Lefitiko

13 Yehofa ŵapitilisye kuŵecheta ni Mose soni Aloni kuti, 2 “Naga mundu akukola chakuyimba pachilu chakwe kapena liŵanga* kapenasoni chikanga, soni yikuwoneka mpela uli ulwele wa matana, ayicheje najo mundujo kwa jwakutaga mbopesi Aloni kapena kwa jumo mwa ŵanache ŵakwe ŵachalume ŵali ŵakutaga mbopesi. 3 Kaneko jwakutaga mbopesijo awulolechesyeje chenene ulwele wawukopweche pachiluwo. Wumbo syasili pamalo pawukopweche ulwelewo pasichenjile mtundu ni kuŵa syeswela soni yikuwoneka kuti ulwele wawukopwechewo ujinjile mpaka mkati pachilupo, welewo uli ulwele wa matana. Jwakutaga mbopesi awuloleje ulwele wawukopweche pachiluwo ni agombelesyeje kuti mundujo ali jwangaswejela. 4 Nambo naga chikanga chachikopweche pachilucho chili cheswela soni chikuwoneka kuti nganichijinjila mkati mwa lipende nambosoni wumbo syasili pamalopo nganisichenga mtundu ni kuŵa syeswela, jwakutaga mbopesi amŵicheje mundujo kwajika kwa masiku 7. 5 Pa lisiku lya 7 lyelelyo, jwakutaga mbopesi amlolejesoni mundujo. Naga ulwelewo ulesile mwamti ngawukupitilisya kukula pachilupo, jwakutaga mbopesi amŵicheje mundujo kwajika kwa masiku gane 7.

6 “Palikwanile lisiku lya 7, jwakutaga mbopesi amlolejesoni mundujo. Naga ulwelewo ngawukupitilisya kukula mwamti umasile pachilupo, jwakutaga mbopesi agombelesyeje kuti mundujo ali jwamswela. Lyelelyo lyagambile kuŵa liŵanga basi. Kaneko mundujo achapeje yakuwala yakwe soni aŵeje jwamswela. 7 Naga panyuma pakuti jwakutaga mbopesi asasile kuti mundujo ali jwamswela, nambo liŵanga lila litandilesoni mwamti likupitilisya kukula pachilupo, mundujo akawonechelejesoni pameso pa jwakutaga mbopesi. 8 Kaneko jwakutaga mbopesijo amloleje mundujo. Naga akuyiwona kuti liŵangalyo likukula pachilupo, jwakutaga mbopesijo agombelesyeje kuti mundujo ali jwangaswejela. Welewo uli ulwele wa matana.

9 “Naga mundu atandite ulwele wa matana ayicheje najo kwa jwakutaga mbopesi. 10 Kaneko jwakutaga mbopesijo amloleje mundujo. Naga pachilu pakwe pana chakuyimba chakuwoneka cheswela, soni naga wumbo syasili pamalo papali chakuyimbacho sichenjile mtundu ni kuŵa syeswela nambosoni naga chakuyimbacho chitumbwiche, 11 gelego gali matana gekulungwa gagakopweche. Pelepo jwakutaga mbopesi asaleje kuti mundujo ali jwangaswejela. Ngakusosekwa kumŵika kaje kwajika kwakandaŵi kuti awulolesoni ulwelewo ligongo jwalakwejo ali jwangaswejela. 12 Sambano naga ulwele wa matanawo ukamwile chilu chakwe chosope kutandila kumtwe mpaka kusajo, mwamti jwakutaga mbopesi akuyiwona yeleyo, 13 soni panyuma pakuti amlolechesye chenene mundujo ni akuyiwona kuti ulwele wa matanawo ukamwile chilu chosope cha mundujo soni chilu chakwecho chichenjile mtundu ni kuŵa cheswela, pelepo jwakutaga mbopesi agombelesyeje kuti ulwelewo nganiwuŵa wakupelegana.* 14 Nambo naga pachilupo pakuwoneka maŵanga, mundujo aŵeje jwangaswejela. 15 Jwakutaga mbopesi pagaweni maŵangago agombelesyeje kuti mundujo ali jwangaswejela. Jwalakwejo ali jwangaswejela ligongo lya maŵangago. Welewo uli ulwele wa matana. 16 Nambo naga maŵangago gachenjile mtundu ni kuŵa geswela, pelepo jwalakwe ayicheje kwa jwakutaga mbopesi. 17 Jwakutaga mbopesi amloleje mundujo. Naga ayiweni kuti maŵangago gachenjile mtundu ni kuŵa geswela, pelepo jwakutaga mbopesijo agombelesyeje kuti mundujo ali jwamswela.

