Masalimo
BUKU JAMCHECHE
Lipopelo lya Mose, jwakutumichila jwa Mlungu jusyesyene.
90 Wawo Yehofa, wawojo aŵele malo getu gakutama ku mibado* josope.*
2 Matumbi mkanigaŵe kupagwa
Nambosoni mkanaŵe kupanganya* chilambo chapasi soni malo gakutama ŵandu,
Kutandila kalakala soni mpaka kalakala, wawojo ali Mlungu.
3 Wawojo akusatendekasya ŵandu kuwujila kwitaka.
Wawojo akusati, “Mwujile kwitaka, jemanja ŵanache ŵa ŵandu.”
4 Pakuŵa yaka 1,000 kwa wawojo yili mpela lisiku lyalipiteli.
Yikusamala mwachitema mpela ulonda umo wa chilo.
5 Wawojo akusiŵapyajila ŵandu, mwamti jemanjajo ŵangawonekasoni mpela mwalukusamalila lugono.
Jemanjajo ali mpela manyasi gagakusasipuka kundaŵi.
6 Kundaŵiko gakusasipuka soni kutenda maluŵa.
Nambo pakwikana ligulo gakusanyala soni kumula.
7 Pakuŵa tumasile ligongo lya ukali wawo,
Soni tukutenda woga ligongo lya kutumbila kwawo.
8 Yakulemwa yetu ayiŵisile pameso pawo.*
Kuŵala kwa ngope jawo kukusayiŵika pakulanguka yindu yatukusatenda mwakusisa.
9 Masiku getu gakusamala mwapanandipanandi* ligongo lya ukali wawo.
Soni yaka yetu yikusamala mwachitema mpela kusongona.*
10 Yaka yatukusatama ni umi yili 70 basi,
Kapena 80 naga mundujo akwete machili.*
Nambo yaka yosopeyi yikusagumbalana ni yakusawusya soni yipwetesi.
Yikusamala mwachitemachitema, kaneko tukusatyoka ngawonekasoni.
11 Ana ŵani ŵampaka apikanichisye machili ga ukali wawo?
Ukali wawo uli wekulungwa mwakulandana ni woga watukusakola kwa wawojo.
12 Atujiganye mwampaka tuŵalanjile masiku ga umi wetu
Ni chakulinga chakuti tukole mtima wa lunda.
13 Wawo Yehofa, atandilesoni kutunonyela. Ana yindu chiyiŵe myiyi mpaka chakachi?
Ŵatendele chanasa ŵakutumichila ŵawo.
14 Kundaŵi atulosye chinonyelo chawo chakulupichika mwakwanila,
Ni chakulinga chakuti twajimbileje mwakusangalala soni tupocheleje masiku gosope ga umi wetu.
15 Atutendekasye kuti tuŵe ŵakusangalala mwakamulana ni winji wamasiku gatuŵele tuli mkulagasika,
Soni mwakamulana ni winji wa yaka yatuŵele tuli mkusimana yakusawusya.
16 Nguŵenda kuti ŵakutumichila ŵawo agawone masengo gawo,
Soni ŵanache ŵawo awuwone uchimbichimbi wawo.
17 Nguŵenda kuti Yehofa Mlungu jwetu atupe upile.
Agatendekasye* masengo ga makono getu kutujendela chenene.
Nditu, agatendekasye* masengo ga makono getu kutujendela chenene.