleka mmwejo kapena kumjasa. 6 Mŵe ŵakulimba mtima soni mtende yindu mwamachili ligongo mmwejo ni ŵachimwalongolele ŵanduŵa pakwinjila m’chilambo chele chinalumbilile achinangolo ŵawo kuti chinjapa.
7 “Mmwejo mgambe kuŵa ŵakulimba mtima soni mtende yindu mwamachili mnope. Mlolechesye kuti mkukuya mwakusamala Chilamusi chosope chiŵampele Mose jwakutumichila jwangu. Mkuyeje Chilamusicho ni chakulinga chakuti mtendeje yindu mwalunda kulikose kwachimjawuleje. Mkaleka kuchikuya ni kugalawuchila kumkono wamlyo kapena wamchiji. 8 Buku ja Chilamusiji jikatyokaga pakamwa penu. Mjiŵalanjeje soni mganichisyeje yayili mwelemu musi ni chilo ni chakulinga chakuti mkuyeje mwakusamala yosope yayili m’bukuji. Naga mkutenda yeleyi yindu yichimjendela chenene paumi wenu soni chimchitendaga yindu mwalunda. 9 Paja namsalile kala kuti mŵe ŵakulimba mtima soni mtende yindu mwamachili. Mkatenda woga kapena kutetemela pakuŵa Yehofa Mlungu jwenu ali ni mmwejo kulikose kwachimjawuleje.”
10 Kaneko Yoswa ŵalamwile achakulungwakulungwa ŵaŵalolelaga ŵanduwo kuti, 11 “Mjawule kumasakasako, mkasalile ŵandu kuti, ‘Jwalijose alilinganyichisye chile yakulya ligongo panyuma pamasiku gatatu jemanja chimjomboche lusulo lwa Yolodani. Chimjomboche kuti mkajigale chilambo chele Yehofa Mlungu jwenu akusaka kumpa.’”
12 Nambo ku mbumba* ja Lubeni, ja Gadi soni hafu ja mbumba ja Manase, Yoswa ŵasisalile mbumba syelesi kuti, 13 “Mkumbuchile yaŵamlamwile jemanja Mose jwakutumichila jwa Yehofa. Paja ŵatite, ‘Yehofa Mlungu jwetu ampele jemanja malo gakupumulila, soni ampele chilambo achino. 14 Achiŵamkwenu, ŵanache ŵenu, soni yilango yenu chiyisigale m’chilambo achino chele Mose ŵampele jemanja ku lisi alino lya lusulo lwa Yolodani. Nambo jemanja achalume wosope ŵakuputa ngondo, chimjomboche ni kuŵa pasogolo pa achalongo achimjetu mli mkosechele kuputa ngondo. Jemanja mjawule mkakamuchisye achalongo achimjenuŵa. 15 Mkatende yeleyi mpaka Yehofa ali ŵapelesoni achalongo achimjenuŵa malo gakupumulila mpela yaŵatitesoni pakumpa jemanja. Nambosoni mpaka ali ajigele chilambo chele Yehofa Mlungu jwenu akusaka kwapa jemanjaji. Panyuma pakwe chimchiwujila kukutama m’chilambo chenu, chilambo chele Mose jwakutumichila jwa Yehofa ŵampele jemanja mbali ja kungopokolyuŵa kwa lusulo lwa Yolodani.’”
16 Jemanjajo ŵamjanjile Yoswa kuti, “Tuchitenda yiliyose yatulamwile wawojo, soni tuchijawula kulikose kwachachitutuma wawojo. 17 Mpela mwatwatendele pakumpikanila Mose pachilichose tuchapikanilasoni wawojo. Yehofa Mlungu jwawo aŵe ni wawojo mpela muŵaŵelele ni Mose. 18 Mundu jwalijose jwakwajimuchila wawojo soni jwangasaka kupikanila yalamwile wawojo, mundu jwelejo chachiwulajidwa. Wawojo agambe kuŵa ŵakulimba mtima soni atende yindu mwamachili.”