18 “Naga pachilu cha mundu patesile litusa panyuma pakwe ni kupola, 19 kaneko palyaliji litusapo pakopweche chakuyimba cheswela kapena chikanga chakuwoneka mwine mwechejewu mwine mweswela, pelepo mundujo akawonecheleje kwa jwakutaga mbopesi. 20 Jwakutaga mbopesi achiloleje chenene chikanga chachikopwechecho. Naga chikanga chachikopwechecho chijinjile mkati pachilupo soni wumbo syasili pamalopo sichenjile mtundu ni kuŵa syeswela, pelepo jwakutaga mbopesijo agombelesyeje kuti mundujo ali jwangaswejela. Welewo uli ulwele wa matana wawutandite palyaliji litusalyo. 21 Nambo jwakutaga mbopesi palolite chikangacho ni akuyiwona kuti wumbo sya pamalopo nganisichenga mtundu ni kuŵa syeswela, soni kuti chikangacho nganichijinjila mkati pachilupo nambosoni chikusimasika, pelepo jwakutaga mbopesi amŵicheje mundujo kwajika kwa masiku 7. 22 Nambosoni naga chikangacho chikuwoneka nditu kuti chikukula pachilupo, jwakutaga mbopesi agombelesyeje kuti mundujo ali jwangaswejela. Welewo uli ulwele wa matana. 23 Nambo naga chikanga chachikopwechecho chigambile kutama malo gamo ngakula, chelecho chigambile kuŵa chikanga wamba chachikopweche pamalo palyaliji litusa. Pelepo jwakutaga mbopesi agombelesyeje kuti mundujo ali jwamswela.

24 “Kapena naga mundu akwete liŵanga lya moto ni paliŵangapo pakukopoka chikanga cheswela kapena chikanga chakuwoneka mwine mweswela mwine mwechejewu, 25 pelepo jwakutaga mbopesi achiloleje chikangacho. Naga wumbo sya pamalo pachili chikangacho sichenjile mtundu ni kuŵa syeswela soni yikuwoneka kuti chikangacho chijinjile mkati pachilupo, welewo uli ulwele wa matana wawutandite paliŵangalyo. Myoyo jwakutaga mbopesijo agombelesyeje kuti mundujo ali jwangaswejela. Welewo uli ulwele wa matana. 26 Nambo naga jwakutaga mbopesi palolite chikangacho ni akuyiwona kuti wumbo sya pamalopo nganisichenga mtundu ni kuŵa syeswela soni kuti chikangacho nganichijinjila mkati pachilupo nambosoni chikusimasika, pelepo jwakutaga mbopesi amŵicheje mundujo kwajika kwa masiku 7. 27 Pa lisiku lya 7 lyelelyo, jwakutaga mbopesi amlolejesoni mundujo. Naga chikangacho chikuwoneka kuti chikupitilisya kukula pachilupo, jwakutaga mbopesi agombelesyeje kuti mundujo ali jwangaswejela. Welewo uli ulwele wa matana. 28 Nambo naga chikanga chachikopwechecho chigambile kutama malo gamo ngakula soni kuti chikusimasika pachilupo kweleko kugambile kuŵa kuyimba kwa liŵangalyo. Pelepo jwakutaga mbopesi agombelesyeje kuti mundujo ali jwamswela. Chelecho chigambile kuŵa chikanga wamba chachikopweche paliŵangalyo.

