Lefitiko

14 Yehofa ŵapitilisye kuŵecheta ni Mose kuti, 2 “Ali lili lilamusi lyamkusosekwa kulikuya pakwamba ya jwakulwala matana pandaŵi jakuti awonegane ni jwakutaga mbopesi kuti aliswejesye. 3 Jwakutaga mbopesijo ajawuleje kusa kwa malo gakunjile ŵandu matenti kuti akamlole chenene mundujo. Naga mundujo aposile ku ulwele wa matanawo, 4 jwakutaga mbopesijo amsalileje mundujo kuti ayiche nayo yijuni yiŵili yeswela pameso pa Mlungu, nyambi ja chitela cha mkungusa, kaguwo kechejewu mnope, soni nyambi ja katela ka hisope. Ajigaleje yindu yeleyi kuti yiŵe yakamulichisya masengo pakumswejesya. 5 Pelepo jwakutaga mbopesi alamuleje kuti chijuni chimocho achiwulajileje penani pa mesi gakuteka m’lusulo gagali mu chiŵiga. 6 Kaneko ajigaleje chijuni chinecho chili chaumi pampepe ni nyambi ja chitela cha mkungusa jila, kaguwo kechejewu mnope kala soni nyambi ja katela ka hisope kala. Yindu yeleyi ayiloŵecheje m’myasi ja chijuni chachiwulajile penani pa mesi chila. 7 Kaneko ammisileje myasijo mundu jwakuliswejesya ku ulwele wa matanajo kwa maulendo 7. Pelepo jwakutaga mbopesijo agombelesyeje kuti mundujo ali jwamswela. Pambesi pakwe, chijuni chaumicho achigulusyeje kuti chijawuleje kwitinji.

8 “Kaneko mundu jwakuliswejesyajo achapeje yakuwala yakwe nambosoni asenjeje wumbo syosope sya pachilu pakwe soni ajojeje. Pelepo jwalakwe aŵeje jwamswela. Panyuma pakwe, jwalakwe mpaka ajawule kumatenti, nambo akajinjila mutenti jakwe mpaka gali gamasile masiku 7. 9 Pa lisiku lya 7, mundujo asenjejesoni wumbo syakwe syosope sya mumtwe, ndewu syakwe nambosoni ngwimbi syakwe. Panyuma pakuti asenjile wumbo syakwe syosope, jwalakwe achapeje yakuwala yakwe soni ajojeje. Pelepo mundujo aŵeje jwamswela.

10 Pa lisiku lya 8, jwalakwe ajigaleje ŵanache ŵaŵili ŵa ngondolo ŵamkambako ŵangalemala soni mwanache jumo jwa ngondolo jwamkolo jwangapunda chaka chimo jwangalemala. Ajigalejesoni utandi wetililiche wewanganye ni mawuta kuti uŵe mbopesi jambeju. Utandiwo mlingo wakwe uŵeje mbali sitatu kutyochela pa mbali 10 sya efa jimo,* nambosoni ajigaleje mawuta gakwana mlingo umo wa logi.* 11 Kaneko jwakutaga mbopesi juŵagombelesye kuti mundujo ali jwamswela ayicheje najo mundu jwakuliswejesyajo pameso pa Yehofa kumlango wa chitenti chakusimanilana. Ayicheje najo jwalakwejo pampepe ni mbopesi syakwesyo. 12 Jwakutaga mbopesi ajigaleje mwanache jwa ngondolo jwamkambako jumo pampepe ni mawuta gala ni kuyipeleka kuti yiŵe mbopesi jamagambo. Kaneko ayijigaleje yindu yeleyi ni kuyikwesya mwinani ni kuyiyuya aku nakuku pameso pa Yehofa mpela mbopesi jakuyuya. 13 Kaneko jwakutaga mbopesi asikitileje mwanache jwa ngondolo jwamkambakojo pamalo geswela, pamalo gakusasikitila ndaŵi syosope chilango cha mbopesi jaulemwa soni chilango cha mbopesi jakutinisya. Yeleyi yili myoyo ligongo lyakuti, mpela mwachiŵelele chilango cha mbopesi jaulemwa, nombenacho chilango cha mbopesi jamagambo chili cha ŵakutaga mbopesi. Mbopesi jeleji jili chindu cheswela mnope.

