Buku Jandanda ja Samuyele
25 Pali papite ndaŵi Samuyele ŵajasiche mwamti Ayisalayeli wosope ŵasongangene pampepe kuti akalile malilo gakwe soni kuti akamsiche jwalakwe m’malembe kunyumba jakwe ku Lama. Kaneko Daudi ŵanyakwiche ni kwawula ku chipululu cha Palana.
2 Sambano papali mundu jwine jwa ku Mawoni jwele jwakamulilaga masengo gakwe ku Kalimeli. Mundu jweleju jwaliji jwakusichila mnope, jwalakwe jwakwete ngondolo 3,000, mbusi 1,000, soni pandaŵiji jwalakwe ŵaliji ali mkusenga ubweya* wa ngondolo syakwe ku Kalimeli. 3 Lina lya munduju lyaliji Nabala soni lina lya ŵamkwakwe lyaliji Abigayeli. Ŵamkwakweŵa ŵaliji ŵalunda soni ŵakusalala. Nambo jwamlumeju jwaliji jwakumula mtima soni jwagambaga kutenda yindu yakusakala. Jwalakwe jwaliji jwa m’liŵasa lya Kalebe. 4 Kaneko Daudi ŵapikene ali kuchipululu kula kuti Nabala akusenga ubweya wa ngondolo syakwe. 5 Myoyo Daudi ŵatumisye anyamata ŵakwana 10 kwa jwalakwejo. Ni ŵasalile anyamatawo kuti, “Mjawule ku Kalimeli, soni pachimkayiche kwa Nabala mkamwusye ya umi wakwe mmalo mwangu. 6 Kaneko mkamsalile jwalakwejo kuti, ‘Mkole umi wawulewu soni yindu yimjendeleje chenene. Nambosoni yindu yajendeleje chenene ŵandu wosope ŵa m’liŵasa lyenu pampepe ni yindu yosope yakwete. 7 Une mbikene kuti mkusenga ubweya wa ngondolo syenu. Ŵakulisya yilango ŵenu paŵaliji ni m’weji, nganitwawulasya jemanjajo nambosoni pangali chindu chawo chilichose chachasoŵile pandawi josope jiŵaliji ku Kalimeli. 8 Mwawusye anyamata ŵenuwo soni jemanjajo chamsalile. Myoyo nguŵenda kuti mwasalalile mtima anyamata ŵangu pakuŵa tuyiche mundaŵi ja chisangalalo. Chonde mpeleche kwa ŵakutumichila ŵenu soni kwa mwanache jwenu Daudi chilichose champaka mkombole kutupa.’”
9 Myoyo anyamata ŵa Daudiwo ŵapite mmalo mwa jwalakwejo kukumsalila Nabala yosopeyi. Paŵagambile kumalisya kuŵecheta, 10 Nabala ŵajanjile ŵakutumichila ŵa Daudiwo kuti, “Ana Daudi ali ŵani, soni mwanache jwa Jese ali ŵani? Masiku aganotu ŵakutumichila ŵajinji akwatila achambuje ŵawo. 11 Ana une njigale mkate* wangu, mesi gangu soni nyama janawulajile ŵandu ŵangu ŵakusenga ubweya ni kuyipeleka kwa achalume ŵele ngangumanyilila kwatyochele?”
12 Pelepo anyamata ŵa Daudiwo ŵawujile ni ŵamsalile Daudijo maloŵe gosope gaŵaŵechete Nabala. 13 Ndaŵi jijojo Daudi ŵasalile achalume ŵakwe kuti, “Jwalijose ataŵilile upanga* wakwe.” Myoyo achalume ŵakwe wosopewo ŵataŵilile maupanga gawo. Nombenajo Daudi ŵataŵilile upanga wakwe. Achalume chiŵandika 400 ni ŵaŵapite ni Daudijo, nambo achalume ŵakwana 200 ŵasigele kuti alondeleje katundu.
14 Pandaŵiji jumo mwa ŵakutumichila ŵa Nambala ŵapite kukumsalila Abigayeli ŵaŵaliji ŵamkwakwe ŵa Nabalajo kuti, “Daudi ŵatumisye ŵamitenga kutyochela kuchipululu kukwasosela yambone ambuje ŵetu. Nambo ambuje ŵetuwo ŵaŵechetele jemanjajo yamwano. 15 Achalumewo ŵatutendelaga yindu yambone. Nganatuwulasya soni pangali chindu chilichose chachasoŵile pandaŵi josope jitwaliji ni jemanjajo kwitinjiko. 16 Jemanjaji ŵaliji mpela lipupa lyakutuchenjela chilo soni musi pandaŵi josope jatwaliji ni jemanjaji tuli mkulisya ngondolo. 17 Myoyo alole yampaka atende pakuŵa jwalakwe asimichisye ya kwikasya yakusawusya kwa ambuje ŵetu soni kwa ŵandu wosope ŵa m’nyumba jawo. Nambo ambuje ŵetuwo ali ŵakusawusya* mwamti pangali ŵampaka aŵechetane nawo.
