Lefitiko

15 Yehofa ŵapitilisye kuŵecheta ni Mose soni Aloni kuti, 2 “Mŵechetane ni Ayisalayeli. Mwasalile jemanjajo kuti, ‘Naga jwamlume akwete ulwele wakusulula yindu kuyalo, mundu jwelejo aŵeje jwangaswejela ligongo lya yindu yeleyo. 3 Mundujo aŵeje jwangaswejela ligongo lya yindu yayikusululayo, chinga yinduyo yikusululape kuyaloko kapena kuyaloko kuwugaliche ligongo lya yinduyo.

4 “‘Bedi* jilijose jakugona mundu jwakulwala ulwele wakusulula yindu kuyalo jiŵeje jangaswejela soni chindu chilichose chatamile jwalakwejo chiŵeje changaswejela. 5 Jwalijose jwakwayiye bedi ja mundu jweleju achapeje yakuwala yakwe soni ajojeje nambosoni aŵeje jwangaswejela mpaka lyuŵa kukapila. 6 Jwalijose jwatamile chindu chiŵatamile mundu jwakulwala ulwele wakusulula yindu kuyalo achapeje yakuwala yakwe soni ajojeje nambosoni aŵeje jwangaswejela mpaka lyuŵa kukapila. 7 Jwalijose jwakwayiye chilu cha mundu jwakulwala ulwele wakusulula yindu kuyalo achapeje yakuwala yakwe soni ajojeje nambosoni aŵeje jwangaswejela mpaka lyuŵa kukapila. 8 Naga mundu jwakulwala ulwele wakusulula yindu kuyalo amsunile mata mundu jwamswela, mundu jwasunilidwejo achapeje yakuwala yakwe soni ajojeje nambosoni aŵeje jwangaswejela mpaka lyuŵa kukapila. 9 Chakutamila chilichose chakusaŵika pamgongo wa chinyama chatamile mundu jwakulwala ulwele wakusulula yindu kuyalo chiŵeje changaswejela. 10 Jwalijose jwakwayiye chindu chilichose chaŵatamile mundu jweleju aŵeje jwangaswejela mpaka lyuŵa kukapila. Nambosoni jwalijose jwanyakwile chilichose chiŵatamile jwalakwejo achapeje yakuwala yakwe soni ajojeje nambosoni aŵeje jwangaswejela mpaka lyuŵa kukapila. 11 Naga mundu jwakulwala ulwele wakusulula yindu kuyalo amkamwile mundu jwine mkanaŵe kunaŵa mmyala mwakwe, mundu jwamkamwilejo achapeje yakuwala yakwe soni ajojeje nambosoni aŵeje jwangaswejela mpaka lyuŵa kukapila. 12 Chiŵiga chilichose chakwayiye mundu jwakulwala ulwele wakusulula yindu kuyalo achikasanyeje nambosoni chiwiya* chilichose chaŵachipanganyisye ni chitela achichapeje ni mesi.

13 “‘Naga yindu yayikusululayo yilesile kukopoka kuyaloko mwamti mundujo aposile, jwalakwejo aŵalanjileje masiku 7 kuti aliswejesye. Panyuma pakwe, achapeje yakuwala yakwe soni ajojeje mesi gakuteka kulusulo. Pelepo aŵeje jwamswela. 14 Pa lisiku lya 8, mundujo ajigaleje mawunda gaŵili kapena ŵanache ŵaŵili ŵa njuŵa ni kwika nayo yijuni yeleyi pameso pa Yehofa kumlango wa chitenti chakusimanilana. Kaneko apelecheje yijuniyo kwa jwakutaga mbopesi. 15 Jwakutaga mbopesijo apelecheje yijuniyo kwa Mlungu. Chijuni chimo chiŵeje cha mbopesi jaulemwa soni chinecho chiŵeje cha mbopesi jakutinisya. Jwakutaga mbopesi atendeje yeleyi kuti amswejesye mundujo* pameso pa Yehofa ligongo lya ulwele wakusulula kuyalo ula.

16 “‘Sambano naga jwamlume akopwesye ulume, ajojeje chilu chakwe chosope soni aŵeje jwangaswejela mpaka lyuŵa kukapila. 17 Mundujo achapeje chakuwala chakwe soni lipende lya nyama lililyose pawugwilile ulumewo, mwamti yindu yeleyo yiŵeje yangaswejela mpaka lyuŵa kukapila.

