Detulonomo
23 “Jwamlume jwalijose juŵakundile kuti amjonaje kuyalo* kapena juŵakundile kumkata yiŵalo yakwe yachilume, jwamlume jweleju akaŵaga mbali ja ŵandu ŵa Yehofa.
2 “Mwanache jwalijose jwapetinji akaŵaga mbali ja ŵandu ŵa Yehofa. Nombenawo ŵanache ŵakwe akaŵaga mbali ja ŵandu ŵa Yehofa mpaka yisukulu yakwe ya mu m’bado* wa nambala 10.
3 “Mundu jwa mtundu wa Aamoni kapena Amowabu akayika ni kuŵa mbali ja ŵandu ŵa Yehofa. Nombe ŵanache ŵakwe akaŵaga mbali ja ŵandu ŵa Yehofa mpaka yisukulu yakwe ya mu m’bado wa nambala 10. 4 Yeleyi yili myoyo ligongo lyakuti jemanjajo nganamkamuchisya mwakumpa yakulya soni mesi pamwatyochelaga ku Iguputo. Yili myoyosoni ligongo lyakuti jemanjajo ŵamlembile ganyu Balamu mwanache jwa Beoli jwakutyochela ku Petoli m’chilambo cha Mesopotamiya kuti amtembelele jemanja. 5 Nambo Yehofa Mlungu jwenu nganampikanila Balamu. Mmalomwakwe Yehofa Mlungu jwenujo jwagachenjile matembelelogo ni kuŵa upile kwa jemanja, ligongo Yehofa Mlungu jwenujo ŵamnonyele jemanja. 6 Mkaja kwakundasoni jemanjajo kutama umi wambone soni wamtendele mpaka kalakala.
7 “Mkaŵenganaga ni mundu jwa mtundu wa Chiedomu, pakuŵa jwelejo ali mlongo mjenu.
“Mkaŵenganaga ni Myiguputo, pakuŵa jemanja mwaliji achalendo m’chilambo chakwe. 8 M’bado watatu wa ŵanache ŵa jemanjaji mpaka uŵe mbali ja ŵandu ŵa Yehofa.
9 “Pamkunjile matenti genu kuti mmenyane ngondo ni adani ŵenu, mŵambaleje chindu chine chilichose chakunyalaya.* 10 Naga mundu akopwesye ulume chilo, jwalakwejo ajawuleje kusa kwa malo gakunjile matenti soni akawujila kumatentiko. 11 Lyuŵa paligambile kukapila, jwalakwejo ajojeje. Kaneko awujileje kumatentiko. 12 Mpateje malo gakulikamuchisya kusa kwa malo gamkunjile matenti genu. Mundu pasachile kulikamuchisya ajawuleje kweleko. 13 Pa yida yenu yangondo mpwatichejesoni chakusolela. Pampite kukulikamuchisya kusa kwa malo gamkunjile matenti genu, mwukuleje lisimbo ni chakusolelacho. Pammalisisye kulikamuchisyako msilileje yakusakalayo. 14 Mtendeje yeleyi ligongo Yehofa Mlungu jwenu akwendajenda pasikati pa matenti genu kuti amkulupusye jemanja, soni kuti ŵapeleche adani ŵenu mmyala mwenu. Myoyo kumatenti genu kuŵeje kweswela, ni chakulinga chakuti jwalakwejo akachiwona chindu chine chilichose chakunyalaya ni kugalawuka kuleka kwenda ni jemanja.
15 “Kapolo patisile kwa ambuje ŵakwe ni kwika kwa mmwejo mkasimumjigala ni kumwuchisya kwa ambuje ŵakwewo. 16 Jwalakwe mpaka atameje pampepe ni jemanja pamalo gane galigose gasagwile gagamsangalesye jwalakwejo m’misinda jenu. Ngamkusosekwa kumtendela ngasa jwalakwejo.
17 “Pasikati penu pakaja kusimanikwa mwanache jwamkongwe jwa Chiyisalayeli ali mkutenda uhule pa nyumba jilijose jakupopelela. Pakaja kusimanikwasoni mwanache jwalijose jwamlume jwa Chiyisalayeli ali mkutenda uhule pa nyumba jilijose jakupopelela. 18 Mbiya syalipatile lihule lyachikongwe kapena lihule lyachilume* mkayikaga nasyo ni kusipeleka ku nyumba ja Yehofa Mlungu jwenu kuti mkwanilisye chilanga chenu. Yili myoyo ligongo lyakuti mbiya syosopesyo sili syakunyalaya kwa Yehofa Mlungu jwenu.
19 “Mlongo mjenu pamkongwele chindu mkamsalilaga kuti apeleche kapenani, chinga amkongwele mbiya, yakulya kapena chindu chine chilichose. 20 Naga mumkongwesye mundu jwamtundu wine jwakutama pasikati penu mpaka mumsalile kuti awusyeje ni kapenani kakwe, nambo mlongo mjenu mkamsalilaga kuti apeleche kapenani. Yeleyi yikaŵeje myoyo kuti Yehofa Mlungu jwenu akampeje upile jemanja pa yiliyose yachimkatendeje m’chilambo chamkwawula kukuchijigala kuti mkatamejecho.
21 “Naga mtesile chilanga kwa Yehofa Mlungu jwenu, mkachelewaga kuchikwanilisya, pakuŵa Yehofa Mlungujo nditu chachisaka kuti mmwejo mchikwanilisye. Naga ngamkukwanilisya chimchiŵa kuti mmwejo mlemwisye. 22 Nambo naga nganimtenda chilanga nikuti mmwejo ngasimsimanikwa kuŵa ŵakulemwa. 23 Yiliyose yamŵechete kuti chimyitende, myikwanilisyeje. Chilanga chilichose chamtesile ni pakamwa penu kwa Yehofa Mlungu jwenu mchikwanilisyeje ligongo chili mpela mbopesi jamkusapeleka mwakusaka kwenu.
24 “Pamjinjile mumgunda wa mipeleya wa mjenu, mpaka mlye yisogosi ya mipeleyayo mpaka kwikuta, nambo mkakaŵa yine ni kuyiŵika mu lukalala kuti mjigale.
25 “Pamjinjile mumgunda wa tiligu wa mjenu, mpaka mpululeje ni mkono wenu tiligu jwamkomale ni kulyaga, nambo mkajigala chikwakwa kuti mkate tiligu jwa mjenujo.