18 Pelepo Abigayeli mwachitema ŵajigele mitanda ja mkate jakwana 200, milulo* jekulungwakulungwa jiŵili jetaje finyo, ŵawuleje ngondolo msano ni kusilinganya, tiligu jwemkalanjekalanje jwakana milingo msano ja seya,* makeke gakwana 100 ga yisogosi yejumu ya mipeleya, soni makeke gakwana 200 ga yisogosi yejumu ya nguju ni ŵayikwesisye yindu yosopeyi pa bulu. 19 Kaneko jwalakwe ŵasalile ŵakutumichila ŵakwe kuti, “Mlongolele, une chinamkuyeje panyuma penu.” Nambo jwalakwe nganamsalila chilichose Nabala ŵamkwakwe ŵala.
20 Sambano Abigayeli paŵatulukaga mwitumbi ali akwesile bulu, nombenajo Daudi ni achalume ŵakwe ŵatulukaga mwitumbi kwawulaga kwajwaliji jwalakwejo. Nambo nganamwonaga Abigayelijo ligongo litumbi lyamsisile jwalakwejo. Kaneko jwalakwe ŵasimene ni jemanjajo. 21 Sambano Daudi ŵaliji mkuŵecheta kuti, “Unetu nalondele yindu yosope ya mundu jweleju m’chipululu mula ngasaka malipilo galigose. Sonitu pangali chindu chakwe atamose chimo chachasoŵile. Nambo eti akumbuchisya yakusakala mmalo mwa yindu yambone yanamtendele. 22 Mlungu ŵape chilango* chekulungwa adani ŵa Daudi* naga pakwikanaga malaŵi kundaŵi chimbe ndili namlesile ni umi jwamlume jwalijose jwa m’nyumba jakwe.”
23 Abigayeli paŵagambile kumwona Daudi ndaŵi jijojo ŵatulwiche pa bulu jula ni ŵatindiŵele ni kwinama mpaka ngope jakwe pasi. 24 Kaneko jwalakwe jwatindiwele chiŵandika sajo sya Daudi ni kuŵecheta kuti, “Ambuje ŵangu anjimbe une magambo. Angunde une jwakutumichila jwawo jwamkongwe kuti mbechetane nawo, soni apikane maloŵe ga jwakutumichila jwawo jwamkongwe. 25 Chonde ambuje ŵangu akamkosya Nabala mundu jwangali mateju, pakuŵa jwalakwe ali mpela mwaliŵelele lina lyakwe. Pajatu lina lyakwe ali Nabala* mwamti ali jwakuloŵela. Nambo une jwakutumichila jwawo jwamkongwe nganinawona anyamata ŵele wawojo ambuje ŵangu ŵatumisye. 26 Sambano wawo ambuje ŵangu, une ngulumbila pameso pa Yehofa Mlungu jwaumi soni pameso pa wawojo kuti Yehofa ni juŵatendekasisye wawojo kuti akakola magambo ga myasi soni kuti mkono wawo ukawuchisya chakusakala. Adani ŵawo wosope soni jwalijose jwakusaka kwawulasya wawojo ambuje ŵangu aŵe mpela Nabala. 27 Sambano ambuje ŵangu apochele mitukaji jele jwakutumichila jwawo jwamkongwe ŵajigalile soni ajipeleche kwa anyamata ŵele akwakuya wawojo ambuje ŵangu. 28 Chonde akululuche ulemwa wa kapolo jwawo jwamkongwe, pakuŵa Yehofa ngasalepela kutendekasya nyumba ja ambuje ŵangu kuti jitame kwandaŵi jelewu, ligongo wawojo ambuje ŵangu akuputa ngondo sya Yehofa. Sonitu pangali chakusakala chilichose chachisimanikwe mwa wawojo m’masiku ga umi wawo wosope. 29 Mundu jwine pakusaka kwajimuchila wawojo ni kusosasosaga umi wawo, Yehofa Mlungu jwawo chachiwusunga chenene umi wa wawojo ambuje ŵangu mu msaku wa umi. Nambo umi wa adani ŵawo chachiwuponya kwakutalika mpela mwakusaponyela mundu maganga pakamulichisya masengo chinawo.* 30 Yehofa chachatendela ambuje ŵangu yindu yosope yambone yele jwalakwe ŵasasile soni chachasagula ambuje ŵanguwo kuŵa mlongola jwa Ayisalayeli. 31 Yeleyi pachiyitendekwa, wawojo ngasalitendela chanasa kapena kudandawula mumtima mwawo ligongo lyakuwulaga ŵandu ŵangalemwa soni ligongo lyakukunda kuti mkono wawo uwuchisye chakusakala. Yehofa pachachatendela yindu yambone wawo ambuje ŵangu, chonde chamkumbuchile jwakutumichila jwawo jwamkongwe.”
