Numeli

21 Sambano mwenye jwa Akanani jwa ku Aladi, juŵatamaga ku Negebu, ŵapikene yakuti Ayisalayeli akwika kupitila ku litala lya ku Atalimu. Myoyo mwenyewo ŵapite kukumenyana ngondo ni Ayisalayeliwo, mwamti ŵakamwile ŵane mwa Ayisalayeliwo kuti akaŵe achikapolo. 2 Yili yitendekwe yeleyi, Ayisalayeli ŵatesile chilanga kwa Yehofa kuti, “Naga akwapeleka ŵandu ŵeleŵa mmyala mwetu, nditu tuchijonangasoni misinda jawo.” 3 Myoyo Yehofa ŵapikanile maloŵe ga Ayisalayeligo, mwamti ŵapeleche Akananiwo mmyala mwa jemanjajo. Ayisalayeliwo ŵawuleje ŵanduwo soni ŵajonasile misinda jawo. Paligongo lyeleli, jemanjajo ŵagapele malogo lina lyakuti Holima.*

4 Ayisalayeli ŵapitilisye ulendo wawo kutyochela ku Litumbi lya Holi kupitila litala lyakwawula ku Nyasa Jechejewu pakusaka kuchiŵambala chilambo cha Edomu. Ligongo lya yeleyi ŵanduwo ŵapesile mnope ni ulendowu. 5 Soni ŵapitilisye kuŵecheta yakusisyana ni Mlungu nambosoni Mose kuti, “Ana mwatukopwesye m’chilambo cha Iguputo kuti tuwile m’chipululu muno? Kwangalitu yakulya soni mesi akuno. Soni yakulya yangali mateyi yikunyalaya kwabasi.” 6 Myoyo Yehofa ŵatumisye majoka ga ululu mnope pasikati pa Ayisalayeliwo. Majokago galumaga ŵanduwo, mwamti Ayisalayeli ŵajinji ŵawile.

7 Pelepo ŵanduwo ŵajawile kwa Mose ni kumsalila kuti, “M’weji tulemwisye mwakuŵecheta yindu yakusisyana ni Yehofa soni wawojo. Atuŵendele kwa Yehofa kuti atutyochesye majokaga.” Myoyo Mose ŵaŵendile kwa Mlungu mmalo mwa ŵanduwo. 8 Kaneko Yehofa ŵamsalile Mose kuti, “Mpanganye chiwanichisyo cha lijoka lya ululu mnope ni mchiŵiche pachitela. Naga mundu alumidwe ni majokago, aloleje chiwanichisyo cha lijokacho ni chakulinga chakuti akawa.” 9 Pelepo Mose ŵapanganyisye chiwanichisyo cha lijoka chachisyano cha kopacho ni kuchiŵika pachitela. Mundu jwalijose palumidwe ni lijoka, ŵalolaga chiwanichisyo cha lijokacho mwamti ŵalamaga.

10 Panyuma pakwe, Ayisalayeli ŵatyosile kweleko ni kuja kukunga matenti gawo ku Oboti. 11 Kaneko ŵatyosile ku Oboti ni kuja kukunga matenti gawo ku Iye-abalimu, m’chipululu chachaliji chakungopokolyuŵa mwakulolegana ni chilambo cha Mowabu. 12 Paŵatyosile kweleko ŵajile kukunga matenti gawo mwakuŵandikana ni Chitiŵi* cha Seledi. 13 Paŵatyosile kweleko ŵajile kukunga matenti gawo mu dela ja Alinoni. Dela jeleji jaliji mu chipululu chachatandilaga m’malile ga chilambo cha Aamoli. Dela ja Alinoni jalijisoni malile pasikati pachilambo cha Mowabu ni chilambo cha Aamoli. 14 Ni ligongo lyakwe buku jakusala ya ngondo sya Yehofa jikusaŵecheta ya malo ga “Fahebu ga mudela ja Sufa soni sulo sya mu chitiŵi cha Alinoni. 15 Sulo syelesi sikusaja kwika ku msinda wa Ali ni kwenda mpaka kuja kwika ku malile ga chilambo cha Mowabu.”

16 Paŵatyosile kweleko, ŵapite ku Beeli.* Kweleko kwaliji kwana chisima. Pakwamba ya chisima chelechi, Yehofa ŵamsalile Mose kuti, “Mwasonganganye ŵanduwo, kuti nape mesi jemanjajo.”

17 Pandaŵi jelejo Ayisalayeli ŵajimbile nyimbo aji:

“Mmwe chisima, mkoposye mesi! Jitichisyani jemanja nyimboji!