14 “Kaneko jwakutaga mbopesi ajigaleje jine mwa myasi ja mbopesi jamagambojo ni kujipaka paliwiwi lyakumlyo lya mundu jwakuliswejesyajo soni pachala chakwe chachikongo cha mkono wamlyo nambosoni pachala chakwe chachikongo cha lusajo lwakumlyo. 15 Panyuma pakwe, jwakutaga mbopesi ajigaleje gane mwa mawuta gala ni kugapungulila mu ligasa lyakwe lyakumchiji. 16 Kaneko jwakutaga mbopesijo achuye chala chakwe cha mkono wamlyo m’mawuta gagali m’ligasa lyakwe lyakumchiji, ni kugamisilaga ni chala chakwecho pameso pa Yehofa kwa maulendo 7. 17 Panyuma pakwe, jwakutaga mbopesijo ajigaleje gane mwa mawuta gagasigele mwigasa mwakwe ni kumpaka mundu jwakuliswejesyajo. Ampacheje mundujo pamalo papachile myasi ja mbopesi jamagambo jila. Malo gakwe gali: paliwiwi lyakwe lyakumlyo, pachala chakwe chachikongo cha mkono wamlyo nambosoni pachala chakwe chachikongo cha lusajo lwakwe lwakumlyo. 18 Pambesi pakwe, jwakutaga mbopesi ajigaleje mawuta gosope gagasigele mwigasa mwakwe ni kugataga pamtwe pa mundu jwakuliswejesyajo. Atende yeleyi kuti asimasye yakulemwa ya mundujo pameso pa Yehofa.

19 “Jwakutaga mbopesijo apelecheje mbopesi jaulemwa kuti asimasye yakulemwa ya mundu jwakuliswejesyajo. Panyuma pakwe, jwalakwe asikiteje chilango cha mbopesi jakutinisya. 20 Kaneko jwakutaga mbopesijo apelechele pamalo gakupelechela mbopesi chilango cha mbopesi jakutinisya soni mbopesi jambeju kuti asimasye yakulemwa ya mundujo. Pelepo mundujo aŵeje jwamswela.

21 “Nambope naga mundujo ali jwakulaga mwamti nganaŵa akombwele kupata yindu yeleyi, ajigaleje mwanache jwa ngondolo jwamkambako kuti juŵe mbopesi jamagambo, ni ajikwesyeje mwinani ni kujiyuya aku nakuku. Atendeje yeleyi ni chakulinga chakuti yakulemwa yakwe yisimasiche. Ajigalejesoni utandi wetililiche wewanganye ni mawuta kuti uŵe mbopesi jambeju. Utandiwo mlingo wakwe uŵeje mbali jimo kutyochela pa mbali 10 sya efa jimo,* nambosoni ajigaleje mawuta gakwana mlingo umo wa logi. 22 Nambosoni ajigaleje mawunda gaŵili kapena ŵanache ŵaŵili ŵa njuŵa, chilichose chakombwele kupata mwa yijuni yeleyi. Chijuni chimo chiŵeje cha mbopesi jaulemwa soni chinecho chiŵe cha mbopesi jakutinisya. 23 Pa lisiku lya 8, jwalakwe ajigaleje yindu yeleyi ni kwawusya kwa jwakutaga mbopesi kumlango wa chitenti chakusimanilana pameso pa Yehofa kuti akatendele mwambo wakwe wakuliswejesya.

