Ekisodo

28 “Mkusosekwa mumsagule mkulugwenu Aloni pampepe ni ŵanache ŵakwe ŵachalume kutyochela pa Ayisalayeliwo kuti aŵe ŵakutaga mbopesi ni kundumichilaga une. Alonijo akusosekwa kutumichila pampepe ni ŵanache ŵakwe ŵachalume ŵali Nadabu soni Abihu, Eliyesala soni Itamala. 2 Mumpanganyichisye mlongomjenu Aloni yakuwala yapajika kuti yimpeje uchimbichimbi soni kusalala. 3 Mŵechete ni ŵandu wosope ŵakumanyilila chenene kupanganya yindu, wosope ŵanapele msimu wa lunda, kuti ampanganyichisye Aloni yakuwala yakuti yimswejesye ni chakulinga chakuti jwalakwe aŵe jwakutaga mbopesi ni kundumichilaga une.

4 “Yakuwala yakusosekwa kuyipanganya yili ayi: chakuwala pamtima, efodi, malaja gangali makono, mkanjo wamandalasi, nduŵila soni lamba jwakutaŵa m’chiwunu. Jemanjajo akusosekwa kupanganya yakuwala yapajikayi kuti yiŵe ya mlongomjenu Aloni soni ŵanache ŵakwe ni chakulinga chakuti andumichile une mpela ŵakutaga mbopesi. 5 Ŵakupanganya yinduwo akusosekwa akamulichisye masengo golide, ulusi wabuluwu, ubweya wakwawulila ku uchejewu, ulusi wechejewu mnope, soni nguwo jambone mnope.

6 “Apanganye efodi pakamulichisya masengo golide, ulusi wabuluwu, ubweya wakwawulila ku uchejewu, ulusi wechejewu mnope, soni ulusi weluche chenene nambosoni efodijo aŵe jwampete ni golide. 7 Efodijo jukole nguwo siŵili, jimo jakutyochela kunyuma jine kusogolo, ni silumbikane m’makoyo. 8 Lamba jwakuluka jwakutaŵilila mu efodi ni chakulinga chakuti efodijo jutame chenene m’malo mwakwe akusosekwasoni kumpanganya pakamulichisya masengo yindu ayi: golide, ulusi wabuluwu, ubweya wakwawulila ku uchejewu, ulusi wechejewu mnope, soni ulusi weluche chenene.

9 “Mjigale maganga gaŵili ga onekisi ni kulemba pamagangago mena ga ŵanache ŵachalume ŵa Isalayeli mwakutenda kusokola. 10 Mena 6 gaŵe pa liganga limo, soni mena 6 ganego gaŵe pa liganga linelyo. Menago mgalembe pakujigalila mwanache jwamkulungwa mpaka jwamnandi. 11 Jwakusokola maganga akusosekwa kulemba mena ga ŵanache ŵa Isalayeliwo pamaganga gaŵiligo mpela mwakusasokolela pakupanganya chidindo. Kaneko chimŵiche magangago mu yakuŵichila yakwe yagolide. 12 Mkusosekwa kuŵika maganga gaŵili m’makoyo mwa chakuwala cha efodicho kuti gaŵe maganga gakwakumbuchilila ŵanache ŵa Isalayeli. Soni Aloni pakuja kuwonechela pameso pa Yehofa akusosekwa anyakuleje menago panguwo syakwe siŵili sya m’makoyo kuti chiŵe chakwakumbuchilila Ayisalayeli. 13 Mpanganye yakuŵikamo maganga yagolide. 14 Mpanganyesoni mikufu jiŵili jagolide jwambone mnope soni jiŵe jepilinganye ni kuŵa mpela ngonji. Kaneko mjigale mikufu jepilinganye mpela ngonji jila ni kujitaŵilila mu yakuŵichila maganga yagolide yila.