29 “Naga mumtwe kapena pachipundi pa mundu jwalijose patandite ulwele, 30 jwakutaga mbopesi awuloleje ulwelewo. Naga akuyiwona kuti ulwelewo ujinjile mkati pachilupo nambosoni wumbo syakwe sinyolwele soni sichenjile mtundu ni kuŵa syakale, pelepo jwakutaga mbopesijo agombelesyeje kuti mundujo ali jwangaswejela. Welewo uli ulwele wawukamwile lipende lya mumtwe kapena kundewu. Welewo uli ulwele wa matana wawutandite mumtwe kapena kuchipundi. 31 Nambo naga jwakutaga mbopesijo akuyiwona kuti ulwelewo nganiwujinjila mkati pachilu cha mundujo soni pamalopo pangali wumbo syepiliwu, pelepo jwakutaga mbopesijo amŵicheje kwajika mundu jwakwete ulwelejo kwa masiku 7. 32 Pa lisiku lya 7 lyelelyo, jwakutaga mbopesi awulolejesoni ulwelewo. Naga ulwelewo nganiwupitilisya kukula soni pamalopo nganipakopoka wumbo syakale nambosoni ulwelewo ukuwoneka kuti nganiwujinjila mkati pachilupo, 33 pelepo mundu jwakwete ulwelejo asenjeje wumbo syakwe soni ndewu syakwe. Nambo malo gagakamwile ulwelewo gaŵeje gangasenga. Kaneko jwakutaga mbopesi amŵicheje kwajika mundu jwakwete ulwelejo kwa masiku 7.

34 “Pa lisiku lya 7, jwakutaga mbopesi amlolejesoni mundujo pamalo pawukamwile ulwelewo. Naga ulwele wawukamwile lipende lya mumtwe kapena kundewuwo ngawukupitilisya kukula nambosoni yikuwoneka kuti ulwelewo nganiwujinjila mkati pachilupo, agombelesyeje kuti mundujo ali jwamswela. Kaneko mundujo achapeje yakuwala yakwe ni kuŵa jwamswela. 35 Nambo naga ulwelewo ukuwoneka kuti ukupitilisya kukula pachilupo panyuma pakuliswejesya, 36 jwakutaga mbopesi amlolejesoni mundujo. Naga ulwelewo ukupitilisya kukula, jwakutaga mbopesi ngakusosekwasoni kulola naga pana wumbo syakale. Mundu jwelejo ali jwangaswejela. 37 Nambo naga panyuma pakuti jwakutaga mbopesi amlolite mundujo, ni akuyiwona kuti ulwelewo ngawukupitilisya kukula soni kuti pawaliji ulwelepo pamesile wumbo syepiliwu, pelepo ni kuti ulwelewo uposile. Mundu jwelejo ali jwamswela mwamti jwakutaga mbopesi akusosekwa agombelesye kuti mundujo ali jwamswela.

38 “Naga mundu jwamlume kapena jwamkongwe pachilu pakwe pakopweche yikanga soni yikangayo yili yeswela, 39 pelepo jwakutaga mbopesi ayiloleje yikangayo. Naga mtundu wayikangayo utandite kusimasika, chelecho chigambile kuŵa chikanga wamba chachikopweche pachilu pakwe. Mundu jwelejo ali jwamswela.

40 “Naga mundu akupalapatika wumbo syakundungu ni kutenda lulasi, jwalakwejo ngaŵa kuti ali jwangaswejela. 41 Kapena naga mundu akupalapatika wumbo syakusogolo nikutenda lulasi, jwelejosoni ngaŵa kuti ali jwangaswejela. 42 Nambo naga palulasipo, chinga lwakundungu kapena lwapasogolo pa mtwe wakwe, pakopweche yilonda yakuwoneka mwine mwechejewu mwine mweswela, welewo uli ulwele wa matana wawutandite kundungu kapena pasogolo pa mtwe wakwe. 43 Panyuma pakuti jwakutaga mbopesi amlolite mundujo ni kuyiona kuti yilonda yayikopweche pa lulasi lwakwe lwa kundungu kapena lwa pasogolo pa mtwe wakwe, yikuwoneka yamtundu wechejewu mwine mweswela, soni komboleka kuti uli ulwele wa matana, 44 mundu jwelejo ali jwamatana. Pelepo mundujo ali jwangaswejela, mwamti jwakutaga mbopesi akusosekwa agombelesye kuti mundujo ali jwangaswejela ligongo lya ulwele wa matana wawutandite mumtwe mwakwe. 45 Mundu jwamsimene ni ulwele wa matana awaleje yakuwala yepapuchepapuche soni wumbo syakwe akasisamalilaga. Mundujo awunichilejesoni ndewu syakwe syapalugomo ni apiteje mchigumila kuti, ‘Ndili jwangaswejela, ndili jwangaswejela!’ 46 Mundujo aŵeje jwangaswejela kwandaŵi josope jakwete ulwelewu. Pakuŵa jwalakwe ali jwangaswejela, akusosekwa atameje kwakutalikangana ni ŵandu. Malo gakwe gakutama gaŵeje kusa kwa malo gakunjile ŵandu matenti.

