Lefitiko

12 Yehofa ŵapitilisye kuŵecheta ni Mose kuti, 2 “Mwasalile Ayisalayeliwo kuti, ‘Naga jwamkongwe akukola msigo ni kuŵeleka mwanache jwamlume, jwamkongwejo aŵeje jwangaswejela kwa masiku 7, mpela mwakusaŵela jwangaswejela pakoga.* 3 Pa lisiku lya 8, amwumbasyeje mwanachejo. 4 Jwamkongwejo chachipitilisya kuliswejesya kwa masiku gane 33 pa myasi jajasile ligongo lya kuŵelekako. Jwalakwejo akakwaya chindu chine chilichose cha pachitenti cha Mlungu nambosoni akayika kumalo geswela mpaka gali gamasile masiku gakwe gakuliswejesya.

5 “‘Naga jwalakwe akuŵeleka mwanache jwamkongwe, aŵeje jwangaswejela kwa masiku 14, mpela mwakusaŵela jwangaswejela pakoga. Jwamkongwejo chachipitilisya kuliswejesya kwa masiku gane 66 pa myasi jajasile ligongo lyakuŵelekako. 6 Pagamasile masiku gakwe gakuliswejesya panyuma pakuŵeleka mwanache jwamlume kapena jwamkongwe, ayicheje kwa jwakutaga mbopesi kumlango wa chitenti chakusimanilana ni mwanache jwa ngondolo jwamkambako jwangapunda chaka chimo kuti juŵe mbopesi jakwe jakutinisya. Ayicheje najosoni mwanache jwa njuŵa kapena liwunda kuti liŵe mbopesi jakwe jaulemwa. 7 Kaneko jwakutaga mbopesijo apelecheje mbopesi syelesi kwa Yehofa kuti asimasye ulemwa wa jwamkongwejo. Pelepo jwamkongwejo chachiŵa jwamswela pa myasi jajasile ligongo lyakuŵelekako. Lyeleli lili lilamusi lyakwamba jwamkongwe jwaŵeleche mwanache, chinga jwamlume kapena jwamkongwe. 8 Nambo naga jwamkongwejo nganaŵa akwanisye kupata ngondolo, jwalakwe ajigaleje mawunda gaŵili kapena ŵanache ŵaŵili ŵa njuŵa. Chijuni chimo chiŵe cha mbopesi jakutinisya soni chinecho chiŵe cha mbopesi jaulemwa. Kaneko jwakutaga mbopesi apelecheje yijuni yeleyi kuti asimasye ulemwa wa jwamkongwejo, mwamti pelepo jwamkongwejo chachiŵa jwamswela.’”