Buku Jandanda ja Samuyele
24 Sauli paŵagambile kuwuja kutyochela kukwatoposya Afilisiti ŵandu ŵamsalile jwalakwejo kuti, “Daudi ali mu chipululu cha Eni-gedi.”
2 Myoyo Sauli ŵajigele achalume ŵakwana 3, 000 ŵaŵasagwile kutyochela pasikati pa Ayisalayeli wosope, ni kwawula nawo kukumsosasosa Daudi soni achalume ŵakwe kumalwala kusyatamaga mbusi sya m’matumbi. 3 Sambano Sauli ŵayiche kumachinga ga ngondolo gakutaŵila ni maganga gagaliji mumbali mwa msewu. Kweleko kwaliji kwana mbanga jine ni jwalakwe jwajinjile mumbangamo kuti akalikamuchisye. Pandaŵiji Daudi pampepe ni achalume ŵakwe ŵaliji ali atemi kumalo gakusisika kunyuma kwa mbangajo. 4 Kaneko achalume ŵa Daudi ŵamsalile jwalakwejo kuti, “Lelo lili lisiku lyele Yehofa akumsalila mmwejo kuti, ‘Mlole ngumpeleka mdani jwenu mmyala mwenu, soni mtende najo yiliyose yamkuyiwona kuŵa yambone kwa mmwejo.’” Myoyo Daudi ŵanyakwiche ni kuja kukata kaguwo mwiŵanda mwa malaja gangali makono ga Sauli, msyenejo ali ngakumanyilila. 5 Nambo panyuma pakwe Daudi ŵalasile mnope mumtima* ligongo lyakuti ŵakatile kaguwo mwiŵanda mwa malaja gangali makono ga Sauli. 6 Jwalakwe ŵasalile achalume ŵakwe kuti, “Nganiyiŵa yambone pameso pa Yehofa kuti une natendele ambuje ŵangu yeleyi, ŵali jwamsagulidwe jwa Yehofa. Mpaka kuŵe kulemwa kuti njongole mkono ŵangu ni kwajimuchila, pakuŵa ŵalakwewo ali jwamsagulidwe jwa Yehofa.” 7 Ni maloŵe gelega, Daudi ŵalekasisye achalume ŵakwewo, soni jwalakwe nganiŵakunda jemanjajo kuti amjimuchile Sauli. Kaneko Sauli ŵakopweche mumbangamo ni kwawulaga.
8 Panyuma pakwe Daudi ŵajimwiche ni kukopoka mumbangamo ni ŵamŵilasile Sauli kuti, “Ambuje ŵangu mwenye!” Saulijo paŵagalawiche ni kulola munyuma, Daudi ŵatindiŵele ni kwinama kaneko ŵagonile mwakulola pasi. 9 Daudi ni ŵamwusisye Saulijo kuti, “Ligongo chichi akupikanila yakuŵecheta ŵandu yakuti, ‘Daudi akusaka kwawulasya wawojo’? 10 Lelo wawojo ayiweni ni meso gawo yatite Yehofa pakwapeleka mmyala mwangu mumbanga mula. Nambo mundu jwine paŵasalile kuti nawulaje wawojo une changamwile chanasa soni natite, ‘Une nganimba ndambasukwile mkono wangu ni kwajimuchila ambuje ŵangu, pakuŵa ŵalakwewo ali jwamsagulidwe jwa Yehofa.’ 11 Wawo baba ŵangu, alole kaguwo kamwiŵanda ka malaja gawo gangali makono kakali mmyala mwanguka, unetu pangatileje kaguwo keleka mwiŵanda mwa malaja gawo gangali makonogo nganinawulaga wawojo. Pelepatu sambano mpaka ayiwone kuti nganingola chakulinga chakuti nawulasye wawojo kapena kwajimuchila. Sonitu une nganinalemwechesya chilichose nambo wawojo akusakulasakula une kuti ambulaje. 12 Yehofa alamule jwali jwakulemwa pasikati pa wawojo ni une. Soni Yehofa ŵawuchisye wawojo mmalo mwa une, nambo mkono wangu ngawawulasya wawojo. 13 Mpela mwawukusaŵechetela mwambi* wa ŵandu ŵakala wakuti, ‘Chindu chakusakala chikusatyochela kwa mundu jwakusakala.’ Myoyo mkono wangu ngawawulasya wawojo. 14 Ligongo chichi mwenye jwa Ayisalayeli akusosasosa une? Ana une ndili ŵani kuti asosejesoseje? Mbwa jewe mpela une. Sonitu ndili mpela ndata. 15 Yehofa aŵe jwakwelusya soni alamule jwali jwakulemwa pasikati pa wawojo ni une. Jwalakwe chalole ni kumbechetela magambo gangu soni chalamule ni kungulupusya mmyala mwawo.”
16 Daudi paŵagambile kumalisya kumsalila maloŵe gelega Sauli, Saulijo jwatite, “Ana maloŵe gangupikanaga gali ga mmwejo mwanangu Daudi?” Pelepo Sauli ŵatandite kulila mwakwesya maloŵe. 17 Ni ŵamsalile Daudijo kuti, “Mmwejo mli ŵakulungama mnope kumbunda une, pakuŵa mmwejo mundendele une yindu yambone nambo une namwuchisye ni yindu yakusakala. 18 Lelo musalile une yindu yambone yamundendele pakundeka ngambulaga chitamilecho Yehofa ŵaliji ali ambeleche mmyala mwenu. 19 Pakuŵatu yili yangakomboleka kuti mundu ampate mdani jwakwe nambo ni kumleka ngamwulasya. Yehofa ampe yindu yambone mmwejo ligongo lya yindu yamundendele une lelo. 20 Sambano une manyilile kuti mmwejo nditu chimchiŵa mwenye soni kuti uchimwene wa Isalayeli uchiŵa mmyala mwenu mpaka kalakala. 21 Sambano mulumbilile une pameso pa Yehofa kuti ngasiyimjonanga ni kuyimasya yisukulu yangu yosope yakwika panyuma pangu. Soni kuti ngasimlimasya lina lyangu kuti likasimanikwa pasikati pa ŵandu ŵa m’nyumba ja baba ŵangu.” 22 Pelepo Daudi ŵamlumbilile Sauli, kaneko Sauli ŵanyakwiche ni kwawulaga kumangwakwe nambo Daudi yimpepe ni achalume ŵakwe ŵala ŵapite kuja kuuŵa kumalo gakusawusya kwikako.