15 “Mumpate mundu jwakumanyilila kupeta yakuwala kuti apanganye chakuwala pamtima chakweluchisya. Chakuwala pamtimacho achipanganye mpela chakuwala cha efodi pakamulichisya masengo golide, ulusi wabuluwu, ubweya wakwawulila ku uchejewu, ulusi wechejewu mnope soni ulusi weluche chenene. 16 Chakuwalacho pamchipindile chiŵeje chakulandana mbali syosope. M’chilewu muŵeje ligasa* limo, soni m’chijipi mwakwe muŵeje ligasa limo. 17 Kaneko mjigale maganga gala ni kugaŵika pa chakuwala pamtimacho m’misela jakwana mcheche. Pamsela wandanda mŵiche maganga ga lubi, topasi soni emeladi. 18 Pamsela waŵili mŵiche maganga ga takoisi, safilo soni yasipa. 19 Pamsela watatu mŵiche maganga ga lesemu, agate soni ametusito. 20 Pamsela wamcheche mkaŵiche maganga ga kilisolayiti, onekisi soni yade. Magangago gatame mu yakuŵichila maganga yagolide. 21 Magangago mgaŵiche mwakamulana ni mena ga ŵanache 12 ŵa Isalayeli. Liganga lililyose likusosekwa kulemba mwakutenda kusokola mpela mwakusasokolela pakupanganya chidindo. Liganga lililyose likole lina lyakwimila mbumba* jimo pa mbumba syosope 12.

22 “Mpanganye mikufu jagolide jwambone mnope ni kujitaŵilila pachakuwala pamtimacho. Mikufujo jiŵe jepote mpela ngonji. 23 Mpanganyesoni mbete siŵili syagolide syakuŵika pachakuwala pamtima. Kaneko ni mŵiche mbete siŵilisyo m’makona gaŵili ga chakuwala pamtimacho. 24 Mjinjisye ngonji siŵili syagolidesyo mumbete siŵili syasili m’makona mwa chakuwala pamtimacho. 25 Kaneko ngonji siŵilisyo msijinjisye mu yakuŵichila maganga yiŵili yila ni kusitaŵilila kusogolo kwa nguwo ja m’makoyo ja chakuwala cha efodi chila. 26 Mpanganyesoni mbete siŵili syagolide ni kusiŵika m’makona gane gaŵiligo kusyeto kwa chakuwala pamtima, mwakulolegana ni efodi. 27 Mpanganyesoni mbete sine siŵili syagolide ni kusiŵika kusogolo kwa efodijo cha pasi pa nguwo siŵili sya m’makoyo mwakuŵandikana ni pamalo pasilumbikanile nguwo siŵilisyo soni chapenani pa lamba jwa efodi. 28 Chakuwala pamtimacho kuti chitame chenene pamalo gakwe akusosekwa achitaŵeje ni lukonji lwabuluwu. Lukonjilo lupite mumbete syasili kusyeto kwa chakuwala pamtimacho ni kuja kutaŵila mumbete sya mu efodi. Yeleyi chiyitendekasyeje kuti chakuwala pamtimacho chitameje pamalo gakwe penani pa efodipo, chapenani pa lamba jula.

29 “Pandaŵi jakwinjila ku Malo Geswela, Aloni awaleje chakuwala pamtima chakamulichisya masengo pakwelusya chachikwete mena ga ŵanache ŵa Isalayeli. Atendeje yeleyi kuti chiŵe mpela chakwakumbuchilila ŵanache ŵa Isalayeli pameso pa Yehofa ndaŵi syosope. 30 Mkusosekwa kuŵika Ulimu soni Tumimu* mu chakuwala pamtima chakweluchisyacho, soni yiŵeje pamtima pa Aloni pandaŵi jakwinjila kuja kuwonechela pameso pa Yehofa. Aloni anyakuleje yeleyi pamtima pakwe kuti ayikamulichisyeje masengo pakwawelusya ŵanache ŵa Isalayeli pakuja kuwonechela pameso pa Yehofa ndaŵi syosope.