Kaneko jemanjajo ŵatyosile ku chipululuko ni kwawula ku Matina. 19 Paŵatyosile ku Matina ŵapite ku Nahalieli, soni paŵatyosile ku Nahalieli ŵapite ku Bamoti. 20 Paŵatyosile ku Bamoti ŵapite pamalo gakolanjidwa kuti Pisiga penani pa litumbi, malo gele gagaliji mwakulolegana ni Yesimoni. Maloga galiji mu chitiŵi m’chilambo cha Mowabu.

21 Sambano paŵaliji kweleko, Ayisalayeli ŵatumisye ŵamitenga kwa Sihoni mwenye jwa Aamoli kuti akaŵende kuti, 22 “Atukunde kuti tupite nawo m’chilambo chawochi. Ngatusepuchila mumgunda uliwose atamose m’migunda jawo ja mipeleya, nambosoni ngatumwa mesi pa chisima chawo chilichose. M’wejo chitugambeje kwenda mumsewu wakolanjidwa kuti Msewu wa Mwenye mpaka tuli tukopweche m’chilambo chawochi.” 23 Nambo mwenye Sihoniwo nganiŵakunda Ayisalayeliwo kuti apite m’chilambo chawocho. Mmalomwakwe mwenyewo ŵasongangenye ŵandu ŵawo wosope ni kwawula kuti akamenyane ni Ayisalayeliwo ku chipululu. Jemanjajo ŵayiche ku Yahasi ni ŵatandite kumenyana ngondo ni Ayisalayeli. 24 Nambo Ayisalayeli ŵagomeche mwenyewo, soni ŵandu ŵawo wosope ŵawuleje ni upanga* ni kusumula chilambo chawo. Ŵasumwile chilambocho kutyochela ku Alinoni mpaka ku Yaboki chiŵandika kuŵatamaga Aamoni. Nambo nganapelenganya ku Yaseli, ligongo msinda welewu watesile malile ni chilambo cha Aamoni.

25 Myoyo Ayisalayeli ŵajigele misinda josope ja Aamoli ni kutanda kutamamo kupwatikapo msinda wa Hesiboni pampepe ni tumisinda twine tosope twamwanamwana,* 26 pakuŵa ku Hesiboni ni kuŵatamaga Sihoni mwenye jwa Aamoli. Mwenyeŵa ŵamenyene ngondo ni mwenye jwa chilambo cha Mowabu ni kusumula chilambo chakwe chosope pampepe ni msindawo mpaka kuja kwika ku chitiŵi cha Alinoni. 27 Ni ligongo lyakwe ŵandu ŵatandite kuŵecheta mwambi wakunyosya wakuti:

“Ayiche akuno ku msinda wa Hesiboni.

Ŵandu ayiche akuno kuti ataŵe msinda wa mwenye Sihoni ni kuwulimbisya.

28 Pakuŵa moto wayiche kutyochela ku Hesiboni, lilamba lya moto lyayiche kutyochela mumsinda uŵatamaga mwenye Sihoni.

Motowo watinisye msinda wa Ali wa m’chilambo cha Mowabu. Watinisyesoni achimsyene malo gakwela gagaliji m’chitiŵi cha Alinoni.

29 Mkwete likungu mmwe chilambo cha Mowabu! Nditu chimjonasiche jemanja ŵandu ŵamkusimumtindiŵalila Kemosi.

Ligongo lya jwalakwejo ŵanache ŵakwe ŵachalume chachibalalikangana, nambosoni ŵanache ŵakwe ŵachakongwe chachiŵa achikapolo ŵa Sihoni mwenye jwa Aamoli.

31 Myoyo Ayisalayeliwo ŵatandite kutama m’chilambo cha Aamoli. 32 Kaneko Mose ŵatumisye achalume kuti akasonde msinda wa Yaseli. Ayisalayeliwo ŵasumwile tumisinda twawo twamwanamwana* ni kwatopola Aamoli ŵaŵatamaga mwelemo. 33 Panyuma pakwe Ayisalayeliŵa ŵagalawiche ni kujigala msewu wakwawula ku Basana. Kaneko Ogi mwenye jwa ku Basanako ŵakopweche mumsinda wakwe pampepe ni ŵandu ŵakwe wosope kuti akamenyane ngondo ni Ayisalayeliwo ku Edileyi. 34 Nambo Yehofa ŵamsalile Mose kuti, “Mkasimumjogopa jwalakwejo, pakuŵa une chinampeleche jwalakwejo soni ŵandu ŵakwe wosope pampepe ni chilambo chakwe mmyala mwenu. Yamwamtesile Sihoni mwenye jwa Aamoli juŵatamaga ku Hesiboni ni yachimumtendesoni jwalakwejo.” 35 Myoyo Ayisalayeli ŵapitilisye kwagomeka mwenyewo pampepe ni ŵanache ŵakwe ŵachalume soni ŵandu ŵawo wosope, mpaka nganipasimanikwa mundu jwalijose jwakulupuka. Pambesi pakwe, Ayisalayeliwo ŵasumwile chilambo chawocho.