Buku Jandanda ja Samuyele
30 Daudi ni achalume ŵakwe paŵakopochele ku Sikilagi pa lisiku lyatatu, ŵasimene kuti Aamaleki ŵaliji ali ajijimuchile mbali ja kummwela* soni msinda wa Sikilagi mwamti ŵawugomeche msinda wa Sikilagiwo ni kuwuchoma moto. 2 Aamalekiwo ŵajigele achakongwe soni ŵandu wosope ŵaŵaliji mu msindamo kutandila mwanache mpaka jwamkulungwa ni kwawula nawo ku ukapolo. Jemanjaji nganamwulaga mundu jwalijose, nambo ŵajigele ni kwawulaga nawo. 3 Daudi ni achalume ŵakwe ŵala paŵayiche ŵasimene kuti msindawo awuchomile moto, mwamti achiŵamkwawo, ŵanache ŵawo ŵachalume ni ŵachakongwe, Aamaleki ŵala ŵaliji ali ŵajigele kwawula nawo ku ukapolo. 4 Myoyo Daudi ni achalume ŵakwe ŵala ŵatandite kulila mwakwesya maloŵe mnope mpaka machili gakulilila gamalile. 5 Nombenawo achiŵamkwakwe ŵaŵili ŵa Daudi ŵajigalidwe. Achiŵamkwakweŵa ŵaliji Ahinowamu jwa ku Yeseleeli soni Abigayeli ŵele pandanda ŵaliji ŵamkwakwe Nabala jwa ku Kalimeli. 6 Daudi ŵalagasiche mnope mumtima ligongo achalume ŵakwe ŵakambilanaga yakuti amsome maganga. Yaliji myoyo ligongo achalume wosopeŵa ŵatumbile mnope pakuyiwona kuti ŵanache ŵawo ŵachalume ni ŵachakongwe ajigalidwe. Nambo Daudi ŵalilimbisye mwa Yehofa Mlungu jwakwe.
7 Kaneko Daudi ŵamsalile Abiyatala jwakutaga mbopesi juŵaliji mwanache jwa Ahimeleki kuti, “Myiche najo efodi akuno.” Myoyo Abiyatala ŵayiche najo efodijo kwa Daudi. 8 Sambano Daudi ŵamwusisye Yehofa kuti, “Ana najikuye gulu ja ŵachiswambaji? Ana chinapate jemanjaji?” Pelepo Yehofa ŵamjanjile jwalakwejo kuti, “Elo mwakuye, mwamti chimwapate jemanjaji nditu soni chimkakulupusye yindu yosope yajigele.”
9 Ndaŵi jijojo Daudi yimpepe ni achalume 600 ŵaŵaliji ni jwalakwe ŵanyakwiche ni ŵajile kuja kwika mpaka ku Chiŵata* cha Besoli. Ali ayiche kweleko achalume ŵane ŵasigele kukoko. 10 Kaneko Daudi yimpepe ni achalume 400 ŵapitilisye kwatoposya Aamaleki. Nambo achalume 200 ŵaŵalepele komboka Chiŵata cha Besoli ligongo lyakupela ŵasigele.
11 Kaneko ŵandu ŵaŵaliji ni Daudi ŵala ŵamsimene jwamlume jwine jwa ku Iguputo mwitinji ni ŵapite najo kwa Daudi. Jemanjaji ŵampele munduju yakulya soni mesi gakumwa. 12 Ŵampelesoni keke jwa yisogosi yejumu ya nguju soni makeke gaŵili ga yisogosi yejumu ya mipeleya. Munduju ali alile jwapatilesoni machili pakuŵa nganalya chilichose kapena kumwa mesi kwa masiku gatatu musi ni chilo. 13 Kaneko Daudi ŵamwusisye mundujo kuti, “Ana mmweji mli jwakutumichila jwa ŵani, soni ana kumangwenu kuli kwapi?” Pelepo mundujo ni ŵajanjile kuti, “Kumangwetu kuli ku Iguputo soni kapolo jwa mundu jwine jwa Chiamaleki. Nambo ambuje ŵanguwo andesile ligongo naliji mkulwala masiku gatatu gapitego. 14 Tujijimuchile mbali ja kummwela ja dela jakusatama Akeleti soni dela ja Ayuda nambosoni kummwela kwa dela ja Kalebe.* Nambo msinda wa Sikilagi tuwuchomile moto.” 15 Pelepo Daudi ŵamwusisye mundujo kuti, “Ana mpaka mumbechesye kwajijinjilile gulu ja ŵachiswamba jeleji?” Mundujo ni ŵajanjile kuti, “Naga akulumbilila pameso pa Mlungu kuti ngambulaga soni kuti ngaja kumbeleka mmyala mwa ambuje ŵangu, nikuti chinapechesye kwajili gulu ja ŵachiswambaji.”