18 “‘Naga jwamlume pakugonana ni jwamkongwe akopwesye ulume, wosopewo ajojeje nambosoni aŵeje ŵangaswejela mpaka lyuŵa kukapila.

19 “‘Naga jwamkongwe akwasa myasi ligongo lyakuti akoga,* aŵeje jwangaswejela kwa masiku 7. Jwalijose jwamkwayiye jwamkongwejo aŵeje jwangaswejela mpaka lyuŵa kukapila. 20 Chilichose chagonele jwalakwejo pandaŵi jali jwangaswejela ligongo lyakuti akoga chiŵeje changaswejela soni chilichose chatamile jwalakwejo chiŵejesoni changaswejela. 21 Jwalijose jwakwayiye bedi ja jwamkongweju achapeje yakuwala yakwe soni ajojeje nambosoni aŵeje jwangaswejela mpaka lyuŵa kukapila. 22 Jwalijose jwatamile chindu chilichose chiŵatamile jwamkongwejo achapeje yakuwala yakwe soni ajojeje nambosoni aŵeje jwangaswejela mpaka lyuŵa kukapila. 23 Naga jwamkongwe jwakoga ŵatamile bedi kapena chindu chinechakwe, jwalijose jwakwayiye chinducho aŵeje jwangaswejela mpaka lyuŵa kukapila. 24 Naga jwamlume akugonana ni jwamkongwe kaneko jwamlumejo jikumkwaya myasi jakopwesye jwamkongwejo ligongo lyakuti atandite koga, jwamlumejo aŵeje jwangaswejela kwa masiku 7. Nambosoni bedi jilijose jichagonele jwamlumejo jiŵeje jangaswejela.

25 “‘Naga jwamkongwe akwasa myasi kwa masiku gejinji nambo nganijiŵa ndaŵi jakwe jakoga kapena jwamkongwejo akwasa myasi kwa ndaŵi jelewu mwakulekangana ni mwayikusaŵela pandaŵi jakoga, jwalakwejo aŵeje jwangaswejela masiku gosope gakwasa myasijo mpela mwakusaŵela jwangaswejela pamasiku gakoga. 26 Bedi jilijose jagonele jwamkongwejo pandaŵi jakulwala ulwele wakwasa myasi jiŵeje jangaswejela mpela mwajikusaŵela bedi jagonele pandaŵi jakoga. Nambosoni chindu chilichose chatamile jwalakwejo chiŵeje changaswejela mpela mwakusaŵela jwangaswejela jwalakwejo pandaŵi jakoga. 27 Jwalijose jwakwayiye yindu yeleyi aŵeje jwangaswejela. Mundujo achapeje yakuwala yakwe soni ajojeje nambosoni aŵeje jwangaswejela mpaka lyuŵa kukapila.

28 “‘Nambope naga jwamkongwejo alesile kwasa myasi, aŵalanjileje masiku 7, panyuma pakwe aŵeje jwamswela. 29 Pa lisiku lya 8, jwamkongwejo ajigaleje mawunda gaŵili kapena ŵanache ŵaŵili ŵa njuŵa, ni ayicheje nayo yijuniyo kwa jwakutaga mbopesi kumlango wa chitenti chakusimanilana. 30 Jwakutaga mbopesijo ajigaleje chijuni chimo kuti chiŵe cha mbopesi jaulemwa soni chinecho kuti chiŵe cha mbopesi jakutinisya. Jwakutaga mbopesijo apelecheje yijuni yeleyi kuti amswejesye jwamkongwejo* pameso pa Yehofa ligongo lya myasi jajasilejo.

31 “‘Myoyo jemanja mwakamuchisyeje Ayisalayeli kuti alilekanganyeje ku yindu yangaswejela pakogopela kuti mpaka awe, ligongo lyakusakasya chitenti changu chachili pasikati pawo.

32 “‘Lyeleli lili lilamusi lyakuti mkuyeje pakwamba ya jwamlume jwakulwala ulwele wakusulula yindu kuyalo nambosoni jwamlume jwali jwangaswejela ligongo lyakukoposya ulume. 33 Lilamusi lyeleli likwayasoni jwamkongwe jwali ku mwesi, jwamlume kapena jwamkongwe jwalijose jwakulwala ulwele wakusulula yindu kuyalo nambosoni pakwamba ya jwamlume jwagonene ni jwamkongwe jwali jwangaswejela.’”