31 “Mpanganyesoni malaja gangali makono ga efodi. Malaja gosopego gaŵe gakupanganya ni ulusi wabuluwu. 32 Malajago gakole malo gewugule* penani pakwe chapakatikati. Mkusosekwasoni kuminika ni kaguwo kane mumbali mwa malo gosope gewugulego. Malo gewugulego gaŵe mpela lukosi lwa chakuwala cha kungondo chakola maŵamba gachisyano ni chakulinga chakuti mumbalimo mukapapukaga. 33 Mpanganye yindu ya ulusi wabuluwu yakuwoneka mpela yisogosi, ubweya wakwawulila ku uchejewu soni ulusi wechejewu mnope kusyungulila mumbali mosope mwa pasi pa malajago. Mŵichesoni mabelo gagolide pasikati pa yisogosiyo. 34 Mkusosekwa kuŵika mabelo gagolidego soni yisogosiyo mwakuchenganachengana, mŵicheje belo jagolide kaneko chisogosi, belo jagolide kaneko chisogosi kusyungulila mumbali mosope mwa pasi pa malaja gangali makonogo. 35 Aloni akusosekwa awaleje malajago pakutumichila, soni masegwe ga mabelo ni yisogosiyo gakusosekwa gapikanicheje jwalakwe pakuja kuwonechela pameso pa Yehofa kumalo geswela ni chakulinga chakuti akawa.

36 “Mpanganyesoni kachisyano kepwapwatiche kakunyesimila kagolide jwambone mnope soni mlembe mwakusokola pakasyanopo mpela mwakusasokolela pakupanganya chidindo. Mlembepo maloŵe gakuti, ‘Yehofa ali msyene ndamo jeswela.’ 37 Mkusosekwa kukataŵa chenene kachisyanoko munduŵila ni lukonji lwabuluwu. Kachisyanoko kakusosekwa katameje pasogolo panduŵilajo. 38 Kachisyanoko kakusosekwa kaŵeje pausyo pa Aloni, mwamti Alonijo chachisosekwa kwanga naga mundu jwine akwete magambo pa yindu yeswela yele Ayisalayeli ŵayiswejesye paŵayipelekaga kuti yiŵe mbopesi syeswela. Kachisyanoko kakusosekwa kuti kakatyokaga pausyo pakwe ni chakulinga chakuti Yehofa ŵajitichisyeje Ayisalayeliwo.

39 “Mpanganyesoni mkanjo wamandalasi wanguwo jambone soni mpanganye nduŵila ja nguwo jambone. Nambosoni mpanganye lamba jweluche chenene.

40 “Mpanganyesoni mikanjo, malamba ni mipango jakutaŵa mumtwe ja ŵanache ŵa Aloni ni chakulinga chakuti aŵeje ŵakuchimbichika soni ŵakusalala. 41 Mum’weche yeleyi Aloni, mkulugwenu pampepe ni ŵanache ŵakwe. Mwasagule jemanjaji soni mwape machili ni kwaswejesya ni chakulinga chakuti aŵe ŵakutaga mbopesi ni kundumichilaga une. 42 Nambosoni mwapanganyichisye jemanjaji makabudula* ni chakulinga chakuti asiŵeje umakonope wawo. Makabudulago gaŵe gelewu kutyochela m’chiwunu mpaka muyiga. 43 Aloni pampepe ni ŵanache ŵakwe awaleje yakuwala yeleyi pandaŵi jakwinjila muchitenti chakusimanilana kapena pakwawula pa malo gakupelechela mbopesi kuti akatumichile pamalo geswela ni chakulinga chakuti akakola magambo ni kuwa. Lyeleli lili lilamusi lyakutamilichika lyakuti jwalakwe alikuyeje pampepe ni ŵanache* ŵakwe wosope ŵakwika msogolo.