Lefitiko

20 Yehofa ŵapitilisye kuŵecheta ni Mose kuti, 2 “Mwasalile Ayisalayeli kuti, ‘Mundu jwalijose jwakupeleka mwanache jwakwe kwa mlungu jwakolanjidwa kuti Moleki, nditu mumwulajeje mundu jwelejo, chinga mundujo ali Myisalayeli kapena jwamtundu wine jwakutama mu Isalayeli. Ŵandu ŵakutama mudela jakusatama mundu jwelejo akusosekwa kumwulaga mwakumponya maganga. 3 Une chinjimtumbilila mundu jwelejo soni chinjimwulaga kuti akasimanikwasoni pasikati pa ŵandu ŵakwe, ligongo lyakuti apeleche mwanache jwakwe kwa Moleki nambosoni ligongo lyakuti asakesye malo gangu geswela soni lina lyangu lyeswela. 4 Naga ŵandu ŵa mudelajo am’weni mundujo pakupeleka mwanache jwakwe kwa Moleki nambo ngakutendapo kandu mwakumwulaga mundujo, 5 pelepo chinjimtumbilila mundu jwelejo soni liŵasa lyakwe. Chinjimwulaga mundujo pampepe ni ŵandu wosope ŵaŵakamulene najo pakutenda yindu mwangakulupichika mwakumtindiŵalila Moleki.*

6 “‘Naga mundu akuwusya lunda kwa ŵandu ŵakuŵechetana ni misimu kapena ŵakutenda yisango, welewo uli ungakulupichika kwa une.* Nditu mundu jwelejo chinjimtumbilila soni chinjimwulaga kuti akasimanikwasoni pasikati pa ŵandu ŵakwe.

7 “‘Jemanja mliswejesyeje ni kuŵa ŵaswela ligongo une ndili Yehofa Mlungu jwenu. 8 Nambosoni msunjeje malamusi gangu ni kugakuyaga. Une ndili Yehofa jwangumswejesya jemanja.

9 “‘Naga pasimanikwe mundu jwakwatembelela babagwe kapena mamagwe, nditu mundu jwelejo mkusosekwa kumwulaga. Pakuŵa jwalakwe ŵatembelele babagwe kapena mamagwe, myasi jakwe jiŵeje pamtwe pakwe.

10 “‘Sambano chilango chakusosekwa kupochela mundu jwatesile chikululu ni ŵakongwe ŵasyene ni achi: Mundu jwatesile chikululu ni ŵakongwe ŵasyene nditu mumwulajeje mundu jwelejo. Mwawulajeje wosopewo, jwamlume ni jwamkongwejo. 11 Mundu jwagonene ni mamagwe, ŵatesisye sooni babagwe.* Wosope awulajidweje nditu. Myasi jawo jiŵeje pamtwe pawo. 12 Naga mundu akugonana ni akwegwe ŵakwe,* nditu mkusosekwa kwawulaga wosopewo. Kweleko kuli kutenda yindu mwakutindana ni dongosolo ja Mlungu. Myasi jawo jiŵeje pamtwe pawo.

13 “‘Naga jwamlume akugonana ni jwamlume mjakwe mpela yakusati pakugonana ni jwamkongwe, jemanjajo atesile chindu chakunyalaya. Mkusosekwa kwawulaga wosopewo nditu, soni myasi jawo jiŵeje pamtwe pawo.

14 “‘Naga mundu alombele ŵakongwe, ngakusosekwa kuti agonanejesoni ni mama ŵawo ŵakongwewo, ligongo jeleji jili ndamo jakutesya sooni. Mwajocheje pamoto wosope ŵatatuwo ni chakulinga chakuti ndamo jakutesya soonijo jikapitilisya pasikati penu.

