Masalimo

Kwa jwakulongolela nyimbo. Ajimbe nyimboji ni yakwimbila yangonji yakulila Siminiti.* Nyimbo ja Daudi.

6 Wawo Yehofa, akanjamuka ali atumbile,

Soni akanjongolela ali apile mtima.

2 Andendele chanasa, wawo Yehofa, pakuŵa machili gangu gakumala.

Wawo Yehofa ambosye, pakuŵa mawupa gangu gakutetemela.

3 Elo, sokonechele mnope nganisyo.

Ngusaka nawusye wawo Yehofa, ana chajembecheye mpaka chakachi?

4 Awujile kwa une wawo Yehofa, soni angulupusye.

Angulupusye ligongo lya chinonyelo chawo chakulupichika.

5 Ŵawetu nganaŵa aŵechete* ya wawojo.

Ana pana jwalijose jwampaka ŵachimbichisye wawojo m’Malembe?*

6 Machili gamalile ligongo lya kuwuwula.

Chilo chosope ngusanyoŵesya bedi* jangu ni misosi.*

Ngusalila mwamti misosi jangu jikusagumbalana pabedi jangu.

7 Meso gangu gapesile ni kulila ligongo lya chanasa,

Gatesile chipi* ligongo lya ŵandu wosope ŵakundagasya.

8 Mundyochele jemanja wosope ŵamkusatenda yakusakala,

Pakuŵa Yehofa chachipikana kulila kwangu.

9 Yehofa chachipikana kuŵenda kwangu kwakuti andendele chanasa.

Yehofa chachijanga lipopelo lyangu.

10 Adani* ŵangu wosope chachatesya sooni, soni chachitenda woga.

Jemanjajo chachitila mwakusisimuchisya ali ni sooni.