24 “Kaneko jwakutaga mbopesi ajigaleje mwanache jwa ngondolo jwamkambako jwa mbopesi jamagambo jula pampepe ni mawuta gala. Jwakutaga mbopesijo ayikwesyeje yindu yeleyi mwinani ni kuyiyuya aku nakuku pameso pa Yehofa mpela mbopesi jakuyuya. 25 Kaneko asikiteje mwanache jwa ngondolo jwamkambako jwa mbopesi jamagambojo. Panyuma pakwe, jwakutaga mbopesi ajigaleje jine mwa myasi ja mbopesi jamagambojo ni kujipaka paliwiwi lyakumlyo lya mundu jwakuliswejesyajo soni pachala chakwe chachikongo cha mkono wamlyo nambosoni pachala chakwe chachikongo cha lusajo lwakumlyo. 26 Panyuma pakwe, jwakutaga mbopesi ajigaleje gane mwa mawuta gala ni kugapungulila mu ligasa lyakwe lyakumchiji. 27 Kaneko achuyeje chala chakwe cha mkono wamlyo m’mawuta gagali mu ligasa lyakwe lyakumchiji ni kugamisilaga pameso pa Yehofa kwa maulendo 7. 28 Kaneko jwakutaga mbopesijo ajigaleje mawuta gane gagali mwigasa mwakwe ni kumpaka mundu jwakuliswejesyajo. Ampacheje mundujo pamalo papachile myasi ja mbopesi jamagambo jila. Malo gakwe gali: paliwiwi lyakwe lyakumlyo, pachala chakwe chachikongo cha mkono wamlyo nambosoni pachala chakwe chachikongo cha lusajo lwakwe lwakumlyo. 29 Pambesi pakwe, jwakutaga mbopesi ajigaleje mawuta gosope gagasigele mwigasa mwakwe ni kugataga pamtwe pa mundu jwakuliswejesyajo, ni chakulinga chakuti asimasye yakulemwa ya mundujo pameso pa Yehofa.

30 “Jwakutaga mbopesi apelecheje mawunda kapena ŵanache ŵa njuŵa, mwakamulana ni yampaka akombole kupata mundujo. 31 Pa yijuni yiŵili yakombwele kupata, ajigaleje chijuni chimo kuti chiŵe cha mbopesi jaulemwa soni chijuni chinecho kuti chiŵe cha mbopesi jakutinisya. Mbopesi syelesi asipelecheje pampepe ni mbopesi jambeju. Jwakutaga mbopesi akamulichisyeje masengo yindu yeleyi pakusimasya ulemwa wa mundu jwakuliswejesyajo pameso pa Yehofa.

32 “Lyeleli lili lilamusi lyamkusosekwa kulikuya pakwamba ya mundu juŵakwete ulwele wa matana nambo nganaŵa akombwele kupata yindu yakusosechela pakuliswejesya.”

33 Kaneko Yehofa ŵamsalile Mose soni Aloni kuti, 34 “Pachimkayiche m’chilambo cha Kanani changumpa jemanja kuti chiŵe chilambo chenu, naga yikasimanikwe kuti nawukundile ulwele wa matana kuti utande m’nyumba jine m’chilambo chenucho, 35 msyene nyumba jelejo ayicheje kwa jwakutaga mbopesi, ni amsalileje kuti, ‘M’nyumba mwangu mwana ulwele winewakwe.’ 36 Jwakutaga mbopesi mkanayiche kujilola nyumbajo, alamuleje kuti katundu josope jwali m’nyumbamo amkoposyeje pasa, pakogopela kuti pachayiche jwakutaga mbopesijo mpaka agamule kuti yosopeyo yili yangaswejela. Panyuma pakwe, jwakutaga mbopesijo ayicheje kuti ajilole nyumbajo. 37 Payiche, aloleje pamalo papali ulwelewo. Naga ulwelewo ukopweche m’mapupa ga nyumbajo mwamti mukuwoneka madondo ga gilini jwakwawulila ku kale kapena madondo gechejewu, nambosoni yikuwoneka kuti madondogo gajinjile mkati mwa lipupa, 38 pelepo jwakutaga mbopesijo akopocheje m’nyumbamo. Kaneko jwalakwe alamuleje kuti m’nyumbamo mukapita mundu jwalijose mpaka gali gamasile masiku 7.

39 “Pa lisiku lya 7, jwakutaga mbopesijo ayichejesoni kukujilola nyumbajo. Naga ulwelewo ukwendelela m’mapupa ga nyumbajo, 40 jwakutaga mbopesijo alamuleje kuti maganga ga lipupa gagakamwile ulwelego agatyosyeje ni kuja kugajasa kusa kwa msinda kumalo gakusajasila yindu yakunyalaya. 41 Kaneko jwalakwejo alamuleje kuti apalapate mapupa gosope ga mkati mwa nyumbajo ni kutyosya litaka lyosope liŵatendele pulasitala,* soni kuti akalijaseje litakalyo kusa kwa msinda kumalo gakusajasila yindu yakunyalaya. 42 Kaneko ajinjisye maganga gane m’malo muŵatyosisye maganga mula, nambosoni ajigaleje litaka line ni kutendela pulasitala m’nyumbamo.