47 “Naga ulwele wa matana ukubuka pachakuwala, chinga chakuwalacho chili chakupanganya ni ubweya* kapena changuwo, 48 chinga matanago gakamwile ulusi wa chakuwala changuwocho kapena chaubweya, kapenasoni chinga gakamwile lipende lya nyama kapena pa chindu chilichose chakupanganyidwa ni lipende lya nyama, 49 soni naga pachakuwalapo, palipende lya nyama, paulusi wa chakuwala, kapenasoni chindu chilichonse chakupanganya ni lipende lya nyama, pawukamwile ulwelewo patandite kuwoneka mtundu wa gilini jwakwawulila ku kale kapena mtundu wechejewu, welewo uli ulwele wa matana. Myoyo chindu chachikamwile ulwelecho akachilosyeje kwa jwakutaga mbopesi. 50 Jwakutaga mbopesi achiloleje chindu chachikamwile ulwelecho. Kaneko achiŵicheje kwa jika kwa masiku 7. 51 Pa lisiku lya 7, jwakutaga mbopesi achilolejesoni chinducho. Naga ayiweni kuti ulwelewo ujendelele pachakuwalacho, kapena paulusi wakwe kapenasoni palipende lya nyama, chinga lipendelyo likusakamula masengo gamtuli, gelego gali matana gakogoya. Chindu chachipatikene ni ulwelecho chiŵeje changaswejela. 52 Jwalakwejo achijocheje ni moto chindu chachikamwile ulwelecho, chinga chakuwala chakupanganya ni ubweya kapena changuwo kapenasoni chindu chilichose chakupanganya ni lipende lya nyama. Achijocheje chinducho ni moto ligongo gelego gali matana gakogoya.

53 “Nambo naga jwakutaga mbopesi panyuma pakuchilola chinducho akuyiwona kuti ulwelewo nganiwujendelela pa chakuwalacho kapena pa ulusi wa chakuwalacho kapenasoni pa chilichose chakupanganya ni lipende lya nyama, 54 pelepo jwakutaga mbopesi alamuleje kuti chindu chachikwete ulwelecho achichape. Kaneko jwalakwe achiŵicheje chinducho kwajika kwa masiku ganesoni 7. 55 Panyuma pakwe, jwakutaga mbopesi achilolejesoni chindu chachikwete ulwele chachichapilecho. Naga pamalo pawukamwile ulwelepo nganipachenga kawoneche kakwe, chindu chelecho chiŵeje changaswejela atamose kuti ulwelewo nganiwujendelela pachinducho. Chinducho mchijocheje ni moto ligongo lyakuti ulwelewo ulile mnope chinducho, chinga mkati mwakwe kapena kusa kwakwe.

56 “Nambo jwakutaga mbopesi palolite chinducho panyuma pakuchichapa ni akuyiwona kuti ulwelewo ukusimasika pamalo pawakamwilepo, jwalakwe apapuleje ni kutyosya malo gawakamwile ulwelego, chinga pa chakuwalacho kapena pa ulusi wa chakuwalacho kapenasoni palipende. 57 Nambope naga ulwelewo utanditesoni malo gane pachinducho, chinga pa chakuwala kapena pa ulusi wa chakuwalacho kapenasoni pa chindu chilichose chakupanganya ni lipende, pelepo nikuti ulwelewo ukwendelela. Myoyo chindu chachikwete ulwelecho achijocheje pa moto. 58 Nambo naga ulwelewo nganiwuwonekasoni pa chindu chaŵachapilecho, chinga pa chakuwala kapena pa ulusi wa chakuwala kapenasoni pachindu chilichose chakupanganya ni lipende, chindu chelecho mchichapejesoni kane. Pelepo chiŵeje cheswela.

59 “Lyeleli lili lilamusi lyakwamba ulwele wa matana pawukamwile chakuwala, chinga chakuwala chakupanganya ni ubweya, chakuwala chakupanganya ni nguwo kapena ulusi wa chakuwala kapenasoni pachindu chilichose chakupanganya ni lipende lya nyama. Asaleje kuti chinducho chili cheswela kapena chili changaswejela pakujigalila lilamusi lyeleli.”