Numeli
8 Yehofa ŵaŵechete ni Mose kuti, 2 “Mŵechetane ni Aloni, ni mumsalile jwalakwejo kuti, ‘Pampambile nyali syosope 7, mlolechesyeje kuti msiŵisile pamalo gakuti simulichileje kusogolo kwa chakuŵikapo nyalisyo.’” 3 Myoyo Aloni ŵatesile yeleyi. Jwalakwe ŵapambile nyalisyo ni kusiŵika pamalo gakuti simulichileje pasogolo pa chakuŵikapo nyalisyo mpela yaŵatite Yehofa pakumlamula Mose. 4 Chakuŵikapo nyalicho ŵachipanganyisye chamti myi: chinducho chaliji chagolide soni ŵachipanganyisye mwakutenda kusyana, kutandila lipata lyakwe mpaka maluŵa gakwe, yosope yaliji yakusyana. Chakuŵikapo nyalichi ŵachipanganyisye mwakamulana ni yele Yehofa ŵamlosisye Mose.
5 Yehofa ŵaŵechetesoni ni Mose kuti, 6 “Mwajigale Alefi pasikati pa Ayisalayeli, ni mwaswejesye jemanjajo. 7 Jemanjajo mwaswejesye chamti myi: mwamisile jemanjajo mesi gakuti gaswejesye ulemwa wawo, soni asenjeje ni lesala wumbo syosope sya pachilu pawo nambosoni achapeje yakuwala yawo. Jemanjajo patesile yeleyi chachiŵa kuti aliswejesye. 8 Kaneko jemanjajo ajigale mwanache jwa ng’ombe jwamkambako pampepe ni mbopesi jakwe jambeju ja utandi wetililiche wewanganye ni mawuta. Nambosoni mmwejo mjigale mwanache jwine jwa ng’ombe jwamkambako kuti juŵe mbopesi jaulemwa. 9 Panyuma pakwe, mwajigale Alefiwo ni kwika nawo pasogolo pa chitenti chakusimanilana soni mwasonganganye pampepe Ayisalayeli* wosope kweleko. 10 Pamyiche nawo Alefiwo pameso pa Yehofa, Ayisalayeliwo asajiche makono gawo pamitwe ja Alefiwo. 11 Kaneko Aloni ŵapeleche jemanjajo pameso pa Yehofa mwakuyijendesya yilu yawo aku nakuku mpela mbopesi jakuyuya jakutyochela pasikati pa Ayisalayeli. Panyuma pakwe jemanjajo atande kumtumichila Yehofa.
12 “Kaneko Alefiwo asajiche makono gawo pamitwe ja ng’ombe sya mkambakosyo. Panyuma pakwe, mpeleche ng’ombe jimojo mpela mbopesi jaulemwa, soni jijakwejo mpela mbopesi jakutinisya. Mpeleche mbopesi syelesi kwa Yehofa kuti sisimasye ulemwa wa Alefiwo. 13 Kaneko mwajigale Alefiwo ni kwajimika pasogolo pa Aloni ni ŵanache ŵakwe. Panyuma pakwe, mwapeleche jemanjajo kwa Yehofa mpela mbopesi jakuyuya. 14 Mwalekanganye Alefiwo kutyochela pasikati pa Ayisalayeli, kaneko Alefiwo chachiŵa ŵangu. 15 Panyuma pakwe, Alefiwo chachiyika kukutumichila ku chitenti chakusimanilana. Yeleyi ni yamkusosekwa kutenda kuti mwaswejesye jemanjajo soni kwapeleka mpela mbopesi jakuyuya. 16 Pakuŵa jemanjaji apelechedwe kwa une kutyochela pasikati pa Ayisalayeli mmalo mwa ŵanache ŵandanda kupagwa ŵa Ayisalayeli, une chinajigale jemanjaji ni kuŵa ŵangu. 17 Yeleyi yili myoyo ligongo lyakuti mwanache jwalijose jwandanda kupagwa pasikati pa Ayisalayeli juli jwangu, chinga mwanache jwa mundu kapena jwa chilango. Naswejesye jemanjaji ni kuŵa ŵangu palisiku lyanamwuleje mwanache jwalijose jwandanda kupagwa m’chilambo cha Iguputo. 18 Une chinajigale Alefi mmalo mwa ŵanache wosope ŵandanda kupagwa pasikati pa Ayisalayeli. 19 Une chinapeleche Alefiwo mpela mtuka kwa Aloni ni ŵanache ŵakwe kutyochela pasikati pa Ayisalayeli. Chinapeleche jemanjaji kuti atumichileje mmalo mwa Ayisalayeli ku chitenti chakusimanilana soni kuti asimasyeje ulemwa wa Ayisalayeliwo. Yeleyi yili myoyo kuti Ayisalayeliwo akaŵandichila kumalo geswela ni kwagwila mlili.”
20 Mose soni Aloni pampepe ni Ayisalayeli wosope ŵaŵasongene ŵala, ŵatesile yosope yele Yehofa ŵamlamwile Mose yakwamba Alefi. 21 Myoyo Alefiwo ŵaliswejesye soni ŵachapile yakuwala yawo. Kaneko Aloni ŵapeleche jemanjajo pameso pa Yehofa mpela mbopesi jakuyuya. Panyuma pakwe Aloni ŵasimasisye yakulemwa ya jemanjajo kuti aŵe ŵaswela. 22 Pambesi pakwe Alefiwo ŵayiche ku chitenti chakusimanilana ni kutanda kutumichila mwakulongoleledwa ni Aloni soni ŵanache ŵakwe. Myoyo ŵanduwo ŵatesile yosope yele Yehofa ŵamlamwile Mose yakwamba Alefi.
23 Sambano Yehofa ŵaŵechete ni Mose kuti, 24 “Yindu yakuyichisyayi yili yakwamba Alefi: Jwamlume jwalijose pakwanisye yaka 25 akatandeje kutumichila ku chitenti chakusimanilana yalumo ni Alefi ŵane ŵakutumichila kweleko. 25 Nambo pakwanisye yaka 50 apumuleje pa utumikiwo, mwamti akatumichilasoni. 26 Nambope jwalakwe mpaka ŵakamuchisyeje achalongo achimjakwewo pa yindu yine pakutenda utumikiwo ku chitenti chakusimanilana, nambo jwalakwejo ngakusosekwa kutenda nawo utumikiwo. Mwelemu ni mwachimtendeleje ni Alefi soni masengo gawo gakuti akamuleje.”