32 Pelepo Daudi ŵamjanjile Abigayelijo kuti, “Achimbichikwe Yehofa Mlungu jwa Ayisalayeli, jwele amtumisye mmwejo kuti msimane ni une lelojino. 33 Mlungu ampe upile mmwejo ligongo mtesile yindu mwalunda. Mlungu ampesoni upile ligongo lyakundendekasya une lelo kuti ngakola magambo ga myasi soni kuti ngawuchisya chakusakala ni makono gangu. 34 Yikaŵe kuti mmwejo nganimyika mwachitema kukusimana ni une, nditu ngulumbila kuti pakwikanaga malaŵi kundaŵi pangali jwamlume atamose jumo jwajukasigele ni umi m’nyumba ja Nabala. Ngulumbila nditu pameso pa Yehofa Mlungu jwaumi jwa Ayisalayeli jwele andekasisye une kuti ngamwulasya jemanja.” 35 Kaneko Daudi ŵapochele yindu yiŵamjigalile Abigayeli yila soni ŵamsalile jwalakwejo kuti, “Sambano wujilani kumangwenu soni mkadandawula chilichose. Unetu nampikanile mmwejo soni chindende yamŵendileyi.”
36 Panyuma pakwe Abigayeli ŵawujile kwa Nabala. Pandaŵiji Nabala ŵaliji ali mkulya m’nyumba jakwe mpela mwenye, mwamti Nabalajo ŵaliji ali mkusangalala soni ali akolelwe kwamnope kula. Nambo Abigayeli nganamsalila jwalakwejo chilichose mpaka kwachele. 37 Pakwachele kundaŵi, Nabala paŵalimanyilile ŵamkwakwewo ŵamsalile jwalakwejo yindu yosope yila. Paŵapikene yeleyi mtima wakwe waŵele mpela mtima wa mundu jwam’we, mwamti chilu chakwe chajumwile mpela liganga. 38 Panyuma pa masiku 10 Yehofa ŵampele chilango Nabala mwamti jwawile.
39 Daudi paŵapikene kuti Nabala awile jwalakwe ŵatite, “Achimbichikwe Yehofa, jwele ambechetele une magambo gangu gakwayana ni kunyosya kwaŵatesile Nabala. Jwalakwe amtendekasisye jwakutumichila jwakwe kuti akatenda chakusakala chilichose. Sonitu Yehofajo atendekasisye kuti kusakala kwa Nabala kumwujile msyene.” Kaneko Daudi ŵatumile ŵandu kuti akamwuchisye ulombela Abigayeli kuti aŵe ŵamkwakwe. 40 Myoyo ŵakutumichila ŵa Daudi paŵayiche kwa Abigayeli ku Kalimeli ŵamsalile jwalakwejo kuti, “Daudi atutumile kuti twajigale wawojo kuti akaŵe ŵamkwawo.” 41 Ndaŵi jijojo Abigayeli ŵajimwiche ni kutindiŵala mpaka ngope jakwe pasi ni ŵatite, “Une ndili apano kapolo jwawo soni ngoseche kuti ngatendeje utumiki wa kuchapa sajo sya ŵakutumichila ŵa ambuje ŵangu.” 42 Kaneko Abigayeli ŵajimwiche mwachitema ni kuja kukwela pa bulu jwakwe, soni ŵakutumichila ŵakwe ŵachakongwe ŵakwana msano ŵamkuyaga panyuma pakwe. Jwalakwe ŵajesile yimpepe ni ŵandu ŵaŵatumisye Daudi ŵala, soni jwaŵele ŵamkwakwe ŵa Daudijo.
43 Daudi ŵalombelesoni Ahinowamu jwa ku Yeseleeli, mwamti achakongwe ŵaŵiliŵa ŵaŵele achiŵamkwakwe.
44 Nambo Sauli ŵampeleche mwanache jwakwe Mikala juŵaliji ŵamkwakwe Daudi kwa Paliti mwanache jwa Layisi jwakutyochela ku Galimu.