16 Myoyo munduju ŵampechesye Daudi kwajaliji gulu ja ŵachiswambaji kwele ŵasimene ŵachiswambawo ali balalabalala kwineku ali mkulya, kumwa soni kusangalala ligongo lya yindu yaŵasumwile ku chilambo cha Afilisiti soni cha Yuda. 17 Kaneko Daudi ŵatandite kwawulaga jemanjaji kutandila kumasikusiku mpaka ligulo, mwamti pangali mundu juŵakulupwiche kulekapo achalume 400 ŵaŵatisile pangamila. 18 Daudi ŵakulupwisye yindu yosope yaŵajigele Aamaleki mwamti jwalakwe ŵakulupwisyesoni achiŵamkwakwe ŵaŵili ŵala. 19 Pangali chindu chilichose chachasoŵile pa yindu yiŵasumwile jemanjajo, kutandila chamwana mpaka chekulungwa. Daudi pampepe ni achalume ŵakwe ŵakulupwisye ŵanache ŵawo ŵachalume soni ŵachakongwe pampepe ni yindu yawo yosope yaŵasumwile Aamaleki. Daudi ŵakulupwisye yindu yosope yaŵajigele jemanjaji. 20 Myoyo Daudi ŵajigele ngondolo syosope soni ng’ombe syaŵasumwile Aamalekiwo soni yilango yine yosope yaŵakwete jemanjajo. Achalume ŵa Daudiwo ŵaŵechetaga kuti, “Ayi yili yindu yasumwile Daudi.”
21 Kaneko Daudi ŵayiche kwaŵaliji achalume 200 ŵaŵalepele kumkuya jwalakwe ŵala ligongo lya kupela soni ŵele ŵaŵasigalile munyuma mu Chiŵata cha Besoli. Jemanjajo ŵapite kukumchingamila Daudi pampepe ni achalume ŵaŵaliji najo. Daudi paŵaŵandichile achalumeŵa ŵawusisye jemanjajo mwawuŵelele umi wawo. 22 Nambo achalume ŵane ŵanganakola mtima wambone soni ŵaŵaliji ŵangali mate ŵaŵajesile ni Daudi ŵatandite kuŵecheta kuti, “Pakuŵa jemanjaji nganalongana yimpepe ni m’weji, ngatukusosekwa kwapa chilichose pa yindu yatukulupwisyeyi. Chitugambe kwakunda kuti ŵajigale achiŵamkwawo soni ŵanache ŵawo ni ajawuleje.” 23 Nambo Daudi ŵasalile jemanjajo kuti, “Chonde mkatenda yeleyi achalongo achimjangu, yinduyitu atupele Yehofa. Jwalakwe atuchenjele m’weji soni apeleche mmyala mwetu gulu ja ŵachiswamba jajayiche kukutujimuchila m’weji. 24 Ana ŵani ŵampaka akamulane ni yamkuŵechetayo? Yindu yachapochele mundu juŵapite kungondo chiyiŵe yakulandana ni yindu yachapochele mundu juŵatemi ni kulindililaga katundu. Jwalijose chapochele yindu yakulandana ni mjakwe.” 25 Kutandila palisikuli, lyeleli lyaŵele lilamusi lyaŵalitamilikasisye jwalakwe kuti Ayisalayeli wosope alikuyeje mpaka lelojino.
26 Daudi paŵawujile ku Sikilagi ŵatumisye yine mwa yindu yiŵakulupwisyeyo kwa achakulungwakulungwa ŵa ku Yuda ŵaŵaliji achimjakwe. Jwalakwe ŵasalile kuti, “Apochele kweleko mtuka watutumisye kutyochela pa yindu yatusumwile kwa adani ŵa Yehofa.” 27 Jwalakwe ŵatumisye mitukajo kwa achakulungwakulungwa ŵa ku Beteli, ŵa ku Lamoti jwa ku Negebu,* ŵa ku Yatili, 28 ŵa ku Aloeli, ŵa ku Sifimoti, ŵa ku Esitemowa, 29 ŵa ku Lakali, ŵa ku misinda ja ku Yelamele, ŵa ku misinda ja Akeni, 30 ŵa ku Holima, ŵa ku Bolasani, ŵa ku Ataki, 31 ŵa ku Hebuloni soni kwa wosope ŵa ku madela gele Daudi pampepe ni achalume ŵakwe ŵapitileko.