43 “Nambope, naga ulwelewo utandilesoni m’nyumbamo panyuma pakuti aŵisile maganga gane m’malo muŵatyosisye maganga mula nambosoni panyuma pakuti ajipalapatile nyumbajo ni kutenda pulasitala kane, 44 jwakutaga mbopesi ayichejesoni ni kujilola nyumbajo. Naga ulwele wa matanawo uwandile m’nyumbamo, gelego gali matana gakogoya. Nyumba jelejo jili jangaswejela. 45 Pelepo ajigwisyeje nyumba josope jenejo, kutandila maganga gakwe, matabwa gakwe, litaka lyakwe lyapulasitala mpakasoni litaka liŵataŵile nyumbajo. Kaneko ayijigaleje yindu yosopeyi ni kuja kuyijasa kusa kwa msinda kumalo gakwasila yindu yakunyalaya kula. 46 Nambo mundu jwalijose jwakwinjila m’nyumba jajikwete ulwele wa matana panyuma pakuti alamwile kuti jwalijose akajinjila m’nyumbamo, mundu jwelejo aŵeje jwangaswejela mpaka lyuŵa kukapila. 47 Nambosoni naga mundu agonile m’nyumba jelejo kapena kulila yakulya mwelemo, jwalakwejo achapeje yakuwala yakwe.

48 “Nambope naga jwakutaga mbopesi payiche kukujilola nyumba jajakwete ulwele wa matana, ni akuyiwona kuti ulwelewo nganiwuwanda m’nyumbamo panyuma pakujitendasoni pulasitala, pelepo jwakutaga mbopesijo agombelesyeje kuti nyumbajo jili jeswela, ligongo lyakuti ulwelewo umasile. 49 Pakusaka kujiswejesya nyumbajo,* jwakutaga mbopesi ajigaleje yijuni yiŵili, nyambi ja chitela cha mkungusa, kaguwo kechejewu mnope kala nambosoni nyambi ja katela ka hisope. 50 Chijuni chimocho achiwulajileje penani pa mesi gagali mu chiŵiga gakuteka mu lusulo. 51 Kaneko ajigaleje nyambi ja chitela cha mkungusa jila, nyambi ja katela ka hisope, kaguwo kechejewu kala nambosoni chijuni chine chila chili cha umi ni kuyichuya yosopeyi m’myasi ja chijuni chachiwulajile penani pa mesi chila. Panyuma pakwe, ajimisileje myasijo pa nyumbajo kwa maulendo 7. 52 Kaneko jwalakwe ajiswejesyeje nyumbajo* ni myasi ja chijuni chila, mesi gatechile mu lusulo gala, chijuni chaumi chila, nyambi cha chitela cha mkungusa jila, nyambi ja katela ka hisope kala nambosoni kaguwo kechejewu mnope kala. 53 Kaneko jwalakwe, pali kusa kwa msinda, achigulusyeje chijuni chaumi chila kuti chijawuleje kwitinji, mwamti yeleyi yichiswejesya nyumbajo* ni kuŵa jeswela.

54 “Lyeleli lili lilamusi lyamkusosekwa kulikuya pakwamba ya ulwele wa matana wawukopweche pamtwe kapena kundewu, 55 soni ulwele wa matana wawukopweche pa chakuwala kapena m’nyumba. 56 Nambosoni lyeleli lili lilamusi lyamkusosekwa kulikuya pakwamba yakuyimba, yikalaŵesa nambosoni yikanga yayikopweche pachilu. 57 Mkuyeje lilamusi lyeleli ni chakulinga chakuti mkomboleje kulekanganya pasikati pa chindu cheswela ni chindu changaswejela. Lyeleli lili lilamusi lyakwamba ulwele wa matana.”