Buku Jaŵili ja Samuyele
9 Kaneko Daudi ŵatite, “Ana pana jwine jwalijose jwasigele m’liŵasa lya Sauli jwampaka namlosye chinonyelo changamala ligongo lya Yonatani?” 2 Sambano papali jwakutumichila jwine jwa m’liŵasa lya Sauli lina lyakwe Siba. Myoyo ŵapite kukumŵilanga Sibajo kuti ajawule kwa Daudi, mwamti mwenyewo ŵamwusisye jwalakwejo kuti, “Ana mmwejo mli Siba?” Pelepo jwalakwe ni ŵajanjile kuti, “Elo ndili une jwakutumichila jwawo.” 3 Mwenyewo ni ŵamwusisye jwalakwejo kuti, “Ana pana jwalijose jwasigele m’liŵasa lya Sauli jwampaka namlosye chinonyelo changamala cha Mlungu?” Siba ni ŵajanjile mwenyewo kuti, “Jupali mwanache jumo jwamlume jwa Yonatani jwali jwamlemale sajo syakwe.” 4 Mwenyewo ŵamwusisye jwalakwejo kuti, “Ni ali kwapi?” Siba ni ŵajanjile mwenyewo kuti, “Ali ku Lo-debala ku nyumba ja Makili mwanache jwa Amiyele.”
5 Mwachitemachitema Mwenye Daudiwo ŵatumisye ŵandu kuti akamjigale Mefibosetijo ku nyumba ja Makili mwanache jwa Amiyele ku Lo-debalako. 6 Mefiboseti mwanache jwa Yonatani juŵaliji chisukulu cha Sauli paŵayiche kwa Daudi, ndaŵi jijojo ŵatindiŵele ni kwinama kaneko ŵagonile mwakulola pasi. Pelepo Daudi ŵatite, “Mefiboseti!” Jwalakwe ni ŵajanjile kuti, “Une ndili apano jwakutumichila jwawo.” 7 Kaneko Daudi ŵamsalile jwalakwejo kuti, “Mkajogopa, pakuŵa unejo chinamlosye nditu chinonyelo changamala ligongo lya baba ŵenu Yonatani, mwamti chinamwuchisye malo gosope ga Sauli ŵali anganga wenu. Nambosoni mmwejo chimlyeje ni une pa tebulo jangu ndaŵi syosope.”
8 Pelepo Mefiboseti ŵatindiŵele ni kwinama ni ŵatite, “Ana une jwakutumichila jwawo ndili ŵani, kuti ŵawojo andosye umbone mtima, mbwa jewe mpela une?” 9 Kaneko mwenyewo ŵatumile ŵandu kuti akamŵilanje Siba jwamasengo jwa Sauli, ni ŵamsalile jwalakwejo kuti, “Yindu yosope yayaliji ya Sauli soni yosope ya m’nyumba jakwe nguyipeleka kwa chisukulu cha ambuje ŵenuwo. 10 Mmwejo, ŵanache ŵenu soni ŵakutumichila ŵenu chimkamlimileje Mefiboseti mu mgunda wakwe. Nambosoni chimsonganganyeje yamtyosisye kumigundako kuti ŵandu ŵa m’liŵasa lya chisukulu cha ambuje ŵenu apateje yakulya yakuti alyeje. Nambo Mefiboseti chisukulu cha ambuje ŵenuwo chalyeje ni une pa tebulo jangu ndaŵi syosope.”
Siba ŵakwete ŵanache 15 soni ŵakutumichila ŵakwana 20. 11 Kaneko Siba ŵajanjile mwenyewo kuti, “Jwakutumichila jwawo chatende yosope yele ambuje ŵangu mwenye alamwile kuti jwakutumichila jwawo atende.” Myoyo Mefiboseti ŵalyaga pa tebulo ja Daudi* mpela mwayaŵelaga ni ŵanache ŵa mwenye. 12 Mefiboseti ŵakwete mwanache jwamlume lina lyakwe Mika. Nambosoni ŵandu wosope ŵaŵatamaga m’nyumba ja Siba ŵaŵele ŵakutumichila ŵa Mefiboseti. 13 Myoyo Mefibosetijo ŵatamaga ku Yelusalemu ligongo lyakuti ndaŵi syosope ŵalyaga pa tebulo ja mwenye, sonitu jwalakweju jwaliji jwamlemale sajo syakwe syosope.