Misyungu
13 Mwanache jwalunda akusapikanila chamuko cha babagwe,
Nambo jwakunyosya jwangapikanila ŵane pakumjamuka.
2 Mundu akusalya yambone ligongo lya maloŵe gakwe gambone,
Nambo jwachinyengo akusakumbila yindu yachiwawa.
3 Mundu jwakusasamala ni pakamwa pakwe* akusawuchenjela umi wakwe,
Nambo jwakusagamba kuwugula pakamwa pakwe chachijonasika.
4 Mundu jwaulesi akusakola yindu yakusakumbila nambo ngakusapata chilichose,
Nambo mundu jwakulimbichila chachikola yindu yakwanila.*
5 Mundu jwakulungama akusaŵengana ni unami,
Nambo yakutenda ya mundu jwakusakala yikusayikasya sooni soni ŵandu akusamnyosya.
6 Chilungamo chikusamchenjela mundu jwele matala gakwe gali gangalemwa,
Nambo yitendo yakusakala yikusamjonanga mundu jwakulemwa.
7 Pana mundu jwakusalitenda mpela ali jwakusichila nambo ali jwangali chilichose.
Ni pana mundu jwine jwakusalitenda kuŵa mpela jwakulaga nambo ali akwete chipanje chejinji.
8 Chipanje chikusawombola umi wa mundu,
Nambo ŵandu ŵakulaga pangali jwakusiŵajogoya.
9 Lilanguka lya ŵandu ŵakulungama likusaŵala mnope,
Nambo nyali ja ŵandu ŵakusakala chachijisimisya.
10 Kulikwesya kukusagamba kutandikasya ukangani,
Nambo lunda lukusaŵa ni ŵandu ŵakusasosasosa malangiso.
11 Chipanje chele mundu achipatile mwakuwutuka changakaŵa kumala,
Nambo chipanje chele mundu akusachipata mwapanandipanandi* chichiŵa chejinji.
12 Yindu yamkuyijembecheya payilepelechekwe yikusalwalikasya mtima,
Nambo yamkusayikumbila payitendekwe yikusaŵa mpela chitela chakupeleka umi.
13 Jwalijose jwakunyosya chamuko chachisimana ni yakusawusya,
Nambo jwalijose jwakusachimbichisya malamusi chachipochela yambone.
14 Yakusajiganya* mundu jwalunda yikusapeleka umi
Yikusamkamuchisya mundu kuti aŵambale yitega yakuwulaga.
15 Mundu jwakusachilila kumanyilila yindu ŵandu akusamnonyela,
Nambo mundu jwakunonyela yindu yachinyengo akusasimana ni yakusawusya.
16 Mundu jwakalamuka akusatenda yindu mwalunda,
Nambo mundu jwakuloŵela akusalosya uchisilu wakwe.
17 Jwamtenga jwakusakala akusasimana ni yakusawusya,
Nambo jwamtenga jwakulupichika akusayikasya yindu yambone.
18 Jwalijose jwakusaganyosya maloŵe gakwamuka akusalaga soni akusatenda sooni,
Nambo jwakusapikanila kwamuka ŵandu chachimchimbichisya.
19 Yakumbila payikwanilichikwe mundu akusasangalala,
Nambo jwakuloŵela akusaŵengana ni yakuti aleche kutenda yakusakala.
20 Mundu jwakwenda ni ŵandu ŵalunda chachiŵa jwalunda,
Nambo mundu jwakusatenda yindu ni yisilu chachisimana ni yakusawusya.
21 Yakusawusya yikusakuya ŵandu ŵakulemwa,
Nambo ŵandu ŵakulungama yindu yichajendela chenene.
22 Mundu jwambone akusayilechela chipanje yisukulu yakwe,
Nambo chipanje cha mundu jwakulemwa chachichisunga kuti chiŵe cha mundu jwakulungama.
23 Mgunda wa mundu jwakulaga pawulimile ukusakola yakulya yejinji,
Nambo yakulyayo mpaka ayisumule ŵandu ŵangali chilungamo.
24 Jwalijose jwangamkwapula* mwanache jwakwe nikuti akumŵenga mwanachejo,
Nambo mundu jwakusamnonyela mwanache jwakwe akusalimbichila kumjamuka.
25 Mundu jwakulungama akusalya ni kwikuta,
Nambo lutumbo lwa mundu jwakusakala lukusaŵa lwangali kandu.