15 “‘Naga jwamlume akugonana ni chinyama, jwamlumejo mkusosekwa kumwulaga nditu nambosoni mchimwulajeje chinyamacho. 16 Naga jwamkongwe alipeleche kwa chinyama kuti agonane nacho mkusosekwa kumwulaga jwamkongwejo soni chinyamacho. Nditu mkusosekwa kumwulaga jwamkongwejo soni chinyamacho. Myasi jawo jiŵeje pamtwe pawo.

17 “‘Naga jwamlume akugonana ni alumbuŵawo, chinga alumbuŵawo ŵakuŵeleka babagwe kapena mamagwe, mwamti jwamlumejo awuweni umakonope wa alumbuŵawowo nambosoni alumbuŵawowo awuweni umakonope wa jwalakwejo, jeleji jili ndamo jakutesya sooni. Jemanjaji akusosekwa kuwulajidwa pameso pa ŵandu ŵawo. Jwamlumejo ŵatesisye sooni alumbuŵawowo,* myoyo ajanjeje magambo pa chakulemwa chakwecho.

18 “‘Naga jwamlume akugonana ni jwamkongwe pandaŵi jakoga,* jwamlume soni jwamkongwejo nganachimbichisya myasi. Wosopewo akusosekwa kuwulajidwa kuti akasimanikwasoni pasikati pa ŵandu ŵawo.

19 “‘Mkagonana ni mama ŵenu ŵakulungwa kapena ŵanandi kapenasoni baba ŵenu ŵakongwe ligongo kutenda yeleyi uli ungachimbichisya ulongo. Ŵandu ŵaŵili wosopewo akusosekwa kwanga magambo pa chakulemwa chawocho. 20 Mundu jwagonene ni alongo ajawo babagwe, mundu jwelejo ŵatesisye sooni alongo ajawo babagwewo.* Jemanjajo akusosekwa kwanga magambo pa ulemwa watesilewo. Akusosekwa kuwulajidwa kuti akakolasoni mwanache pa yindu yatesileyo. 21 Naga jwamlume agonene ni ŵakongwe ŵa akuluŵawo kapena apwawo, jelejo jili ndamo jakunyalaya. Jwalakwe ŵatesisye sooni akuluŵawo kapena apwawowo.* Jemanjajo akusosekwa kuwulajidwa kuti akakolasoni mwanache pa yindu yatesileyo.

22 “‘Mpikanileje malamusi gangu gosope soni yosope yangumlamulayi. Mkusosekwa mkuyeje yeleyi ni chakulinga chakuti chilambo changumjinjisya jemanja kuti mkatameje chikaja kumjasa. 23 Mkajaga kukuya malamusi ga ŵandu ŵamitundu jine ŵangwatopola pameso penu, pakuŵa jemanjajo akusatendaga yindu yosope yeneyi mwamti une ngusaŵengana nawo. 24 Ni ligongo lyakwe namsalile jemanja kuti, “Chimchijigala chilambo chawocho nambosoni une chinjichipeleka chilambocho kwa jemanja kuti chiŵe chenu, chilambo chakwenda mkaka ni uchi. Une ndili Yehofa Mlungu jwenu jwanamlekangenye jemanja ni ŵandu ŵamitundu jine.” 25 Mkusosekwa mlekanganyeje pasikati pa chinyama changaswejela ni chinyama cheswejele soni pasikati pa chijuni changaswejela ni chijuni cheswejele. Mkalisakasya ni chindu chilichose chanamsalile kuti chili changaswejela, chinga chinyama kapena chijuni kapenasoni chaumi chilichose chakwaŵa. 26 Mŵeje ŵaswela pameso pangu, ligongo une Yehofa ndili jwamswela, soni une ni jwangumlekanganya jemanja ni ŵandu ŵamitundu jine ni chakulinga chakuti mŵe ŵandu ŵangu.

27 “‘Jwamlume kapena jwamkongwe jwalijose jwakuŵecheta ni misimu kapena jwachisango,* mkusosekwa kumwulaga nditu mundu jwelejo. Mwawulajeje ŵandu ŵakutenda yeleyowo mwakwaponya maganga. Myasi jawo jiŵeje pamtwe pawo.’”